બ્રિક્સ અને G7 વચ્ચે ભારત બનશે 'બ્રિજ': ટ્રમ્પની દાદાગીરી સામે ફ્રાંસના રાષ્ટ્રપતિ મેક્રોને ભારત પર મૂક્યો ભરોસો

India France Relations: વિશ્વના રાજકારણમાં અત્યારે ભારે ઉથલપાથલ ચાલી રહી છે ત્યારે ફ્રાંસના રાષ્ટ્રપતિ ઇમેન્યુઅલ મેક્રોને ભારત અંગે એક ખૂબ જ મોટું અને મહત્વપૂર્ણ નિવેદન આપ્યું છે. પોતાની વાર્ષિક એમ્બેસેડર્સ કોન્ફરન્સમાં બોલતા મેક્રોને એક તરફ ભારત સાથેની મિત્રતાને નવી ઊંચાઈએ લઈ જવાની વાત કરી છે, તો બીજી તરફ અમેરિકા અને તેના પ્રમુખ ડોનાલ્ડ ટ્રમ્પની નીતિઓની ઝાટકણી કાઢી છે. મેક્રોનના મતે, બદલાતી દુનિયામાં ભારત એક અત્યંત મહત્વની ભૂમિકા ભજવવા જઈ રહ્યું છે.

ભારત: ફ્રાંસનો સૌથી ભરોસાપાત્ર અને 'સોલિડ' સાથી

રાષ્ટ્રપતિ મેક્રોને ભારતને ફ્રાંસનો 'અભૂતપૂર્વ અને સોલિડ પાર્ટનર' ગણાવ્યો છે. તેમણે સ્પષ્ટ કર્યું કે બંને દેશો વચ્ચેના સંબંધો માત્ર વાતો પૂરતા નથી, પરંતુ જમીની સ્તરે મજબૂત છે. આ મિત્રતાને વધુ ગાઢ બનાવવા માટે મેક્રોને આવતા મહિને ભારતની મુલાકાત લેવાની જાહેરાત પણ કરી છે.

મેક્રોનનું માનવું છે કે અત્યારે દુનિયાના નિયમો અને ગવર્નન્સમાં સુધારાની જરૂર છે. આ કામમાં ભારતની ભૂમિકા નિર્ણાયક રહેશે. ખાસ કરીને ભારત બ્રિક્સ (BRICS) ના અધ્યક્ષ તરીકે પશ્ચિમી દેશોના ગ્રુપ G7 અને અન્ય દેશો વચ્ચે એક મજબૂત 'બ્રિજ' (સેતુ) બની શકે છે. ભારત ધારે તો વૈશ્વિક વિવાદો ઉકેલવામાં મોટી મદદ કરી શકે છે.

સંરક્ષણ અને સુરક્ષા (Defence & Security)

આર્ટિફિશિયલ ઇન્ટેલિજન્સ (AI)

ક્લાયમેટ ચેન્જ (પર્યાવરણ સુરક્ષા)

અમેરિકાની 'દાદાગીરી' પર મેક્રોન લાલઘૂમ

ભારતના વખાણ કરવાની સાથે મેક્રોને અમેરિકાની વર્તમાન નીતિઓ પર આકરા પ્રહારો કર્યા હતા. તેમણે કહ્યું હતું કે અમેરિકા હવે એ રસ્તે જઈ રહ્યું છે જ્યાં તે પોતાના જ બનાવેલા આંતરરાષ્ટ્રીય નિયમો તોડી રહ્યું છે. મેક્રોને ગંભીર ચિંતા વ્યક્ત કરતા કહ્યું કે, "અમેરિકા તેના જૂના અને વિશ્વાસુ સાથીદારોથી દૂર ભાગી રહ્યું છે. વ્યાપાર હોય કે સુરક્ષા, અમેરિકા હવે વૈશ્વિક નિયમોમાંથી પોતાને આઝાદ કરી રહ્યું છે, જે દુનિયા માટે જોખમી છે. પોતાના સ્વાર્થ માટે અમેરિકા વર્ષો જૂની રાજદ્વારી પરંપરાઓ અને શિષ્ટાચારને પણ નેવે મૂકી રહ્યું છે."

ગ્રીનલેન્ડ અને કેનેડા મામલે અમેરિકાને ટોણો

ટ્રમ્પ વહીવટીતંત્ર દ્વારા તાજેતરમાં ગ્રીનલેન્ડ પર કબજો મેળવવા માટે જે લશ્કરી કાર્યવાહીના સંકેતો અપાયા હતા અને પાડોશી દેશ કેનેડાને જે રીતે ધમકીઓ આપવામાં આવી હતી, તેના પર મેક્રોને સવાલો ઉઠાવ્યા હતા. તેમણે પૂછ્યું કે, "શું આપણે એવા યુગમાં જીવીએ છીએ જ્યાં માત્ર તાકાતના જોરે કોઈ દેશ પર ચડાઈ કરી શકાય?"

મેક્રોને અમેરિકાના આ વલણને 'નિયો-કોલોનિયલ એગ્રેશન' (નવ-સંસ્થાનવાદી આક્રમકતા) ગણાવ્યું છે. એટલે કે, આધુનિક સમયમાં પણ અન્ય દેશોની જમીન હડપવી તે આંતરરાષ્ટ્રીય કાયદાનું ઉલ્લંઘન છે.

ચીન અને યુએન (UN) અંગે મહત્વની વાત

મેક્રોને ચીનની વિસ્તારવાદી નીતિ અંગે પણ વાત કરી હતી. તેમણે કહ્યું કે ચીનની વ્યાપારી આક્રમકતા યુરોપના અર્થતંત્રને નબળું પાડી રહી છે. દુનિયામાં ફરીથી દેશોને ગુલામ બનાવવાની પ્રક્રિયા (Re-colonization) શરૂ થઈ હોય તેવું લાગે છે. આ અરાજકતા રોકવા માટે તેમણે સંયુક્ત રાષ્ટ્ર (UN) ને વધુ શક્તિશાળી અને મજબૂત બનાવવાની હિમાયત કરી હતી.

ટૂંકમાં, મેક્રોનનું આ નિવેદન સાબિત કરે છે કે યુરોપ હવે અમેરિકા પર આંખ બંધ કરીને ભરોસો કરવા તૈયાર નથી અને તે ભારત જેવા મજબૂત લોકશાહી દેશમાં એક સાચો મિત્ર જોઈ રહ્યું છે. આવનારા સમયમાં ભારતની ભૂમિકા વિશ્વ મંચ પર વધુ પ્રભાવી બનશે તે નક્કી છે.

આ પણ વાંચો- SBI Special FD Schemes: SBIની આ 4 સ્પેશિયલ FD સ્કીમમાં પૈસા રોકશો તો થશે જબરદસ્ત નફો, શું તમે જાણો છો આ ખાસ નિયમો?