Gujarat Weather: ગુજરાતમાં આજે વરસાદની આગાહી, અમદાવાદમાં ગરમી ઘટી, જાણો IMDનું લેટેસ્ટ અપડેટ

Gujarat Weather: ગુજરાતમાં ઉનાળાની ગરમી હવે ધીમે ધીમે ઘટી રહી છે, અને ચોમાસાના આગમન પહેલા રાજ્યના હવામાનમાં મોટો ફેરફાર જોવા મળી રહ્યો છે. ભારતીય હવામાન વિભાગ (IMD)એ આજે શુક્રવાર, 30 મેના રોજ રાજ્યના અનેક વિસ્તારોમાં વરસાદની આગાહી કરી છે.

વરસાદની આગાહી

IMDના લેટેસ્ટ અપડેટ પ્રમાણે, આજે ગુજરાતના ઘણા વિસ્તારોમાં ગાજવીજ સાથે વરસાદની આગાહી છે. ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા, અરવલ્લી જેવા જિલ્લાઓમાં ગાજવીજ સાથે હળવો વરસાદ પડી શકે છે. આ ઉપરાંત, ગાંધીનગર, ખેડા, અમદાવાદ, આણંદ, પંચમહાલ, દાહોદ અને મહિસાગરમાં 40-50 કિલોમીટર પ્રતિ કલાકની ઝડપે પવન સાથે વરસાદની શક્યતા છે.

ગરમીમાં રાહત, અમદાવાદમાં તાપમાન ઘટ્યું

ગુજરાતમાં ઉનાળાની સીઝન હવે લગભગ પૂરી થઈ રહી છે. રાજ્યના મોટાભાગના વિસ્તારોમાં મહત્તમ તાપમાન 38 ડિગ્રીની આસપાસ રહ્યું છે, જ્યારે કેટલાક શહેરોમાં તે 41 ડિગ્રી સુધી પહોંચ્યું હતું. અમદાવાદમાં મહત્તમ તાપમાન ઘટીને 36.9 ડિગ્રી નોંધાયું, જે ગરમીમાં રાહત આપનારું છે. ગાંધીનગરમાં 36.6 ડિગ્રી, વડોદરામાં 34.6 ડિગ્રી અને સુરતમાં 33.8 ડિગ્રી તાપમાન નોંધાયું.

રાજકોટ રાજ્યનું સૌથી ગરમ શહેર રહ્યું, જ્યાં મહત્તમ તાપમાન 41 ડિગ્રી નોંધાયું, જ્યારે દ્વારકામાં સૌથી ઓછું 32.4 ડિગ્રી તાપમાન રહ્યું. ભૂજમાં 38.6 ડિગ્રી, ભાવનગરમાં 39.5 ડિગ્રી અને સુરેન્દ્રનગરમાં 40.9 ડિગ્રી તાપમાન નોંધાયું.

શું છે આગળની આગાહી?

IMDના જણાવ્યા પ્રમાણે, ચોમાસાની શરૂઆત પહેલા રાજ્યમાં હળવા વરસાદનો માહોલ રહેશે. આગામી દિવસોમાં પણ ગુજરાતના અલગ-અલગ વિસ્તારોમાં વરસાદની શક્યતા છે, જે ખેડૂતો અને સામાન્ય લોકો માટે રાહતના સમાચાર છે.

આ પણ વાંચો- ભારતમાં કોરોનાનું પુનરાગમન: કેરળમાં 430 એક્ટિવ કેસ, કર્ણાટકમાં એકનું મોત, જાણી લો ગુજરાતની સ્થિતિ