રોકાણકારો સાવધાન! 2026માં આવશે IPOનો મહાકુંભ, 190 કંપનીઓ ઉભા કરશે 2.5 લાખ કરોડ

Upcoming IPO in India 2026: ભારતીય શેરબજારમાં જે રીતે તેજીનો માહોલ ચાલી રહ્યો છે, તેને જોતાં આવનારું વર્ષ રોકાણકારો માટે વધુ એક શાનદાર તક લઈને આવી રહ્યું છે. વર્ષ 2025 એ છેલ્લા 18 વર્ષમાં IPO માર્કેટ માટે રેકોર્ડબ્રેક રહ્યું છે, પરંતુ 2026 આ રેકોર્ડને પણ તોડી નાખે તેવી પૂરી સંભાવના છે. બજારના નિષ્ણાતો અને SEBIના આંકડા મુજબ, લગભગ 190 કંપનીઓ આવતા વર્ષે IPO લાવવા માટે લાઈનમાં ઉભી છે અને તેમનો ટાર્ગેટ બજારમાંથી 2.50 લાખ કરોડ જેવી માતબર રકમ એકઠી કરવાનો છે.

IPO માર્કેટ કેમ આટલું ગરમ છે?

આ તેજી પાછળનું મુખ્ય કારણ બજારમાં રોકાણકારોનો વધતો ઉત્સાહ છે. ખાસ કરીને નાના એટલે કે રિટેલ રોકાણકારો પ્રાયમરી માર્કેટમાં ભારે રસ દાખવી રહ્યા છે. આ તકનો લાભ ઉઠાવવા માટે મોટી કંપનીઓ અને વેન્ચર કેપિટલ ફંડ્સ પણ પોતાના IPO લાવવા માટે ઉતાવળા બન્યા છે.

SEBI (સિક્યુરિટીઝ એન્ડ એકસચેન્જ બોર્ડ ઓફ ઈન્ડિયા) ના ડેટા પર નજર કરીએ તો, 88 કંપનીઓને IPO લાવવા માટે SEBI ની મંજૂરી મળી ચૂકી છે. 104 કંપનીઓની અરજીઓ હજુ વિચારણા હેઠળ છે. આ બધી કંપનીઓ મળીને આવતા વર્ષે 2.50 લાખ કરોડથી વધુનું ભંડોળ એકત્ર કરવાનું લક્ષ્ય રાખી રહી છે.

જો આપણે પાછલા વર્ષોના આંકડા જોઈએ તો આ તેજી કેટલી મોટી છે તેનો અંદાજ આવશે:

2025: 100 કંપનીઓએ IPO દ્વારા લગભગ 1.77 લાખ કરોડ એકઠા કર્યા.

2024: 91 IPO દ્વારા 1.60 લાખ કરોડ ઊભા કરાયા હતા.

2023: 57 IPO દ્વારા માત્ર 49,500 કરોડ જ એકઠા થયા હતા.

આ આંકડા સ્પષ્ટપણે દર્શાવે છે કે બજારમાં IPO લાવવાનો ટ્રેન્ડ સતત વધી રહ્યો છે.

રોકાણકારોને શું ફાયદો?

કંપનીઓ માટે ભંડોળ એકઠું કરવાની આ તક રોકાણકારો માટે પણ કમાણીનો સોનેરી અવસર બની રહી છે.

લિસ્ટિંગ ગેઇન: ચાલુ વર્ષમાં આવેલા IPO માંથી 65% માં રોકાણકારોને લિસ્ટિંગના દિવસે જ નફો મળ્યો છે.

સારો પ્રતિસાદ: રિટેલ રોકાણકારોની સાથે સાથે વિદેશી અને સ્થાનિક સંસ્થાઓ (ફંડ્સ) પણ IPO માં મોટા પ્રમાણમાં નાણાં રોકી રહી છે, જેના કારણે મોટાભાગના IPO સફળ થઈ રહ્યા છે.

ઊંચું મૂલ્યાંકન: બજારમાં હાલ જે ઊંચા વેલ્યુએશન મળી રહ્યા છે, તેનો ફાયદો કંપનીઓ અને તેમના પ્રારંભિક રોકાણકારો ઉઠાવી રહ્યા છે. 2025 માં જ તેમણે પોતાની ભાગીદારી વેચીને 1.10 લાખ કરોડ જેટલી રકમ મેળવી છે.

આમ, બજારમાં ઉપલબ્ધ રોકડ (લિક્વિડિટી) અને રોકાણકારોના સકારાત્મક અભિગમને જોતાં એવું લાગે છે કે 2026 નું વર્ષ IPO માર્કેટ માટે ઐતિહાસિક સાબિત થશે. રોકાણકારોએ યોગ્ય કંપની પસંદ કરીને આ તકનો લાભ લેવા માટે તૈયાર રહેવું જોઈએ.