ચીનનો મોટો ધડાકો: પેટ્રોલ-ડીઝલ ગાડીઓ પાછળ રહી ગઈ, EVનું વેચાણ ટોપ પર! જાણો ભારત હજુ કેટલું દૂર?

China EV Sales: ઓટોમોબાઈલ સેક્ટરમાં ચીને એક એવો કમાલ કરી બતાવ્યો છે, જેની ચર્ચા આખી દુનિયામાં થઈ રહી છે. ઈલેક્ટ્રિક વાહનો (EV)ની રેસમાં ચીન ખૂબ આગળ નીકળી ગયું છે. ચીનમાં પહેલીવાર એવું બન્યું છે કે ઈલેક્ટ્રિક કારનું વેચાણ પેટ્રોલ અને ડીઝલથી ચાલતી ગાડીઓ કરતા વધી ગયું હોય. આ બદલાવ દર્શાવે છે કે હવે લોકો પરંપરાગત ઈંધણવાળી ગાડીઓને છોડીને ગ્રીન એનર્જી તરફ વળી રહ્યા છે.

પેટ્રોલ-ડીઝલ ગાડીઓના વેચાણમાં મોટો ઘટાડો

આંકડાઓ પર નજર કરીએ તો, ગત વર્ષે ચીનમાં કુલ 13.1 મિલિયન (1.31 કરોડ) ઈલેક્ટ્રિક ગાડીઓનું વેચાણ થયું હતું. તેની સામે પેટ્રોલ અને ડીઝલ ગાડીઓનું વેચાણ માત્ર 12.3 મિલિયન યુનિટ રહ્યું હતું. તમને જાણીને નવાઈ લાગશે કે પેટ્રોલ-ડીઝલ ગાડીઓના વેચાણનો આ આંકડો છેલ્લા 15 વર્ષમાં સૌથી ઓછો છે.

છેલ્લા એક વર્ષમાં જ પેટ્રોલ-ડીઝલ ગાડીઓના વેચાણમાં 13 ટકાનો ઘટાડો નોંધાયો છે. આ સતત આઠમું વર્ષ છે જ્યારે ચીનમાં પરંપરાગત ઈંધણથી ચાલતી ગાડીઓની ડિમાન્ડ ઘટી રહી છે.

ચીનમાં પેટ્રોલ અને ડીઝલ કારનું માર્કેટ 2017 માં તેની ટોચ (Peak) પર હતું. જોકે, ત્યારથી અત્યાર સુધીમાં તેમાં 49% જેટલો જંગી ઘટાડો આવ્યો છે, એટલે કે લગભગ 11.6 મિલિયન યુનિટ ઓછા વેચાયા છે. નિષ્ણાતોનું માનવું છે કે 2030 સુધીમાં ચીનમાં EV નું વેચાણ વધીને 21.2 મિલિયન યુનિટ સુધી પહોંચી શકે છે. જ્યારે બીજી તરફ, પેટ્રોલ-ડીઝલ કારનું વેચાણ ઘટીને માત્ર 4.9 મિલિયન યુનિટ રહી જવાનો અંદાજ છે.

BYDએ ટેસ્લાને પછાડ્યું

ચીનની સ્થાનિક કંપની BYDએ પણ મોટો ધમાકો કર્યો છે. ગત વર્ષે BYD એ ઉત્પાદનના મામલે દુનિયાના સૌથી ધનિક વ્યક્તિ એલન મસ્કની કંપની 'ટેસ્લા' (Tesla) ને પાછળ છોડી દીધી હતી. જોકે, અહીં એક તફાવત સમજવા જેવો છે કે ટેસ્લા માત્ર ઈલેક્ટ્રિક કાર બનાવે છે, જ્યારે BYD ઈલેક્ટ્રિકની સાથે પ્લગ-ઈન હાઈબ્રિડ કારનું પણ ઉત્પાદન કરે છે.

ભારતની શું છે સ્થિતિ?

ચીનની આ સફળતા સામે ભારતની સરખામણી કરીએ તો, આપણે હજુ ઘણો લાંબો રસ્તો કાપવાનો બાકી છે. ભારતમાં EV માર્કેટ ધીમે-ધીમે વધી રહ્યું છે, પણ ચીનની સરખામણીમાં આંકડા નાના છે.

કુલ વેચાણ: ભારતમાં ગયા વર્ષે 2.3 મિલિયન EV નું વેચાણ થયું હતું, જે કુલ નવા વાહનોના રજિસ્ટ્રેશનમાં માત્ર 8% હિસ્સો ધરાવે છે.

ટુ-વ્હીલરનો દબદબો: ભારતમાં વેચાયેલા કુલ EV માં સૌથી મોટો હિસ્સો ટુ-વ્હીલરનો છે. કુલ વેચાણમાં 1.28 મિલિયન (57%) તો માત્ર બાઈક અને સ્કૂટર હતા.

અન્ય વાહનો: થ્રી-વ્હીલર (રિક્ષા) નો હિસ્સો 35% એટલે કે 8 લાખ યુનિટ હતો, જ્યારે ઈલેક્ટ્રિક કાર માત્ર 1.75 લાખ યુનિટ જ વેચાઈ હતી.

કયા રાજ્યમાં સૌથી વધુ EV?

ભારતમાં ઉત્તર પ્રદેશ (UP) ઈલેક્ટ્રિક વાહનોનું સૌથી મોટું માર્કેટ બની ગયું છે. ત્યાં ગયા વર્ષે 4 લાખથી વધુ EV વેચાયા હતા. જોકે, વસ્તી અને વાહનોના પ્રમાણની દ્રષ્ટિએ દિલ્હી, કેરળ અને ગોવામાં લોકો EV ને ઝડપથી અપનાવી રહ્યા છે.

ટૂંકમાં કહીએ તો, ચીન ઇલેક્ટ્રિક વાહનોની બાબતમાં દુનિયા માટે રોલ મોડલ બની રહ્યું છે, જ્યારે ભારત હવે આ દિશામાં ગતિ પકડી રહ્યું છે. આવનારા વર્ષોમાં ભારતમાં પણ EV ક્રાંતિ જોવા મળી શકે છે.

આ પણ વાંચો- Economic Reforms: શું ભારત-અમેરિકા અને EU ટ્રેડ ડીલ 1991ના સુધારા કરતાં પણ મોટી છે? ટોચના અર્થશાસ્ત્રીએ કર્યો મોટો દાવો