અગ્નિવીરો માટે સૌથી મોટા ખુશખબર! 4 વર્ષની સેવા બાદ હવે કરી શકશે લગ્ન, રજાઓ વધારવા અને ASAAN એપ પર મળશે કરિયરના 4 વિકલ્પ

Agniveer Marriage Rules: ભારતીય સેનામાં ‘અગ્નિપથ યોજના' હેઠળ દેશની સેવા કરી રહેલા લાખો યુવાનો માટે એક ખૂબ જ રાહતભર્યા અને મોટા સમાચાર સામે આવ્યા છે. અગ્નિવીર યોજનાની શરૂઆત થઈ ત્યારે 4 વર્ષના સીમિત કાર્યકાળને લઈને યુવાનોના મનમાં અનેક સવાલો હતા. પરંતુ સમયની સાથે સરકાર અને સંરક્ષણ મંત્રાલયે તેમાં પોઝિટિવ ફેરફારો કરીને તેને સૈનિકો અને દેશ બંને માટે એક શ્રેષ્ઠ મોડલ બનાવી દીધું છે. હવે સરકારે 4 વર્ષનો કાર્યકાળ પૂર્ણ કરનારા જવાનો માટે સેવા વિસ્તરણ (Service Extension) અને ભવિષ્યના વિકલ્પોનો નવો રસ્તો તૈયાર કર્યો છે.

અહેવાલો મુજબ, અગ્નિવીરોએ હવે પોતાનો આગળનો રસ્તો પસંદ કરવા માટે કોઈ ઓફિસના ધક્કા ખાવા પડશે નહીં, પરંતુ તેના માટે ડિજિટલ ટેકનોલોજીનો સહારો લેવામાં આવશે. આ સાથે જ સેનાએ જવાનોના લગ્ન અને રજાઓને લઈને પણ પોતાનું વલણ સ્પષ્ટ કર્યું છે. શરૂઆતના 4 વર્ષના પ્રતિબંધો બાદ હવે જવાનોને મોટી રાહત મળવા જઈ રહી છે અને સેના તરફથી ચાલી રહેલા આઉટરીચ પ્રોગ્રામ દ્વારા જવાનોની દરેક મૂંઝવણ દૂર કરવામાં આવી રહી છે.

4 વર્ષનો પ્રારંભિક કાર્યકાળ પૂર્ણ કરનારા અગ્નિવીરો માટે ભારતીય સેનાએ સમગ્ર પ્રક્રિયાને એકદમ પારદર્શક અને ડિજિટલ બનાવી દીધી છે. જવાનો 'ASAAN' એપ મારફતે પોતાની સંમતિ કે અસંમતિ નોંધાવી શકશે અને તેમની સામે કુલ 4 મુખ્ય વિકલ્પો હશે:

પહેલો વિકલ્પ: સીધા જ પરમેનન્ટ કેડર (કાયમી સેવા) માટે પોતાની સંમતિ આપવી.

બીજો વિકલ્પ: કાયમી કેડરની પસંદગી કરવી અને જો મેરિટના આધારે પ્રથમ 25% કોટામાં નામ ન આવે, તો 2 વર્ષનું વધારાનું સેવા વિસ્તરણ (Extension) પસંદ કરવું.

ત્રીજો વિકલ્પ: માત્ર 2 વર્ષના સેવા વિસ્તરણ (Service Extension) માટે જ હા પાડવી.

ચોથો વિકલ્પ: 4 વર્ષ પૂર્ણ થયા બાદ સેનાની સેવામાંથી બહાર નીકળીને સામાન્ય નાગરિક જીવનમાં આગળ વધવું.

4 વર્ષની સેવા બાદ હવે લગ્ન કરી શકશે અગ્નિવીર

અગ્નિવીરો માટે સૌથી મોટી રાહતના સમાચાર એ છે કે શરૂઆતના 4 વર્ષની સેવા દરમિયાન લગ્ન કરવા પર જે પ્રતિબંધ હતો, તેને હવે 4 વર્ષ પૂરા થયા બાદ હટાવી લેવામાં આવી રહ્યો છે. નવા નિયમો અનુસાર હવે 4 વર્ષનો કાર્યકાળ સફળતાપૂર્વક પૂર્ણ કરનારા અગ્નિવીર લગ્નના બંધનમાં બંધાઈ શકશે. લગ્ન કરવાની આ છૂટ એ જવાનોને પણ મળશે જેમને મેરિટના આધારે કાયમી સેવા (Permanent Service) માટે પસંદ કરવામાં આવશે, અને એ જવાનોને પણ મળશે જેઓ માત્ર 2 વર્ષનું એક્સટેન્શન પસંદ કરશે. આ મોટા બદલાવથી યુવા જવાનોને પોતાના અંગત જીવનના નિર્ણયો લેવામાં સ્વતંત્રતા મળશે.

વાર્ષિક રજાઓ વધારવા અને 'રાષ્ટ્રીય રાઈફલ્સ'માં તૈનાતી પર મંથન

ભારતીય સેના માત્ર કરિયર અને લગ્નના નિયમો પૂરતી જ સીમિત નથી, પરંતુ જવાનોના માનસિક અને શારીરિક સ્વાસ્થ્યને ધ્યાનમાં રાખીને અન્ય નિયમોની પણ સમીક્ષા કરી રહી છે:

રજાઓમાં વધારો: સર્વિસ એક્સટેન્શન દરમિયાન જવાનોની વાર્ષિક રજાઓ (Annual Leaves) વધારવા પર પણ ગંભીર વિચારણા ચાલી રહી છે. હાલમાં શરૂઆતના 4 વર્ષમાં વર્ષે 30 દિવસની રજાઓ નક્કી કરેલી છે.

ઓપરેશનલ યુનિટમાં તૈનાતી: આ ઉપરાંત, કાયમી ધોરણે પસંદ થનારા કેટલાક શ્રેષ્ઠ અને બાહોશ જવાનોને સીધા જ 'રાષ્ટ્રીય રાઈફલ્સ' (RR) જેવા મહત્વના ઓપરેશનલ યુનિટ્સમાં પણ તૈનાત કરવાની સેનાની યોજના છે.

આ પણ વાંચો- સોનાના ભાવમાં 2,810નો મોટો કડાકો અને લાખો લોકોએ બંધ કરી મ્યુચ્યુઅલ ફંડ SIP! જાણો રોકાણકારોએ હવે શું કરવું જોઈએ?