Anthropic IPO: એક જ ઝાટકે ખુલી ગયું હજારો કર્મચારીઓનું નસીબ! AI કંપનીના IPOએ 5,100થી વધુ લોકોને બનાવી દીધા કરોડપતિ
Anthropic IPO: આર્ટિફિશિયલ ઈન્ટેલિજન્સ (AI) કંપની Anthropic ના શેરબજારમાં લિસ્ટિંગ થતાં જ તેના 5,100 થી વધુ કર્મચારીઓ રાતોરાત કરોડપતિ બની ગયા છે. જાણો એક-એક કર્મચારી પાસે કેટલા કરોડના શેર છે.
96% કર્મચારીઓ બન્યા કરોડપતિ, 600 લોકો પાસે 900 કરોડથી વધુના શેર!
Anthropic IPO: કોઈ સારી કંપનીમાં નોકરી કરવાનો ફાયદો માત્ર દર મહિને મળતા પગાર પૂરતો જ સીમિત નથી હોતો. જો કંપની ઝડપથી પ્રગતિ કરે અને કર્મચારીઓ પાસે કંપનીના શેર (ESOPs) પણ હોય, તો તેમનું નસીબ રાતોરાત બદલાઈ શકે છે. આર્ટિફિશિયલ ઈન્ટેલિજન્સ (AI) ક્ષેત્રની દિગ્ગજ કંપની 'એન્થ્રોપિક' (Anthropic) ના શેરબજારમાં લિસ્ટિંગ બાદ કંઈક આવો જ ચમત્કાર જોવા મળ્યો છે. કંપનીના IPO એ તેના હજારો કર્મચારીઓની કિસ્મત બદલી નાખી છે. મીડિયા રિપોર્ટ્સ અનુસાર, કંપનીના આશરે 5,100 કર્મચારીઓ હવે કાગળ પર કરોડપતિ (Paper Millionaires) બની ચૂક્યા છે. તેમાંથી ઘણા કર્મચારીઓ પાસે રહેલા શેરની કિંમત તો કરોડો ડોલરમાં પહોંચી ગઈ છે.
96% કર્મચારીઓ બન્યા કરોડપતિ, 600 લોકો પાસે 900 કરોડથી વધુના શેર!
રિપોર્ટ્સ મુજબ, Anthropic કંપનીના લગભગ 96% કર્મચારીઓ પાસે અત્યારે કંપનીના એવા શેર છે, જેની બજાર કિંમત લાખો-કરોડોમાં પહોંચી ગઈ છે:
5,100 કર્મચારીઓ (9 કરોડથી વધુ): કંપનીના અંદાજે 5,100 કર્મચારીઓ પાસે 10 લાખ ડોલર (આશરે 9 કરોડ રૂપિયા) થી વધુ કિંમતના શેર છે. એટલે કે આ લોકો 'પેપર કરોડપતિ' બની ગયા છે. પેપર કરોડપતિ એટલે એવા લોકો જેમની સંપત્તિ શેરના ભાવ મુજબ કરોડોમાં પહોંચી ગઈ છે, ભલે તેમણે હજુ તે શેર વેચીને રોકડા પૈસા હાથમાં ન લીધા હોય.
2,800 કર્મચારીઓ (90 કરોડથી વધુ): કંપનીના આશરે 2,800 કર્મચારીઓ એવા છે જેમની પાસે 1 કરોડ ડોલર (અંદાજે 90 કરોડ રૂપિયા) થી વધુ કિંમતના શેર હોવાનો અંદાજ છે.
600 કર્મચારીઓ (900 કરોડથી વધુ): સૌથી ચોંકાવનારી વાત એ છે કે કંપનીના લગભગ 600 કર્મચારીઓના શેરની વેલ્યુ 100 મિલિયન ડોલર એટલે કે 10 કરોડ ડોલર (આશરે 900 કરોડ રૂપિયા) થી પણ વધી ગઈ છે!
81 અબજ ડોલરનો જંગી IPO અને લિસ્ટિંગમાં 39% નો ઉછાળો
Anthropic નો આ IPO કદની દ્રષ્ટિએ પણ ખૂબ જ વિશાળ રહ્યો હતો. કંપનીએ આ IPO દ્વારા આશરે 81 અબજ ડોલર ભેગા કર્યા હતા અને શેરની ઈશ્યૂ પ્રાઈસ 83 ડોલર નક્કી કરવામાં આવી હતી. અમેરિકન શેરબજાર 'નાસ્ડેક' (Nasdaq) પર લિસ્ટિંગ સમયે શેરના ભાવમાં જબરદસ્ત ઉછાળો આવ્યો હતો.
ટ્રેડિંગ દરમિયાન શેર 39% સુધી ઉછળીને 115.10 ડોલર પર પહોંચી ગયો હતો અને પ્રથમ દિવસે શેર 17% ના વધારા સાથે બંધ થયો હતો. આ ધમાકેદાર લિસ્ટિંગ બાદ કંપનીનું માર્કેટ કેપ (બજાર મૂલ્ય) અંદાજે 1.8 ટ્રિલિયન ડોલરની આસપાસ પહોંચી ગયું છે.
2021માં શરૂ થયેલી કંપનીએ કર્મચારીઓને પહેલા જ દિવસે શેર વેચવાની આપી છૂટ
લોકપ્રિય AI ચેટબોટ 'ક્લોડ' (Claude) બનાવનારી કંપની Anthropic ની સ્થાપના વર્ષ 2021 માં થઈ હતી. વર્ષ 2024 ના અંત સુધીમાં આ કંપનીમાં 1,000 થી પણ ઓછા કર્મચારીઓ કામ કરતા હતા, પરંતુ AI પ્રોડક્ટ્સની વધતી માંગને કારણે કંપનીનો બિઝનેસ અને કર્મચારીઓની સંખ્યા ખૂબ જ ઝડપથી વધી ગઈ.
સામાન્ય રીતે કોઈ કંપનીનો IPO આવે ત્યારબાદ કંપનીના કર્મચારીઓ અને શરૂઆતના રોકાણકારો પર થોડા મહિનાઓ સુધી શેર વેચવા પર પ્રતિબંધ હોય છે. પરંતુ Anthropic એ પોતાના કર્મચારીઓને મોટી રાહત આપતા કંપનીના ફાઉન્ડર્સ સિવાયના અન્ય તમામ કર્મચારીઓને લિસ્ટિંગના પહેલા જ દિવસથી પોતાના શેરનો એક મર્યાદિત હિસ્સો વેચીને નફો બુક કરવાની છૂટ આપી હતી.