એસટેક ઈ-કોમર્સ IPO લિસ્ટિંગ: 112 પર ફ્લેટ એન્ટ્રી પછી શેરમાં ઉછાળો, રોકાણ કરતા પહેલા આ ખાસ ડિટેલ્સ ચેક કરો

Acetech E-Commerce IPO: ઈરાન અને અમેરિકા વચ્ચે ચાલી રહેલા તણાવને કારણે અત્યારે વૈશ્વિક શેરબજારમાં ભારે ઉથલપાથલ જોવા મળી રહી છે. આ અસ્થિરતા અને હાહાકાર વચ્ચે આજે Acetech E-Commerceના શેરનું NSE SME પ્લેટફોર્મ પર લિસ્ટિંગ થયું છે. કંપનીનો શેર તેની ઈશ્યૂ કિંમત 112 પર જ લિસ્ટ થયો હતો, એટલે કે IPOમાં રોકાણ કરનારાઓને કોઈ જ લિસ્ટિંગ ગેન (Listing Gain) મળ્યો ન હતો. જોકે, ફ્લેટ એન્ટ્રી પછી શેરમાં થોડી ખરીદી જોવા મળી હતી અને તે ઉછળીને 113.00 પર પહોંચી ગયો હતો. આ રીતે રોકાણકારો હાલ 0.89%ના મામૂલી નફામાં છે.

કંપની શું કામ કરે છે?

વર્ષ 2014માં શરૂ થયેલી એસટેક ઈ-કોમર્સ (Acetech E-Commerce) ડ્રોપશિપિંગ, ટેલિશોપિંગ અને ક્રોસ-બોર્ડર સેલિંગ જેવી ઈ-કોમર્સ પ્રવૃત્તિઓ સાથે જોડાયેલી છે. કંપનીનો મુખ્ય ઉદ્દેશ્ય બજારમાં વધુ ડિમાન્ડ ધરાવતા પ્રોડક્ટ્સ શોધીને તેને દેશ-વિદેશમાં વેચવાનો છે. આંતરરાષ્ટ્રીય સ્તરે કંપનીનો બિઝનેસ તેની સબસિડિયરી કંપનીઓ- કોન્સેપ્ટિવ બ્રેઈન્સ પ્રાઈવેટ લિમિટેડ (ભારત) અને એસટેક વેન્ચર્સ ઈન્ક (યુએસએ) ના માધ્યમથી ચાલે છે.

IPOની વિગતો અને સબસ્ક્રિપ્શન

* કુલ સબસ્ક્રિપ્શન: આ IPO ઓવરઓલ 1.14 ગણો ભરાયો હતો.

* QIB (ક્વોલિફાઈડ ઈન્સ્ટિટ્યૂશનલ બાયર્સ): 1.00 ગણું સબસ્ક્રિપ્શન

* NII (નોન-ઈન્સ્ટિટ્યૂશનલ ઈન્વેસ્ટર્સ): 1.57 ગણું સબસ્ક્રિપ્શન

* રિટેલ રોકાણકારો: 1.16 ગણું સબસ્ક્રિપ્શન

કંપની IPO ના પૈસા ક્યાં વાપરશે?

નવા શેર જારી કરીને ભેગા કરાયેલા ભંડોળનો ઉપયોગ કંપની તેના બિઝનેસના વિસ્તરણ માટે કરશે. જેમાંથી:

1.70 કરોડ: માર્કેટિંગ અને જાહેરાતો પાછળ ખર્ચાશે.

7.00 કરોડ: વર્કિંગ કેપિટલ (રોજબરોજના ખર્ચ) ની જરૂરિયાતો માટે વપરાશે.

બાકીની રકમ: નવા એક્વિઝિશન અને સામાન્ય કોર્પોરેટ હેતુઓ માટે વાપરવામાં આવશે.

કેવી છે કંપનીની નાણાકીય સ્થિતિ?

રોકાણ કરતા પહેલા કંપનીની બેલેન્સશીટ જોવી ખૂબ જરૂરી છે. એસટેક ઈ-કોમર્સની આર્થિક સ્થિતિ સતત મજબૂત થઈ રહી છે:

નફો: નાણાકીય વર્ષ 2023 માં કંપનીનો ચોખ્ખો નફો 1.52 કરોડ હતો, જે 2024 માં વધીને 4.02 કરોડ અને 2025 માં 6.88 કરોડ પર પહોંચી ગયો હતો.

આવક: આ સમયગાળા દરમિયાન કંપનીની કુલ આવક પણ વાર્ષિક 15% થી વધુના CAGR (કમ્પાઉન્ડ ગ્રોથ રેટ) સાથે વધીને 70.41 કરોડ થઈ છે.

લેટેસ્ટ આંકડા: ચાલુ નાણાકીય વર્ષ 2026 ના પ્રથમ છ મહિનામાં (એપ્રિલ-સપ્ટેમ્બર 2025) કંપનીએ 5.74 કરોડનો નફો અને 40.44 કરોડની આવક નોંધાવી લીધી છે.

દેવું અને રિઝર્વ: સપ્ટેમ્બર 2025 ના અંતે કંપની પર માત્ર 43 લાખનું કુલ દેવું હતું, જ્યારે તેની સામે કંપનીના રિઝર્વ અને સરપ્લસ ખાતામાં 10.11 કરોડ જમા હતા. જે એક સારી બાબત કહી શકાય.

એસટેક ઈ-કોમર્સની આવક અને નફામાં સતત વધારો થઈ રહ્યો છે અને કંપની પર દેવાનો બોજ પણ નહિવત છે. લાંબા ગાળે આ શેર સારું પ્રદર્શન કરી શકે તેવા ફંડામેન્ટલ્સ ધરાવે છે. છતાં ગ્લોબલ માર્કેટની વર્તમાન સ્થિતિને જોતા, કોઈપણ નવું રોકાણ કરતા પહેલા પોતાના નાણાકીય સલાહકાર (Financial Advisor)ની સલાહ ચોક્કસ લેવી.

આ પણ વાંચો- શેર બજારમાં ભૂકંપ! સેન્સેક્સ 2300 પોઈન્ટ તૂટ્યો, નિફ્ટી 23,800ની નીચે ગગડ્યો; જાણો માર્કેટ ક્રેશ થવાના 5 મોટા કારણો

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.