શેર બજારમાં PNGS Reva Diamond Jewellery ની નબળી એન્ટ્રી, 4% ડિસ્કાઉન્ટ સાથે થયું લિસ્ટિંગ

PNGS Reva IPO Listing: બુધવારે, 4 માર્ચના રોજ શેર બજારમાં PNGS Reva Diamond Jewellery નું લિસ્ટિંગ રોકાણકારોની અપેક્ષા મુજબ રહ્યું નથી. દલાલ સ્ટ્રીટ પર આ કંપનીના શેરે ધીમી શરૂઆત કરી છે અને પોતાના ઇશ્યૂ પ્રાઇસથી લગભગ 4% નીચે માર્કેટમાં એન્ટ્રી કરી છે.

કંપનીનો શેર BSE પર 372ના ભાવે ખુલ્યો હતો. આ આંકડો 386 ના ઇશ્યૂ પ્રાઇસ કરતાં 3.6% ઓછો છે. કંપનીએ પોતાના આ IPO માટે 386 નો અપર પ્રાઇસ બેન્ડ નક્કી કર્યો હતો. જોકે, બજારની સુસ્તી અને ઓછી ડિમાન્ડના કારણે રોકાણકારોને કોઈ લિસ્ટિંગ ગેઇનનો લાભ મળી શક્યો નથી.

કેવો રહ્યો હતો રોકાણકારોનો રિસ્પોન્સ?

380 કરોડના આ IPO ને રોકાણકારો તરફથી કોઈ ખાસ અને ઉત્સાહજનક પ્રતિસાદ મળ્યો ન હતો. સબસ્ક્રિપ્શનના ત્રીજા દિવસ સુધીમાં આ ઇશ્યૂ કુલ 1.23 ગણો ભરાયો હતો. તેમાં રિટેલ રોકાણકારોનો હિસ્સો 1.29 ગણો અને નોન-ઇન્સ્ટિટ્યુશનલ ઇન્વેસ્ટર્સ (NII) નો હિસ્સો 1.54 ગણો સબસ્ક્રાઇબ થયો હતો. જ્યારે બીજી બાજુ, QIB (ક્વોલિફાઇડ ઇન્સ્ટિટ્યુશનલ બાયર્સ) નો હિસ્સો માત્ર 1.04 ગણો જ ભરાયો હતો.

PNGS Reva Diamond Jewellery એ પુણેની એક ખૂબ જ જાણીતી ડાયમંડ જ્વેલરી બ્રાન્ડ છે. આ કંપની ‘P N Gadgil & Sons Ltd' માંથી અલગ થઈને એક સ્વતંત્ર રિટેલ કંપની તરીકે બનાવવામાં આવી છે.

31 માર્ચ, 2025 સુધીના આંકડા મુજબ, કંપની મહારાષ્ટ્ર, ગુજરાત અને કર્ણાટકના 25 શહેરોમાં કુલ 33 સ્ટોર્સ ચલાવી રહી હતી. નાણાકીય વર્ષ 2025 ના રિપોર્ટ પ્રમાણે, કંપનીની આવકમાં 32% નો વધારો જોવા મળ્યો હતો અને તે 258.18 કરોડ નોંધાઈ હતી. સાથે જ નફો 40% વધીને 59.47 કરોડ પર પહોંચી ગયો હતો.

IPOના ફંડનો ક્યાં ઉપયોગ થશે?

નવા સ્ટોર્સ: નાણાકીય વર્ષ 2028 સુધીમાં કંપની 15 નવા સ્ટોર્સ ખોલવાનું મોટું આયોજન ધરાવે છે.

બ્રાન્ડિંગ અને માર્કેટિંગ: આ પૈસાનો મોટો હિસ્સો 'Reva' બ્રાન્ડના માર્કેટિંગ અને પ્રમોશન પાછળ ખર્ચવામાં આવશે.

કોર્પોરેટ જરૂરિયાતો: કંપનીના સામાન્ય બિઝનેસ અને અન્ય કોર્પોરેટ જરૂરિયાતો પૂરી કરવા માટે પણ આ રકમ વાપરવામાં આવશે.

રોકાણકારો માટે શું છે નિષ્ણાતોની સલાહ?

ભલે કંપનીનું લિસ્ટિંગ ડિસ્કાઉન્ટ પર થયું હોય, પણ તેના નાણાકીય પરિણામો અને બેલેન્સ શીટ ખૂબ જ મજબૂત છે. બજારના નિષ્ણાતોનું માનવું છે કે, જે લોકો શોર્ટ ટર્મ માટે રોકાણ કરવા આવ્યા હતા તેમના માટે આ લિસ્ટિંગ નિરાશાજનક રહ્યું છે. પરંતુ જે રોકાણકારો લોંગ ટર્મ માટે (લાંબા સમય સુધી) રોકાણ કરવા માંગતા હોય, તેમણે કંપનીના વિસ્તરણ (Expansion) અને ભવિષ્યની યોજનાઓ પર નજર રાખવી જોઈએ. આગળ જતા આ શેર સારો દેખાવ કરી શકે તેવી શક્યતા છે.

આ પણ વાંચો- શેર બજારમાં ભૂકંપ: સેન્સેક્સ 1700 પોઈન્ટ તૂટ્યો, ગણતરીની મિનિટોમાં રોકાણકારોના 10 લાખ કરોડ સ્વાહા, જાણો આ 5 મોટા કારણો

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.