ભારતમાં કોરોનાનું પુનરાગમન: કેરળમાં 430 એક્ટિવ કેસ, કર્ણાટકમાં એકનું મોત, જાણી લો ગુજરાતની સ્થિતિ

Covid-19 in India: ભારતમાં ફરી એકવાર કોરોના વાયરસ (કોવિડ-19)ના કેસમાં ઝડપથી વધારો થઈ રહ્યો છે, જેના કારણે દેશભરમાં ચિંતાનું વાતાવરણ ઊભું થયું છે. આજે દેશમાં કોવિડ-19ના એક્ટિવ કેસની સંખ્યા 1,000ને પાર કરી ગઈ છે. કેરળમાં સૌથી વધુ 430 એક્ટિવ કેસ નોંધાયા છે, જ્યારે કર્ણાટકમાં એક વૃદ્ધ વ્યક્તિનું કોવિડ-19ના કારણે મોત થયું છે. દિલ્હીમાં પણ 100થી વધુ કેસ સામે આવ્યા છે, જેના કારણે સરકાર અને હેલ્થ ડિપાર્ટમેન્ટ સતર્ક થયા છે.

કર્ણાટકમાં કોવિડ-19થી બીજું મોત

કર્ણાટકના બેલગાવી જિલ્લામાં એક 70 વર્ષના વૃદ્ધનું બુધવારે મોડી રાત્રે કોવિડ-19ના કારણે મોત થયું છે. આ વ્યક્તિ બેનકનહલ્લી ગામના રહેવાસી હતા અને વૃદ્ધાવસ્થા સંબંધિત અન્ય બીમારીઓથી પણ પીડાતા હતા. તેમને બેલગાવી ઇન્સ્ટિટ્યૂટ ઓફ મેડિકલ સાયન્સિસના જિલ્લા હોસ્પિટલમાં એડમિટ કરવામાં આવ્યા હતા, જ્યાં તપાસમાં તેમનો કોવિડ રિપોર્ટ પોઝિટિવ આવ્યો હતો. આ પહેલાં 17 મેના રોજ બેંગલુરુની વ્હાઇટફીલ્ડ સ્થિત એક પ્રાઇવેટ હોસ્પિટલમાં 84 વર્ષના એક વૃદ્ધનું મોત થયું હતું, જેમનો કોવિડ રિપોર્ટ પણ પોઝિટિવ હતો. કર્ણાટકના હેલ્થ ડિપાર્ટમેન્ટના જણાવ્યા અનુસાર, 28 મે સુધી રાજ્યમાં 126 એક્ટિવ કેસ છે.

કર્ણાટકના મુખ્યમંત્રી સિદ્ધારમૈયાએ હેલ્થ ડિપાર્ટમેન્ટને ભવિષ્યની કોઈપણ પરિસ્થિતિ માટે તૈયાર રહેવાનો આદેશ આપ્યો છે. હેલ્થ એન્ડ ફેમિલી વેલ્ફેર ડિપાર્ટમેન્ટના પ્રિન્સિપલ સેક્રેટરી હર્ષ ગુપ્તાએ આ મોતની પુષ્ટિ કરી છે.

ગુજરાતમાં કોરોનાની ફરી એક વાર ઘરવાપસી થઈ રહી છે. રાજ્યમાં 190 એક્ટિવ કેસ હતા, જે હવે વધીને 223ને પાર થયા છે. 223 એક્ટિવ કેસમાંથી સૌથી વધુ અમદાવાદમાં 145 કેસ છે જ્યારે રાજકોટ શહેરમાં 23 દર્દી છે. અમદાવાદ સિવિલ હોસ્પિટલમાં 8 માસની બાળકીનો કોવિડ પોઝિટિવ રિપોર્ટ આવ્યો છે, આ બાળકીની અત્યારે ઓક્સિજન સહારે સારવાર ચાલી રહી છે, આ સિવાય સિવિલમાં અન્ય બે દર્દી દાખલ છે જ્યારે સોલા સિવિલ હોસ્પિટલમાં એક સગર્ભા સહિત ત્રણ પોઝિટિવ દર્દી સારવાર હેઠળ છે. આમ બે સિવિલમાં છ દર્દી છે.

