NSE IPO Allotment: આજે જાણવા મળશે શેર મળ્યા કે નહીં, આ રીતે ચેક કરો સ્ટેટસ; પરંતુ ગ્રે માર્કેટના આંકડાએ વધારી ટેન્શન!

NSE IPO Allotment: દેશના સૌથી મોટા સ્ટોક એક્સચેન્જ નેશનલ સ્ટોક એક્સચેન્જ ના IPOને રોકાણકારો તરફથી શાનદાર પ્રતિસાદ મળ્યો છે. 5 ગણાથી વધુ સબસ્ક્રાઇબ થયા બાદ, હવે રોકાણકારો આતુરતાથી પોતાના એલોટમેન્ટની રાહ જોઈ રહ્યા છે. આગામી 24 સપ્ટેમ્બરના રોજ આ શેર BSE પર લિસ્ટ થવા જઈ રહ્યા છે. પરંતુ લિસ્ટિંગ પહેલા જ ગ્રે માર્કેટમાં જોવા મળેલા ઘટાડાએ રોકાણકારોનું થોડું ટેન્શન વધારી દીધું છે.

ગ્રે માર્કેટમાં હાલત ખરાબ

જો લિસ્ટિંગ ગેઈનની વાત કરીએ તો, ગ્રે માર્કેટમાં NSE ના શેરની હાલત નબળી પડી છે. હાલમાં આ શેર IPO ની અપર પ્રાઇસ બેન્ડથી માત્ર 54 રૂપિયા એટલે કે 3.03% ના GMP પર ટ્રેડ થઈ રહ્યો છે. તમને જણાવી દઈએ કે, IPO ખુલવાના થોડા દિવસો પહેલા આ જ GMP 310 રૂપિયા (17% થી વધુ) પર હતો. જોકે, માર્કેટ નિષ્ણાતોનું માનવું છે કે લિસ્ટિંગના દિવસે બજારની સ્થિતિ અને કંપનીની બિઝનેસ મજબૂતી પર નફો આધાર રાખશે, માત્ર ગ્રે માર્કેટના સંકેતો પર નહીં.

એલોટમેન્ટ ક્યારે અને કેવી રીતે ચેક કરવું?

BSEની વેબસાઈટ પર સ્ટેટસ ચેક કરવાની રીત:-

* સૌ પ્રથમ BSE ની સત્તાવાર લિંક https://www.bseindia.com/investors/appli_check.aspx પર જાઓ.

* ત્યારબાદ ઈશ્યુ ટાઈપમાં 'Equity' પસંદ કરો.

* ઈશ્યુના નામમાં 'NSE' સિલેક્ટ કરો.

* હવે તમારો એપ્લિકેશન નંબર અથવા PAN કાર્ડ નંબર દાખલ કરો.

* 'I'm not a robot' ના બોક્સ પર ટિક કરો.

* છેલ્લે 'Search' બટન પર ક્લિક કરો. તમને સ્ક્રીન પર દેખાશે કે તમને શેર લાગ્યા છે કે નહીં.

રજિસ્ટ્રાર (MUFG) ની સાઇટ પર ચેક કરવાની રીત:-

* સૌથી પહેલા https://in.mpms.mufg.com/Initial_Offer/public-issues.html લિંક ઓપન કરો.

* 'Select Company' ના ઓપ્શનમાં જઈને 'NSE' પસંદ કરો.

* હવે PAN નંબર, એપ્લિકેશન નંબર, DP/Client ID અથવા એકાઉન્ટ નંબર/IFSC માંથી કોઈ એક વિકલ્પ પસંદ કરો.

* તમે જે વિકલ્પ પસંદ કર્યો છે તેની વિગતો ભરો. (દા.ત. PAN પસંદ કર્યું હોય તો PAN નંબર નાખો).

* 'Submit' પર ક્લિક કરો. તમારી સ્ક્રીન પર એલોટમેન્ટ સ્ટેટસ આવી જશે.

