PhonePeનો આવી રહ્યો છે IPO! SEBI પાસે ડોક્યુમેન્ટ્સ સબમિટ, Walmartની માલિકી હેઠળ રૂપિયા 12,000 કરોડનું ફંડ

PhonePe IPO: ભારતની અગ્રણી ડિજિટલ પેમેન્ટ અને ફાઈનાન્શિયલ સર્વિસ કંપની PhonePe ટૂંક સમયમાં IPO લાવવાની તૈયારીમાં છે. Walmartની માલિકી હેઠળની આ કંપનીએ ભારતીય પ્રતિભૂતિ અને વિનિમય બોર્ડ (SEBI) પાસે ડ્રાફ્ટ રેડ હેરિંગ પ્રોસ્પેક્ટસ (PDRHP) ગોપનીય રીતે સબમિટ કર્યું છે. સૂત્રોના જણાવ્યા અનુસાર, PhonePe આ IPO દ્વારા લગભગ 12,000 કરોડ (1.35 બિલિયન ડોલર) એકત્ર કરવાની યોજના ધરાવે છે. આ સંપૂર્ણ પેશકશ ઓફર ફોર સેલ (OFS)ના રૂપમાં હશે.

કોણ વેચશે હિસ્સો?

આ ઓફર ફોર સેલમાં Walmart, Tiger Global અને Microsoft જેવા મોટા રોકાણકારો સામેલ છે, જેઓ સાથે મળીને તેમનો લગભગ 10% હિસ્સો વેચશે. PhonePeના પ્રવક્તાએ જણાવ્યું કે કંપનીએ SEBI, BSE અને NSE પાસે ICDR રેગ્યુલેશન, 2018ના ચેપ્ટર IIA હેઠળ ડ્રાફ્ટ ડોક્યુમેન્ટ્સ સબમિટ કર્યા છે. જોકે, આનો અર્થ એ નથી કે IPO નિશ્ચિત આવશે.

IPOની તૈયારીમાં કોણ-કોણ?

ઈન્વેસ્ટમેન્ટ બેન્ક્સ: કોટક મહિન્દ્રા કેપિટલ, સિટી, મોર્ગન સ્ટેનલી, જેપી મોર્ગન, જેફરીઝ, ગોલ્ડમેન સૅક્સ, એક્સિસ કેપિટલ અને જેએમ ફાઇનાન્શિયલ મુખ્ય સલાહકાર તરીકે કામ કરશે.

કાનૂની સલાહકાર: શાર્દુલ અમરચંદ મંગળદાસ, સિરિલ અમરચંદ મંગળદાસ અને ટ્રાયલીગલને નિયુક્ત કરવામાં આવ્યા છે. રિપોર્ટ્સ અનુસાર, કંપની 15 બિલિયન ડોલર (1,33,000 કરોડ)ના વેલ્યુએશન પર લિસ્ટિંગની યોજના ધરાવે છે.

કંપનીનું નાણાકીય પ્રદર્શન

PhonePeએ નાણાકીય વર્ષ 2024-25માં શાનદાર પ્રદર્શન કર્યું છે. કંપનીની આવક 40%ના વાર્ષિક વધારા સાથે 7,115 કરોડ સુધી પહોંચી છે, જે તેની લોકપ્રિયતા અને બિઝનેસ વિસ્તરણને દર્શાવે છે. કંપનીએ 1,202 કરોડનો સકારાત્મક ઓપરેશનલ ફ્રી કેશ ફ્લો નોંધાવ્યો છે. એમ્પ્લોઈ સ્ટોક ઓપ્શન પ્લાનની કિંમત સિવાય, સમાયોજિત EBITDA બમણું થઈને 1,477 કરોડ થયું છે.

ટેક્સ પછીનો નફો 220%ના ઉછાળા સાથે 630 કરોડ સુધી પહોંચ્યો છે, જે કંપનીના કાર્યક્ષમ ખર્ચ વ્યવસ્થાપન અને નફાકારકતાને દર્શાવે છે.

શું છે આગળ?

હવે બધાની નજર SEBIની મંજૂરી અને આ બહુપ્રતીક્ષિત લિસ્ટિંગની તારીખ પર ટકેલી છે. PhonePeનો આ IPO ડિજિટલ પેમેન્ટ ઈન્ડસ્ટ્રીમાં નવો ઈતિહાસ રચી શકે છે.

આ પણ વાંચો-બ્રિટન, કેનેડા અને ઓસ્ટ્રેલિયાએ ફિલિસ્તીનને દેશ તરીકે આપી માન્યતા, ઇઝરાયલનો આકરો વિરોધ