શેરબજારના રોકાણકારો માટે મોટી ખુશખબર, દેશનો અત્યાર સુધીનો સૌથી મોટો 31500 કરોડનો NSE IPO આ તારીખે આવશે

NSE IPO : શેરબજારમાં રોકાણ કરતા લોકો માટે એક ખૂબ જ મોટા અને સારા સમાચાર છે. લાંબા સમયથી જેની રાહ જોવાઈ રહી હતી તે નેશનલ સ્ટોક એક્સચેન્જનો IPO ટૂંક સમયમાં બજારમાં ધમાકો કરવા આવી રહ્યો છે. આ માત્ર કોઈ સામાન્ય IPO નથી, પરંતુ ભારતનો અત્યાર સુધીનો સૌથી મોટો IPO બનવા જઈ રહ્યો છે.

આવો જાણીએ આ મહા-આઈપીઓ વિશેની તમામ લેટેસ્ટ અને મહત્વની વિગતો.

ક્યારે આવશે NSE નો IPO?

મળતી માહિતી મુજબ, સપ્ટેમ્બર મહિનાના છેલ્લા બે અઠવાડિયામાં આ ઇશ્યૂ રોકાણકારો માટે ખુલી શકે છે. 19 ઓગસ્ટે આવેલા લેટેસ્ટ મીડિયા રિપોર્ટ્સ અનુસાર, આગામી બે અઠવાડિયાની અંદર સેબી તરફથી આ IPOને લીલી ઝંડી (મંજૂરી) મળી જવાની પૂરી શક્યતા છે. સપ્ટેમ્બરની શરૂઆતમાં જ કંપની તેના શેરના પ્રાઇસ બેન્ડની સત્તાવાર જાહેરાત કરી શકે છે.

અત્યાર સુધી દેશમાં સૌથી મોટા IPO નો રેકોર્ડ હ્યુન્ડાઇ મોટર્સના નામે છે, જેણે 27870 કરોડ રૂપિયાનો આઈપીઓ બહાર પાડ્યો હતો. પરંતુ, NSEનો આ આઈપીઓ આશરે 31500 કરોડ રૂપિયાનો હશે, જે જૂના તમામ રેકોર્ડ તોડી નાખશે.

IPO ની પ્રાઇસ બેન્ડ અને વેલ્યુએશન

રિપોર્ટ્સ મુજબ, NSE પોતાની કુલ વેલ્યુએશન 5.2 લાખ કરોડથી લઈને 5.3 લાખ કરોડ રૂપિયાની વચ્ચે આંકવા માંગે છે. શેરની કિંમત 2100થી 2300 રૂપિયાની વચ્ચે હોવાનો અંદાજ છે. આ IPO સંપૂર્ણપણે ઓફર ફોર સેલ હશે. કંપનીએ જૂન મહિનામાં સેબી પાસે ડ્રાફ્ટ જમા કરાવ્યો હતો, જે મુજબ જૂના રોકાણકારો પોતાના 14.89 કરોડ શેર (લગભગ 6 ટકા હિસ્સેદારી) બજારમાં વેચશે.

દુનિયાભરમાં ધૂમ મચાવી રહ્યું છે NSE

માર્કેટ વેલ્યુની વાત કરીએ તો દુનિયાના સૌથી મોટા સ્ટોક એક્સચેન્જોમાં NSE હવે છઠ્ઠા નંબર પર આવી ગયું છે. તેની વેલ્યુ લંડન સ્ટોક એક્સચેન્જ કરતા થોડીક જ ઓછી છે, પરંતુ નાસ્ડેક કરતા વધારે છે. પોતાના આ શાનદાર IPO માટે NSE એ બોસ્ટન, લંડન, સિંગાપોર અને હોંગકોંગ જેવા દુનિયાના મોટા શહેરોમાં રોડ-શો પૂરા કરી લીધા છે. આ મીટિંગ્સમાં BlackRock, Capital Group અને GQG Partners જેવા દુનિયાના 120 જેટલા દિગ્ગજ ઇન્વેસ્ટર્સે ભાગ લીધો હતો. હવે માત્ર મિડલ ઇસ્ટના દેશોમાં રોડ-શો કરવાનો બાકી છે.

ક્યાં લિસ્ટ થશે શેર?

અહીં એ જાણવું રસપ્રદ છે કે, NSEનું સીધું હરીફ BSE પહેલાથી જ શેરબજારમાં લિસ્ટેડ છે. BSE ના શેર NSE પર ટ્રેડ થાય છે. હવે જ્યારે NSEનો આ મહા-IPO આવશે, ત્યારે તેના શેર નિયમો અનુસાર BSE પર લિસ્ટ કરવામાં આવશે.

આ પણ વાંચો-Market View : બજારમાં આગામી કેટલાક દિવસો સાવધાન રહેજો, કડાકા વચ્ચે પણ ડિફેન્સ સેક્ટરનો આ શેર કરાવશે તગડી કમાણી