ભારતમાં જન્મેલા નિત્યા રમન બન્યા લોસ એન્જલસના મેયર! અમેરિકામાં મોટો ઉલટફેર, 20 વર્ષ બાદ વર્તમાન મેયરની થઈ હાર

Nithya Raman Los Angeles Mayor: અમેરિકાના પ્રખ્યાત શહેર લોસ એન્જલસના મેયર પદની ચૂંટણીમાં મોટો ઉલટફેર જોવા મળ્યો છે. ભારતમાં જન્મેલા અને ભારતીય મૂળના નિત્યા રમન (Nithya Raman) લોસ એન્જલસના નવા મેયર તરીકે ચૂંટાઈ આવ્યા છે. તેમણે વર્તમાન મેયર કરેન બેસને હાર આપી છે. આ શાનદાર જીત સાથે જ નિત્યા રમન લોસ એન્જલસ શહેરના પ્રથમ દક્ષિણ એશિયન મેયર બની ગયા છે. ખાસ વાત એ છે કે આશરે 20 વર્ષ બાદ એવું બન્યું છે જ્યારે કોઈ વર્તમાન મેયરને ચૂંટણીમાં હારનો સામનો કરવો પડ્યો હોય.

અહેવાલ મુજબ, 45 વર્ષીય નિત્યા રમન અત્યાર સુધી લોસ એન્જલસ સિટી કાઉન્સિલના સભ્ય હતા. તેમણે આ ચૂંટણીમાં શહેરની જૂની અને પાયાની સમસ્યાઓને જ પોતાનો સૌથી મોટો ચૂંટણી મુદ્દો બનાવ્યો હતો. જેમાં બેઘર લોકોની વધતી સંખ્યા, સસ્તા મકાનોની અછત તેમજ ખરાબ રસ્તાઓ અને ફૂટપાથ જેવી પ્રાથમિક સુવિધાઓનો સમાવેશ થતો હતો.

નિત્યા રમનનો જન્મ ભારતમાં થયો હતો. જ્યારે તેઓ માત્ર 6 વર્ષના હતા ત્યારે પોતાના પરિવાર સાથે અમેરિકા આવી ગયા હતા. તેમણે વિશ્વની ટોચની શિક્ષણ સંસ્થાઓ હાર્વર્ડ (Harvard) અને MIT માંથી અભ્યાસ કર્યો છે. વર્ષ 2020 માં તેઓ લોસ એન્જલસ સિટી કાઉન્સિલમાં પહોંચ્યા હતા અને તે સમયે પણ આ પદ સુધી પહોંચનારા તેઓ પ્રથમ દક્ષિણ એશિયન મહિલા બન્યા હતા. હવે મેયર બનીને તેમણે ફરી એકવાર નવો ઇતિહાસ રચી દીધો છે.

કરેન બેસની હાર પાછળના મુખ્ય કારણો

કરેન બેસ વર્ષ 2022 માં લોસ એન્જલસના મેયર બન્યા હતા. તેમના કાર્યકાળ દરમિયાન શહેરમાં બેઘર લોકોની સમસ્યા સતત વધતી ગઈ હતી. આ ઉપરાંત, જાન્યુઆરી 2025 માં લાગેલી પેલિસેડ્સની આગ (Palisades Fire) મામલે પણ તેમની ખૂબ જ ટીકા થઈ હતી, કારણ કે તે સમયે તેઓ દેશની બહાર હતા. જનતાની આ નારાજગીની સીધી અસર ચૂંટણીના પરિણામો પર પડી છે.

કયા મુદ્દાઓ અને વચનોથી મળી જીત?

નિત્યા રમને ચૂંટણીમાં બેઘર લોકોની સમસ્યાને સૌથી મોટો મુદ્દો બનાવ્યો હતો. તેમણે સ્પષ્ટ કહ્યું હતું કે માત્ર કામચલાઉ વ્યવસ્થા કરવાથી કામ નહીં ચાલે, પરંતુ બેઘર લોકોને મેડિકલ મદદ અને ધીમે-ધીમે પાકું ઘર આપવું પડશે. તેમણે શહેરમાં સસ્તા મકાનો વધારવાનું તેમજ રસ્તા, ફૂટપાથ અને સ્ટ્રીટ લાઈટ જેવી પાયાની વસ્તુઓ સુધારવાનું વચન આપ્યું છે. વર્ષ 2028 માં યોજાનારી ઓલિમ્પિક રમતો પહેલાં ખુલ્લામાં રહેતા બેઘર લોકોની સંખ્યા અડધી કરવાનો લક્ષ્યાંક પણ તેમણે રાખ્યો છે.

ટપાલ મતોથી બાજી પલટાઈ, કરેન બેસે ફોન કરીને પાઠવી શુભેચ્છા

મતગણતરીની શરૂઆતમાં નિત્યા રમન પાછળ ચાલી રહ્યા હતા, પરંતુ ટપાલ દ્વારા આવેલા મતોની ગણતરી થયા બાદ તેઓ આગળ નીકળી ગયા હતા. અંતિમ ગણતરીમાં નિત્યા રમનને આશરે 52% અને કરેન બેસને 48% મત મળ્યા હતા.

આ પણ વાંચો- Crude Oilના ભાવમાં મોટો કડાકો! મોંઘવારીથી મળશે મોટી રાહત, ડિસેમ્બરમાં RBI વ્યાજ દર અંગે લઈ શકે છે આ નિર્ણય

ચૂંટણીના પરિણામો આવ્યા બાદ કરેન બેસે પોતાની હાર સ્વીકારી લીધી હતી. તેમણે નિત્યા રમનને ફોન કરીને જીત બદલ અભિનંદન પાઠવ્યા હતા અને સત્તા સોંપવાની પ્રક્રિયામાં સંપૂર્ણ સહયોગ આપવાની ખાતરી આપી હતી. હવે નવા મેયર તરીકે નિત્યા રમન સામે પોતાના ચૂંટણી વચનો પૂરા કરવાનો મોટો પડકાર રહેશે.