દિલ્હીમાં સ્થિતિ નિયંત્રણમાં, સરકાર સતર્ક

દિલ્હીમાં કોવિડ-19ના 104 એક્ટિવ કેસ નોંધાયા છે, જેમાંથી 19 દર્દીઓ હોસ્પિટલમાં એડમિટ છે. મુખ્યમંત્રી રેખા ગુપ્તાએ જણાવ્યું કે સરકાર સંપૂર્ણ રીતે સજ્જ છે અને હોસ્પિટલોમાં બેડ, દવાઓ અને ઓક્સિજનની ઉપલબ્ધતા સુનિશ્ચિત કરવામાં આવી છે. તેમણે લોકોને સતર્ક રહેવા અપીલ કરી છે, પરંતુ ચિંતા ન કરવા જણાવ્યું છે. ગત સપ્તાહે 24 દર્દીઓ સાજા થયા છે, જે સકારાત્મક સમાચાર છે.

કેરળમાં સૌથી વધુ કેસ

કેરળમાં કોવિડ-19ના 430 એક્ટિવ કેસ નોંધાયા છે, જે દેશમાં સૌથી વધુ છે. હેલ્થ ઓથોરિટીઝે જણાવ્યું કે મોટાભાગના દર્દીઓમાં હળવા લક્ષણો જોવા મળ્યા છે, અને સ્થિતિને કાબૂમાં રાખવા માટે પગલાં લેવામાં આવી રહ્યાં છે.

અન્ય રાજ્યોમાં પણ કેસમાં વધારો

ઝારખંડ: રાંચીમાં ગત બે દિવસમાં બે નવા કેસ નોંધાયા, જેનાથી રાજ્યમાં એક્ટિવ કેસની સંખ્યા ત્રણ થઈ. બે દર્દીઓ હોસ્પિટલમાં છે, જ્યારે એક હોમ ક્વોરન્ટાઇનમાં છે.

પશ્ચિમ બંગાળ: પાંચ નવા કેસ સામે આવ્યા, જેમાંથી ત્રણ દર્દીઓની હોમ ટ્રીટમેન્ટ ચાલુ છે, અને બે હોસ્પિટલમાં એડમિટ છે. રાજ્યમાં કુલ 16 એક્ટિવ કેસ છે.

ચંડીગઢ: 40 વર્ષના એક વ્યક્તિનું બુધવારે કોવિડ-19ના કારણે મોત થયું. આ દર્દી ઉત્તર પ્રદેશના ફિરોઝાબાદના રહેવાસી હતા અને શ્વસન સંબંધિત સમસ્યાઓને કારણે લુધિયાણાથી રિફર થયા હતા.

મહારાષ્ટ્ર: ઠાણેના કલ્યાણ-ડોંબિવલી મ્યુનિસિપલ કોર્પોરેશન વિસ્તારમાં એક નવો કેસ અને એક મોતની ખબર છે. હાલમાં આ વિસ્તારમાં 8 એક્ટિવ કેસ છે.

સરકારની તૈયારી અને સાવચેતી

દેશભરની સરકારો અને હેલ્થ ડિપાર્ટમેન્ટ સતર્ક છે અને હોસ્પિટલોમાં પૂરતા પ્રમાણમાં બેડ, દવાઓ અને ઓક્સિજનની વ્યવસ્થા કરવામાં આવી રહી છે. લોકોને માસ્ક પહેરવા, સોશિયલ ડિસ્ટન્સિંગ જાળવવા અને લક્ષણો દેખાય તો તાત્કાલિક તપાસ કરાવવાની સલાહ આપવામાં આવી છે. આ વધતા કેસને ધ્યાનમાં રાખીને, નાગરિકોને સતર્ક રહેવા અને સરકારી ગાઇડલાઇન્સનું પાલન કરવા અપીલ કરવામાં આવે છે.

આ પણ વાંચો- Trump Tariffs: ટેરિફને લઈ કોર્ટમાંથી રાહત મળી, પરંતુ લડાઈ ચાલું રાખશે ટ્રમ્પ