દિલ્હીના કનોટ પ્લેસમાં CJP ના પ્રદર્શનથી વેપારીઓ પરેશાન, સુપ્રીમ કોર્ટે સુનાવણી નકારતા કહ્યું- ‘આશા છે સદ્બુદ્ધિ આવશે'

Supreme Court of India: દિલ્હીના હાર્દ સમાન કનોટ પ્લેસમાં તહેવારોની સિઝન વચ્ચે વિરોધ પ્રદર્શનનો માહોલ ગરમાયો છે. 'કોકરોચ જનતા પાર્ટી' (CJP) દ્વારા અહીં વિરોધ પ્રદર્શનનું એલાન કરવામાં આવ્યું છે. આ સ્થિતિને જોતા નવી દિલ્હી મ્યુનિસિપલ કાઉન્સિલ દ્વારા કનોટ પ્લેસના પ્રખ્યાત સેન્ટ્રલ પાર્કને બંધ કરવાનો આદેશ અપાયો છે. આ આદેશ સામે સુપ્રીમ કોર્ટમાં અરજી કરવામાં આવી હતી, પરંતુ કોર્ટે તેના પર તાત્કાલિક સુનાવણી કરવાનો ઇનકાર કરી દીધો છે.

સુપ્રીમ કોર્ટે શું કહ્યું?

ચીફ જસ્ટિસ ઓફ ઇન્ડિયા (CJI) સૂર્યકાંત અને જસ્ટિસ જોયમાલ્યા બાગચીની બેન્ચે આ મામલે કોઈપણ તાત્કાલિક નિર્દેશ આપવાની ના પાડી દીધી છે. કોર્ટે આશા વ્યક્ત કરી છે કે તમામ સંબંધિત પક્ષોમાં 'સદ્બુદ્ધિ' આવશે અને તેઓ સમજદારીથી કામ લેશે, જેથી સામાન્ય લોકોને કોઈ પણ પ્રકારની પરેશાનીનો સામનો ન કરવો પડે.

દિલ્હી પોલીસે પરવાનગી ન આપી, સેન્ટ્રલ પાર્ક 2 દિવસ માટે બંધ

પરવાનગી રદ: દિલ્હી પોલીસે CJP ને આ માર્ચ માટે મંજૂરી આપી નથી અને લોકોને આનાથી દૂર રહેવા અપીલ કરી છે.

કલમ 163 લાગુ: શાંતિ જાળવવા અને જાહેર મિલકતોના રક્ષણ માટે વિસ્તારમાં ભારતીય નાગરિક સુરક્ષા સંહિતાની કલમ 163 લાગુ કરવામાં આવી છે, જેનાથી લોકોના ભેગા થવા પર પ્રતિબંધ છે.

સેન્ટ્રલ પાર્ક બંધ: NDMC એ વહીવટી કારણોસર સેન્ટ્રલ પાર્કને શુક્રવાર અને શનિવાર એમ 2 દિવસ માટે સામાન્ય જનતા માટે બંધ કરી દીધો છે.

જોકે, પોલીસે એમ પણ કહ્યું છે કે તેઓ એક નાનકડા ગ્રુપને કોઈ યોગ્ય સ્થળે રાષ્ટ્રધ્વજ ફરકાવવા અને રાષ્ટ્રગીત ગાવાની મંજૂરી આપી શકે છે. અગાઉ સીજેપી નેતા સૌરવ દાસ અને આશુતોષ રાંકા જંતર-મંતર પહોંચ્યા ત્યારે તેમની ધરપકડ કરી લેવાઈ હતી અને તેમને 5 દિવસની જ્યુડિશિયલ કસ્ટડીમાં મોકલી દેવાયા હતા.

વેપારીઓની ચિંતા: "અમારો આજ બરબાદ ન કરો"

તહેવારોની સિઝનમાં પ્રદર્શન થવાથી કનોટ પ્લેસના વેપારીઓ ભારે ચિંતિત છે. 'ન્યૂ દિલ્હી ટ્રેડર્સ એસોસિએશન' (NDTA) એ રાજકીય પક્ષો અને પ્રદર્શનકારીઓને ખાસ અપીલ કરી છે.

સોશિયલ મીડિયા પ્લેટફોર્મ 'X' પર પોસ્ટ શેર કરતા વેપારી સંગઠને લખ્યું કે, "અમે તમારા વિરોધ કરવાના અને અવાજ ઉઠાવવાના અધિકારનું સન્માન કરીએ છીએ, પરંતુ કનોટ પ્લેસ તમારું મંચ નથી, તે અમારું કાર્યસ્થળ છે. તમે આવતીકાલને સુધારવા પ્રદર્શન કરો છો, પણ તેમાં અમારો આજ બરબાદ ન કરો." વેપારીઓએ અપીલ કરી છે કે કનોટ પ્લેસની જીવંતતા જાળવી રાખો અને વિરોધ પ્રદર્શન માટે અન્ય કોઈ જગ્યા પસંદ કરો.

આ પણ વાંચો-SIR પછી હવે ચૂંટણી પંચ લાવ્યું SSR: જાણો મતદાર યાદીમાં શું થશે ફેરફાર અને નવા નિયમો

એક તરફ વિરોધ પ્રદર્શન કરવાનો અધિકાર છે, તો બીજી તરફ તહેવારોમાં વેપારીઓની રોજીરોટીનો સવાલ છે. હવે જોવું એ રહેશે કે સુપ્રીમ કોર્ટની આશા મુજબ પ્રદર્શનકારીઓ સદ્બુદ્ધિ વાપરીને શાંતિ જાળવે છે કે કેમ.