Cyclone threat: ગુજરાતમાં ફરી એકવાર વાવાઝોડાનો ખતરો મંડરાઈ રહ્યો છે. હવામાન વિભાગે અરબ સાગરમાં બની રહેલી વરસાદી સિસ્ટમને લઈને ચેતવણી જારી કરી છે, જે ડિપ્રેશન અથવા વાવાઝોડામાં પરિવર્તિત થઈ શકે છે. આ સંભવિત સંકટને ધ્યાને લઈ રાજ્ય સરકારે તમામ જિલ્લા વહીવટી તંત્રોને હાઈ એલર્ટ પર રહેવા અને 24x7 કંટ્રોલ રૂમ શરૂ કરવા સૂચના આપી છે.
ગુજરાત પર વાવાઝોડાનું સંકટ: રાજ્ય સરકાર એલર્ટ, ભારે વરસાદની આગાહી
Cyclone threat: હવામાન વિભાગ અને રાજ્ય સરકાર સતત આ વરસાદી સિસ્ટમ પર નજર રાખી રહ્યાં છે. જો આ સિસ્ટમ વાવાઝોડામાં પરિવર્તિત થશે, તો ગુજરાતના દરિયાકાંઠાના વિસ્તારોમાં ભારે નુકસાનની શક્યતા છે. રાજ્ય સરકારે લોકોને અફવાઓથી દૂર રહેવા અને માત્ર સત્તાવાર સૂચનાઓનું પાલન કરવા અપીલ કરી છે.
અપડેટેડ 11:31:50 AM May 22, 2025 પર
આ વાવાઝોડાને લઈને દરિયાકાંઠાના વિસ્તારોમાં રહેતા લોકોને ખાસ સાવચેતી રાખવાની સલાહ આપવામાં આવી છે.
વાવાઝોડાની આગાહી અને તૈયારીઓ
હવામાન વિભાગના જણાવ્યા અનુસાર, અરબ સાગરમાં લો પ્રેશરના કારણે રાજ્યના દરિયાકાંઠાના વિસ્તારોમાં ભારે વરસાદ અને તેજ પવનની શક્યતા છે. સુરત, તાપી, વલસાડ, ડાંગ, નવસારી, અમરેલી અને ભાવનગર જિલ્લાઓમાં ખાસ કરીને યલો એલર્ટ જાહેર કરવામાં આવ્યું છે. આ વિસ્તારોમાં 100 કિલોમીટર પ્રતિ કલાકની ઝડપે પવન ફૂંકાઈ શકે છે, જેના કારણે નુકસાનની શક્યતા વધી શકે છે.
મુખ્યમંત્રી ભૂપેન્દ્ર પટેલે ગાંધીનગર ખાતે સ્ટેટ ઇમરજન્સી ઓપરેશન સેન્ટરમાં 24x7 કંટ્રોલ રૂમ કાર્યરત રાખવા અને અસરગ્રસ્ત જિલ્લાઓ સાથે સતત સંપર્કમાં રહેવા આદેશ આપ્યો છે. તેમણે જિલ્લા વહીવટી તંત્રોને સલામતીના પગલાં લેવા અને કોઈપણ પ્રકારની કટોકટી માટે તૈયાર રહેવા પણ સૂચના આપી છે.
પ્રી-મોન્સૂન એક્ટિવિટી અને વરસાદની આગાહી
ગુજરાતમાં નૈઋત્યનું ચોમાસું આવે તે પહેલાં પ્રી-મોન્સૂન એક્ટિવિટી તેજ થઈ રહી છે. હવામાન વિભાગે આગામી 7 દિવસ માટે રાજ્યમાં વરસાદની આગાહી કરી છે, જેમાં 21 મે પછી વરસાદની ગતિમાં વધારો થશે. ખાસ કરીને દરિયાકાંઠાના વિસ્તારોમાં મેઘરાજા મન મૂકીને વરસવાની શક્યતા છે.
ભારે વરસાદના કારણે ઉનાળામાં પણ અષાઢી માહોલ જોવા મળશે. હવામાન નિષ્ણાત અંબાલાલ પટેલે પણ આગાહી કરી છે કે મે મહિનાના અંતમાં ગુજરાતમાં ચક્રવાતનું સંકટ ઊભું થઈ શકે છે. મહારાષ્ટ્ર અને ગોવાની વચ્ચે ચક્રવાત સક્રિય થવાની શક્યતા છે, જેની અસર ગુજરાતના દરિયાકાંઠાના વિસ્તારો પર વધુ જોવા મળશે. 23 મે થી 31 મે સુધી રાજ્યભરમાં માવઠાની સ્થિતિ રહેવાની આગાહી છે.
જનજીવન પર અસર અને સલામતીના પગલાં
આ વાવાઝોડાને લઈને દરિયાકાંઠાના વિસ્તારોમાં રહેતા લોકોને ખાસ સાવચેતી રાખવાની સલાહ આપવામાં આવી છે. રાજ્ય સરકારે જનજીવનને અસર ન થાય તે માટે તમામ જરૂરી તૈયારીઓ શરૂ કરી દીધી છે. માછીમારોને દરિયો ન ખેડવાની અને નીચાણવાળા વિસ્તારોમાં રહેતા લોકોને સલામત સ્થળે જવાની સૂચના આપવામાં આવી શકે છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
