પાકિસ્તાનમાં મોટો રાજકીય ભૂકંપ: લંડનમાં સિક્રેટ મીટિંગ, આસિમ મુનીરના પ્લાનથી ઝરદારી-શહબાઝના ઉડ્યા હોશ!

Pakistan political crisis: પાકિસ્તાનના રાજકારણમાં ફરી એકવાર મોટા ઉલટફેરના સંકેતો મળી રહ્યા છે. ઇસ્લામાબાદથી લઈને લાહોર સુધી રાજકીય ગરમાવો આવી ગયો છે અને તેનું કારણ છે લંડનમાં થયેલી એક ગુપ્ત બેઠક. રાષ્ટ્રપતિ આસિફ અલી ઝરદારી અને ગૃહ મંત્રી મોહસીન નકવી વચ્ચે લંડનમાં 90 મિનિટ સુધી એક સિક્રેટ મીટિંગ ચાલી હતી. આ મીટિંગ બાદ પાકિસ્તાનમાં રાજકીય ભૂકંપ આવવાની પૂરી શક્યતા છે.

જાણો પાકિસ્તાનનો નવો નકશો અને સેનાના આ નવા ગેમપ્લાનની પૂરી ઇનસાઇડ સ્ટોરી:

આસિમ મુનીરનો 'સિક્રેટ મેસેજ' અને લંડન મીટિંગ

મીડિયા રિપોર્ટ્સ અને સૂત્રોના જણાવ્યા અનુસાર, પાકિસ્તાનના ગૃહ મંત્રી મોહસીન નકવી આર્મી ચીફ જનરલ આસિમ મુનીરનો એક ખાસ અને અત્યંત ગુપ્ત મેસેજ લઈને લંડન પહોંચ્યા હતા. આ મીટિંગનો મુખ્ય હેતુ પાકિસ્તાનના વહીવટી નકશાને બદલવાનો છે. એટલે કે, પાકિસ્તાનમાં નવા પ્રાંતો અને વહીવટી એકમો બનાવવાનો મોટો પ્લાન ઘડાઈ રહ્યો છે.

પાકિસ્તાન આર્મી દેશમાં નવા પ્રાંત બનાવવાના પ્રસ્તાવ પર ઝડપથી કામ કરવા માંગે છે. આ માટે રાષ્ટ્રપતિ ઝરદારી પર ભારે દબાણ કરવામાં આવી રહ્યું છે. સૂત્રોના મતે, ઝરદારી નવા પ્રાંત બનાવવાના વિરોધમાં નથી, પરંતુ તેઓ આ પ્રક્રિયા ધીમે ધીમે કરવા માંગે છે.

પંજાબ અને KPK થી શરૂઆત: ઝરદારીનું કહેવું છે કે નવા પ્રાંત બનાવવાની શરૂઆત પંજાબ અને ખૈબર પખ્તુનખ્વા (KPK) થી થવી જોઈએ, કારણ કે ત્યાંની એસેમ્બલીમાં આ અંગેના પ્રસ્તાવ પહેલાથી જ પાસ થઈ ચૂક્યા છે.

સિંધનું વિભાજન મંજૂર નથી: ઝરદારી પોતાના ગઢ ગણાતા 'સિંધ' પ્રાંતના ભાગલા પડવાના સખત વિરોધમાં છે. તેમને ડર છે કે જો સિંધના ભાગલા પડશે તો તેમની પાર્ટી (PPP) નું વર્ચસ્વ ખતમ થઈ જશે અને લોકો ઉગ્ર વિરોધ પ્રદર્શન કરશે. બલૂચિસ્તાનમાં ચાલી રહેલા આતંકવાદ અને ખરાબ સુરક્ષા વ્યવસ્થાને કારણે ત્યાં પણ કોઈ નવો અખતરો કરવાનું તેઓ ટાળી રહ્યા છે.

વચ્ચેનો રસ્તો: શું છે ઓલ્ટરનેટિવ પ્લાન?

બંધારણમાં તાત્કાલિક ફેરફાર કરવાના બદલે અત્યારે એક વચલો રસ્તો શોધવામાં આવી રહ્યો છે.

નવા વહીવટી એકમો: રાજ્યોના સીધા ભાગલા કરવાના બદલે પહેલા તબક્કામાં નવા વહીવટી એકમો બનાવીને સ્થાનિક સ્વરાજ્યની સંસ્થાઓને મજબૂત કરવામાં આવશે.

બંધારણીય સુધારા: ત્યારબાદ બંધારણના આર્ટિકલ 140 (સ્થાનિક સરકારના માળખા અંગે) અને આર્ટિકલ 160 (કેન્દ્ર અને રાજ્યો વચ્ચે નાણાકીય વહેંચણી અંગે) માં સુધારા કરવા પર વિચાર થઈ શકે છે.

નવાઝ શરીફની એન્ટ્રી અને રાયવિંડમાં હાઈલેવલ મીટિંગ

સેનાના વધતા દબાણને જોઈને રાષ્ટ્રપતિ ઝરદારીએ પૂર્વ પીએમ અને PML-Nના સુપ્રીમ નેતા નવાઝ શરીફનો સંપર્ક કર્યો છે. હાલમાં જ લાહોરના રાયવિંડમાં નવાઝ શરીફની અધ્યક્ષતામાં એક મોટી મીટિંગ યોજાઈ હતી. જેમાં વડાપ્રધાન શહબાઝ શરીફ અને પંજાબના મુખ્યમંત્રી મરિયમ નવાઝ પણ હાજર હતા. આ બેઠકમાં નક્કી થયું છે કે નવા પ્રાંતોના મુદ્દે પહેલું સ્ટેન્ડ ઝરદારીની પાર્ટી લેશે, ત્યારબાદ જ PML-N પોતાનો આગળનો નિર્ણય લેશે.

પાકિસ્તાન આર્મી શા માટે નકશો બદલવા માંગે છે?

પાકિસ્તાની સેનાનો મુખ્ય ટાર્ગેટ મોટા રાજકીય પક્ષોને કમજોર કરવાનો છે. પંજાબમાં PML-N અને સિંધમાં PPPનું ભારે વર્ચસ્વ છે. જો આ મોટા રાજ્યોને નાના હિસ્સામાં વહેંચી દેવામાં આવે, તો સત્તાના નવા કેન્દ્રો ઉભા થશે અને આ જૂની પાર્ટીઓની પકડ ઢીલી પડી જશે. આ કોઈ સામાન્ય સરકારી ફેરફાર નથી, પરંતુ પાકિસ્તાનના રાજકીય સમીકરણોને મૂળમાંથી બદલી નાખવાની આર્મીની એક બહુ મોટી ચાલ છે. આવનારા દિવસોમાં પાકિસ્તાનના રાજકારણમાં મોટા ધમાકા જોવા મળી શકે છે.

આ પણ વાંચો- New age parenting tips: બાળકોને માર્ક્સની રેસમાં ન દોડાવો! જાણો ન્યૂ-એજ પેરેન્ટિંગના 5 સૌથી જરૂરી નિયમો