ઝેપ્ટોને મોટો ફટકો: મહારાષ્ટ્ર FDAએ ફૂડ લાયસન્સ સસ્પેન્ડ કર્યું, મુંબઈના ગોદામમાં ગંદકીનો ભંડાર

ક્વિક કોમર્સ પ્લેટફોર્મ ઝેપ્ટોને મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) તરફથી મોટો ઝટકો લાગ્યો છે. મુંબઈના ધારાવી સ્થિત ઝેપ્ટોના ડાર્ક સ્ટોરમાં ફૂડ સેફ્ટી અને સ્વચ્છતા નિયમોનું ઉલ્લંઘન થતું હોવાનું બહાર આવતાં, કંપનીનું ફૂડ બિઝનેસ લાયસન્સ સસ્પેન્ડ કરવામાં આવ્યું છે. આ કાર્યવાહી ઝેપ્ટોની પેરન્ટ કંપની કિરાણાકાર્ટ ટેક્નોલોજીસ પ્રાઇવેટ લિમિટેડ સામે કરવામાં આવી છે. IPOની તૈયારીઓ વચ્ચે આ ઘટના ઝેપ્ટોની બ્રાન્ડ ઈમેજ અને ઇન્વેસ્ટર્સના ભરોસા પર ગંભીર અસર કરી શકે છે.

શું હતી ગંદકીની સ્થિતિ?

મહારાષ્ટ્ર FDAના નિરીક્ષણ દરમિયાન ધારાવીના ડાર્ક સ્ટોરમાં ગંભીર ખામીઓ જોવા મળી. રિપોર્ટ અનુસાર:

- કેટલાક ફૂડ પ્રોડક્ટ્સ પર ફૂગ (fungus) લાગેલી હતી.

- કોલ્ડ સ્ટોરેજનું નિર્ધારિત તાપમાન જાળવવામાં આવ્યું ન હતું.

- એક્સપાયર થયેલી પ્રોડક્ટ્સને અન્ય સ્ટોકથી અલગ રાખવામાં આવી ન હતી.

FDAએ જણાવ્યું કે, “ઝેપ્ટોએ ફૂડ બિઝનેસ લાયસન્સની શરતોનું પાલન કર્યું નથી. જ્યાં સુધી જરૂરી સુધારા ન થાય અને સંતોષકારક પુરાવા ન મળે, ત્યાં સુધી લાયસન્સ સસ્પેન્ડ રહેશે.”

ઝેપ્ટોનો જવાબ

ઝેપ્ટોના પ્રવક્તાએ આ મામલે પ્રતિક્રિયા આપતાં કહ્યું, “અમે ફૂડ સેફ્ટી અને હાઈજીનને સૌથી વધુ પ્રાથમિકતા આપીએ છીએ. અમે આંતરિક તપાસ શરૂ કરી દીધી છે અને FDA સાથે સંપૂર્ણ સહયોગ કરી રહ્યા છીએ. અમારો ઉદ્દેશ્ય ઝડપથી તમામ નિયમોનું પાલન કરીને ઓપરેશન ફરી શરૂ કરવાનો છે.”

ઝેપ્ટોની વધતી મુશ્કેલીઓ

આ કાર્યવાહી એવા સમયે થઈ છે જ્યારે ઝેપ્ટો પહેલેથી જ ઘણી સમસ્યાઓનો સામનો કરી રહી છે. તાજેતરમાં, ઝેપ્ટો કેફેએ ઉત્તર ભારતમાં 44 સ્ટોર્સમાં ઓપરેશન બંધ કર્યું, જેનું કારણ સપ્લાય ચેઈનની મુશ્કેલીઓ અને સ્ટાફની અછત ગણાવવામાં આવ્યું. આ ઉપરાંત, હૈદરાબાદમાં ડિલિવરી પાર્ટનર્સ લગાતાર પાંચમા દિવસે હડતાળ પર છે, જેઓ કંપની પર સેલેરી અને ફાઈનને લઈને મનમાનીનો આરોપ લગાવી રહ્યા છે.

રિપોર્ટ્સ અનુસાર, ઝેપ્ટોનો માસિક એમ્પ્લોઈ ખર્ચ ₹100 કરોડની નજીક પહોંચી ગયો છે, જે ઝોમેટો અને સ્વિગી જેવા મોટા પ્લેયર્સના ખર્ચના લગભગ 80% જેટલો છે.

IPO પહેલાં ચિંતા

ઝેપ્ટો હાલમાં પબ્લિક લિસ્ટિંગની તૈયારીમાં વ્યસ્ત છે અને પોતાને સંપૂર્ણ ભારતીય માલિકીની કંપની બનાવવા માટે ડોમેસ્ટિક ઇન્વેસ્ટમેન્ટ એકત્ર કરી રહી છે. આવા સમયે ફૂડ લાયસન્સનું સસ્પેન્શન અને ઓપરેશનલ સમસ્યાઓ ઝેપ્ટોની વિશ્વસનીયતા અને ઇન્વેસ્ટર્સના ભરોસા પર નકારાત્મક અસર કરી શકે છે.

આ પણ વાંચો- અયોધ્યામાં રામ દરબારની પ્રાણ પ્રતિષ્ઠા: કલશ યાત્રાથી લઈ વૈદિક પૂજા સુધી, જાણો સંપૂર્ણ કાર્યક્રમ