LG ઇન્ડિયાનો મેગા IPO: 11,500 કરોડનું રોકાણ, ઓક્ટોબરમાં મોટી કમાણીની તક!

LG India IPO: ભારતનું શેર માર્કેટ ઓક્ટોબર મહિનામાં ફરી એકવાર ગરમાવાની તૈયારીમાં છે. દક્ષિણ કોરિયાની જાણીતી કંપની LG ઇલેક્ટ્રોનિક્સની ભારતીય શાખા, LG ઇન્ડિયા, 11,500 કરોડ રૂપિયાનો મેગા IPO લાવવા જઈ રહી છે. આ IPO 6 ઓક્ટોબરથી શરૂ થવાની શક્યતા છે, જે રોકાણકારો માટે મોટી કમાણીની તક લઈને આવશે.

LG ઇન્ડિયાએ ભારતીય પ્રતિભૂતિ અને વિનિમય બોર્ડ (સેબી) પાસે જરૂરી ડોક્યુમેન્ટ્સ નોંધાવ્યા છે અને ગુરુવારે તેને અપડેટેડ ડ્રાફ્ટ રેડ હેરિંગ પ્રોસ્પેક્ટસ માટે મંજૂરી પણ મળી ગઈ છે. કંપની આગામી સપ્તાહમાં ફાઇનલ ડોક્યુમેન્ટ્સ દાખલ કરવાની તૈયારીમાં છે. આ IPO બાદ કંપનીનું વેલ્યુએશન આશરે 9 બિલિયન ડોલર થવાનો અંદાજ છે, જે ડિસેમ્બર 2024માં અપેક્ષિત 15 બિલિયન ડોલરથી થોડું ઓછું છે.

વર્ષનો ત્રીજો સૌથી મોટો IPO

આ IPO 2025નો ત્રીજો સૌથી મોટો IPO હશે. આ વર્ષે HDB ફાઇનાન્શિયલ સર્વિસિસ અને હેક્સાવેર ટેક્નોલોજીસના IPOએ પણ બજારમાં ધૂમ મચાવી હતી. 2025માં અત્યાર સુધીમાં IPO દ્વારા 10 બિલિયન ડોલરથી વધુ રકમ એકત્ર થઈ ચૂકી છે. જોકે, LG ઇન્ડિયાના IPOનું કદ અને તારીખ હજુ બદલાઈ શકે છે, કારણ કે આ અંગે ચર્ચાઓ ચાલુ છે.

LG ઇન્ડિયાના IPOની ચર્ચા 2024થી ચાલી રહી છે. ડિસેમ્બર 2024માં કંપનીએ સેબી પાસે પ્રથમ વખત ડોક્યુમેન્ટ્સ દાખલ કર્યા હતા, જેમાં મૂળ કંપની દ્વારા 10.18 કરોડ શેર (15% હિસ્સો) વેચવાની યોજના હતી. માર્ચમાં મંજૂરી મળી, પરંતુ બજારની અસ્થિરતાને કારણે IPO ટળી ગયો. હવે, સપ્ટેમ્બર 2025માં અપડેટેડ ડ્રાફ્ટ દાખલ કર્યા બાદ કંપની ફરીથી તૈયારીમાં છે.

સપ્ટેમ્બરમાં રેકોર્ડબ્રેક IPO બજાર

સપ્ટેમ્બર 2025 ભારતીય IPO બજાર માટે ઐતિહાસિક રહ્યો છે. લગભગ 30 વર્ષ બાદ એક જ મહિનામાં આટલી સંખ્યામાં કંપનીઓ મેનબોર્ડ સેગમેન્ટમાં લિસ્ટ થઈ રહી છે. બ્લૂમબર્ગના ડેટા અનુસાર, આ મહિને 25 કંપનીઓ 12,000 કરોડ રૂપિયાથી વધુ એકત્ર કરવાની તૈયારીમાં છે. નાની SME કંપનીઓથી લઈને ટાટા કેપિટલ, LG ઇન્ડિયા, NSE, હીરો ફિનકોર્પ જેવા મોટા નામો પણ આ યાદીમાં સામેલ છે.

આ પણ વાંચો- US GDP Growth: ટ્રમ્પ ટેરિફ વચ્ચે અમેરિકાનો GDP ગ્રોથ 3.8% સુધી પહોંચ્યો, ગ્રાહક ખર્ચમાં ઉછાળો