NSE IPOને મળ્યો હતો જબરદસ્ત રિસ્પોન્સ

NSE નો 22,562 કરોડ રૂપિયાનો આ IPO 17 થી 21 સપ્ટેમ્બર સુધી સબસ્ક્રિપ્શન માટે ખુલ્લો હતો. તેને ઓવરઓલ 5.71 ગણું સબસ્ક્રિપ્શન મળ્યું હતું. જેમાં QIB (ક્વાલિફાઈડ ઈન્સ્ટિટ્યુશનલ બાયર્સ) નો હિસ્સો 12.68 ગણો, NIIનો હિસ્સો 6.55 ગણો, રિટેલ રોકાણકારોનો હિસ્સો 1.39 ગણો અને કંપનીના કર્મચારીઓનો હિસ્સો 2.40 ગણો ભરાયો હતો.

ખાસ નોંધવા જેવી બાબત એ છે કે, આ IPO માં કોઈ નવા શેર બહાર પાડવામાં આવ્યા નથી. તે સંપૂર્ણપણે ઓફર ફોર સેલ (OFS) છે, જેમાં 1 રૂપિયાની ફેસ વેલ્યુ વાળા 12,64,36,650 શેર વેચવામાં આવ્યા છે. આથી IPO માંથી મળેલા પૈસા કંપનીને નહીં, પરંતુ પોતાના શેર વેચનારા શેરહોલ્ડર્સને મળશે.

NSEનો બિઝનેસ અને નાણાકીય સ્થિતિ

1992 માં શરૂ થયેલું NSE ભારતનું સૌથી મોટું અને દુનિયાના સૌથી મોટા મલ્ટી-એસેટ એક્સચેન્જ પ્લેટફોર્મ્સમાં સામેલ છે. તાજેતરના જૂન 2026 ના ડેટા મુજબ, NSE પર 26.13 કરોડથી વધુ રોકાણકારો રજિસ્ટર્ડ છે, જેમાં 12.9 કરોડ યુનિક ઇન્વેસ્ટર્સ અને 1328 ટ્રેડિંગ મેમ્બર્સ છે. આ પ્લેટફોર્મ પર 3005 કંપનીઓ લિસ્ટેડ છે, જેમનું કુલ માર્કેટ કેપ (જૂન 2026 મુજબ) લગભગ 474 લાખ કરોડ રૂપિયા છે. માર્ચ 2026 ના અંત સુધીમાં કેશ માર્કેટ ટર્નઓવરમાં NSE નો હિસ્સો 99.79%, ઇક્વિટી ફ્યુચર્સમાં 74.71%, ઇક્વિટી ઓપ્શન્સમાં 99.48% અને એક્સચેન્જ-ટ્રેડેડ કરન્સી ઓપ્શન્સમાં 100% છે.

જો નાણાકીય સ્વાસ્થ્યની વાત કરીએ તો, નાણાકીય વર્ષ 2024-26 માં તેનો ચોખ્ખો નફો વાર્ષિક 11% (CAGR) ના દરે વધીને 10,302.06 કરોડ રૂપિયા થઈ ગયો છે. જોકે, આવકમાં થોડી વધઘટ જોવા મળી છે. નાણાકીય વર્ષ 2024 માં કુલ આવક 16,352.06 કરોડ અને 2025 માં 19,176.83 કરોડ રૂપિયા હતી, જે 2026 માં થોડી ઘટીને 18,713.37 કરોડ રૂપિયા પર આવી ગઈ. લેટેસ્ટ ચાલુ નાણાકીય વર્ષ 2027 ની વાત કરીએ તો, જૂન 2026 ના ક્વાર્ટરમાં એક્સચેન્જને 3,120.08 કરોડનો ચોખ્ખો નફો અને 5,252.17 કરોડ રૂપિયાની કુલ આવક મળી છે. જૂન 2026 ના અંતે કંપની પાસે રિઝર્વ અને સરપ્લસ પેટે 34,996.73 કરોડ રૂપિયા જમા હતા.

આ પણ વાંચો- US tariffs on India: ‘ભારત પર ટૅરિફ ઝીંકશો તો મોટી આફત આવશે', જેપી મોર્ગનના CEO જેમી ડિમોને અમેરિકા અને ડોનાલ્ડ ટ્રમ્પને આપી ખુલ્લી ચેતવણી

(નોંધ: શેરબજારમાં રોકાણ જોખમોને આધીન છે. રોકાણ કરતા પહેલા તમારા નાણાકીય સલાહકારની મદદ ચોક્કસ લો.)