Rentomojo IPO: 9 સપ્ટેમ્બરથી ખુલશે 1,255 કરોડનો IPO, ગ્રે માર્કેટમાં અત્યારથી જ ધૂમ, જાણો પ્રાઇસ બેન્ડ અને અન્ય ડિટેલ્સ

Rentomojo IPO: શેર બજારમાં રોકાણ કરવા માંગતા લોકો માટે એક શાનદાર તક આવી રહી છે. ઘરનું ફર્નિચર અને એપ્લાયન્સીસ ભાડે આપતી જાણીતી કંપની રેટોમોજો પોતાનો નવો IPO લાવી રહી છે. આ 1,255.57 કરોડનો મોટો IPO 9 સપ્ટેમ્બરના રોજ રોકાણકારો માટે ખુલશે. રસપ્રદ વાત એ છે કે, IPO ખુલતા પહેલા જ ગ્રે માર્કેટમાં કંપનીના શેરની ભારે ડિમાન્ડ જોવા મળી રહી છે અને શેર પ્રીમિયમ પર ટ્રેડ કરી રહ્યો છે.

કંપની શું કામ કરે છે?

રેટોમોજો તેના ગ્રાહકોને એકદમ સસ્તા, ફ્લેક્સિબલ અને લોન્ગ-ટર્મ સબસ્ક્રિપ્શન પ્લાન આપે છે. આ પ્લાન હેઠળ ગ્રાહકો ઘરની જરૂરી વસ્તુઓ જેવી કે બેડ, ગાદલા, ફ્રિજ, વોશિંગ મશીન, અલમારી, સોફા, ટીવી અને વોટર પ્યુરિફાયર જેવી વસ્તુઓ ભાડે લઈ શકે છે. આજકાલના યુવાનોમાં આ ટ્રેન્ડ ખૂબ જ લોકપ્રિય છે.

IPOની મહત્વની તારીખો અને ડિટેલ્સ

* IPO ખુલવાની તારીખ: 9 સપ્ટેમ્બર

* IPO બંધ થવાની તારીખ: 11 સપ્ટેમ્બર

* એન્કર ઇન્વેસ્ટર્સ માટે: 8 સપ્ટેમ્બર

* પ્રાઇસ બેન્ડ: 384 થી 404 પ્રતિ શેર

* લોટ સાઈઝ: 37 શેર (એટલે કે તમારે ઓછામાં ઓછા 37 શેર લેવા પડશે)

* એલોટમેન્ટની તારીખ: 15 સપ્ટેમ્બર

* લિસ્ટિંગની તારીખ: 17 સપ્ટેમ્બર (NSE અને BSE પર)

ફ્રેશ ઈશ્યુ અને OFS ની માહિતી

આ IPOમાં કંપની 150 કરોડના 37.15 લાખ નવા શેર બહાર પાડશે. આ સાથે જ 1,105.57 કરોડના 2.74 કરોડ શેર ઓફર ફોર સેલ હેઠળ વેચવામાં આવશે. OFSમાં કંપનીના પ્રમોટર ગીતાંશ બામનિયાની સાથે Excel India IV, Edelweiss Discovery Fund-Series I, IDG Ventures India, Value Quest, Madison India, Chiratae Ventures અને GMO Payment Gateway જેવા મોટા રોકાણકારો પોતાના શેર વેચવા કાઢશે.

શેરનું રિઝર્વેશન કોના માટે કેટલું?

આ IPOમાં QIB માટે 50% હિસ્સો, રિટેલ રોકાણકારો માટે 35% અને NII માટે 15% હિસ્સો રિઝર્વ રાખવામાં આવ્યો છે. આ ઈશ્યુના લીડ મેનેજર તરીકે મોતીલાલ ઓસ્વાલ ઇન્વેસ્ટમેન્ટ એડવાઇઝર્સ, એક્સિસ કેપિટલ અને IIFL કેપિટલ સર્વિસીસ કામ કરી રહ્યા છે. જ્યારે તેના રજિસ્ટ્રાર Kfin Technologies Ltd. છે.

કંપની IPOના પૈસાનું શું કરશે?

નવા શેર જારી કરીને કંપનીને જે 150 કરોડ મળશે, તેનો ઉપયોગ કંપની પોતાનું જૂનું દેવું ચૂકવવા માટે કરશે. આ ઉપરાંત, વેરહાઉસ અને એક્સપિરિયન્સ સ્ટોર્સના ભાડા અથવા લાઈસન્સ ફી ચૂકવવા અને અન્ય સામાન્ય કોર્પોરેટ હેતુઓ માટે આ ફંડ વપરાશે. લેટેસ્ટ અપડેટ મુજબ, ગ્રે માર્કેટમાં આ શેર હાલમાં 8.17%ના સારા પ્રીમિયમ પર ચાલી રહ્યો છે.

રેટોમોજોની નાણાકીય સ્થિતિ

કંપનીનો ગ્રોથ ઘણો સારો રહ્યો છે. નાણાકીય વર્ષ 2025-26ના આંકડા મુજબ, કંપનીની આવક 45% વધીને 394 કરોડ પર પહોંચી ગઈ છે. જ્યારે શુદ્ધ નફો 142%ના જંગી ઉછાળા સાથે 104.30 કરોડ નોંધાયો છે. જોકે, કંપની પર હાલમાં 187.59 કરોડનું દેવું પણ છે. અગાઉના વર્ષે કંપનીની આવક 271.96 કરોડ અને નફો 43.11 કરોડ હતો.

આ પણ વાંચો- પાકિસ્તાનમાં મોટો રાજકીય ભૂકંપ: લંડનમાં સિક્રેટ મીટિંગ, આસિમ મુનીરના પ્લાનથી ઝરદારી-શહબાઝના ઉડ્યા હોશ!

(ડિસ્ક્લેમર: અહીં આપેલી માહિતી માત્ર ન્યૂઝ અપડેટ અને જાણકારી માટે છે. શેર બજારમાં રોકાણ બજારના જોખમોને આધીન છે. કોઈપણ IPO અથવા શેરમાં પૈસા લગાવતા પહેલા તમારા સર્ટિફાઇડ ફાઇનાન્સિયલ એક્સપર્ટની સલાહ ચોક્કસ લો.)