2006 મુંબઈ ટ્રેન બ્લાસ્ટ કેસ: બોમ્બે હાઈકોર્ટે 12 આરોપીઓને નિર્દોષ જાહેર કર્યા, 189 લોકોના થયા હતા મોત

Mumbai train blast case: 7/11 મુંબઈ ટ્રેન બ્લાસ્ટ કેસમાં બોમ્બે હાઈકોર્ટે આજે મોટો ચુકાદો આપ્યો છે. કોર્ટે આ કેસના તમામ 12 આરોપીઓને બરી કર્યા છે. આ આતંકવાદી હુમલામાં 189 લોકોના મોત થયા હતા અને 827 લોકો ઘાયલ થયા હતા. કોર્ટે જણાવ્યું કે પ્રોસિક્યુશન આરોપીઓ વિરુદ્ધ કેસ સાબિત કરવામાં સંપૂર્ણપણે નિષ્ફળ રહ્યું.

7/11 મુંબઈ ટ્રેન બ્લાસ્ટ શું હતું?

11 જુલાઈ 2006ના રોજ મુંબઈની લોકલ ટ્રેનોમાં 11 મિનિટના ગાળામાં સાત બોમ્બ બ્લાસ્ટ થયા હતા. આ હુમલામાં 189 લોકોના મોત થયા અને 827 લોકો ગંભીર રીતે ઘાયલ થયા. એન્ટી-ટેરરિઝમ સ્ક્વોડએ આ કેસમાં 13 આરોપીઓની ધરપકડ કરી હતી, જ્યારે 15 આરોપીઓ ફરાર હોવાનું જણાવાયું હતું, જેમાંથી કેટલાકના પાકિસ્તાનમાં હોવાની શંકા હતી. 2015માં નીચલી કોર્ટે 12 આરોપીઓને દોષી ઠેરવ્યા હતા, જેમાં 5ને ફાંસી અને 7ને આજીવન કેદની સજા ફટકારવામાં આવી હતી. આ ચુકાદાને પડકારતી અરજીઓ હાઈકોર્ટમાં દાખલ થઈ હતી.

હાઈકોર્ટનો ચુકાદો: શું કહ્યું?

બોમ્બ, બંદૂકો અને નકશા જેવા પુરાવાઓની વસૂલાત અંગે કોર્ટે જણાવ્યું કે, "આ વસૂલાતનું કોઈ મહત્વ નથી, કારણ કે પ્રોસિક્યુશન બ્લાસ્ટમાં વપરાયેલા બોમ્બનો પ્રકાર ઓળખવામાં પણ નિષ્ફળ રહ્યું."

સુનાવણી દરમિયાન શું થયું?

જુલાઈ 2024થી હાઈકોર્ટમાં છ મહિના સુધી સતત સુનાવણી ચાલી. આરોપીઓના વકીલોએ દલીલ કરી કે મહારાષ્ટ્ર ઓર્ગેનાઈઝ્ડ ક્રાઈમ કંટ્રોલ એક્ટ (MCOCA) હેઠળ પૂછપરછ દરમિયાન પોલીસે દબાણ હેઠળ કબૂલાત નોંધી, જે વિશ્વસનીય નથી. બચાવ પક્ષે મુંબઈ ક્રાઈમ બ્રાન્ચની તપાસનો ઉલ્લેખ કર્યો, જેમાં ઈન્ડિયન મુજાહિદ્દીનની સંડોવણી અને IM સભ્ય સાદિકની કબૂલાતની વાત સામે આવી.

બીજી તરફ, સરકારી વકીલ રાજા ઠાકરેએ ત્રણ મહિના સુધી દલીલ કરી કે, "આ રેરેસ્ટ ઓફ રેર કેસ છે, ફાંસીની સજાની પુષ્ટિ થવી જોઈએ."

શું છે આગળનું પગલું?

આ ચુકાદો મુંબઈ ટ્રેન બ્લાસ્ટ કેસની તપાસ અને ન્યાયિક પ્રક્રિયા પર મોટા પ્રશ્નો ઉભા કરે છે. પ્રોસિક્યુશન હવે આ નિર્ણયને સુપ્રીમ કોર્ટમાં પડકારી શકે છે. આ કેસનો ચુકાદો ન્યાયની શોધમાં એક મહત્વનો ટર્નિંગ પોઈન્ટ છે.

આ પણ વાંચો- ગુજરાતમાં મેઘ મહેર: 141 તાલુકામાં વરસાદ, અમદાવાદમાં સવારથી જામ્યો વરસાદી માહોલ