Iran Crisis: ઈઝરાયલ માટે નવા સંકટના એંધાણ! 8 મુસ્લિમ દેશો એક થયા, વેસ્ટ બેન્ક મુદ્દે મોરચો માંડ્યો

Israel-Palestine Conflict: મધ્ય પૂર્વમાં ચાલી રહેલા તણાવ વચ્ચે ઈઝરાયલ માટે એક ચિંતાજનક સમાચાર સામે આવ્યા છે. ઈરાન સાથેના સંકટની વચ્ચે હવે 8 મુખ્ય મુસ્લિમ દેશોએ ઈઝરાયલ વિરુદ્ધ એક થઈને અવાજ ઉઠાવ્યો છે. 9 ફેબ્રુઆરીના રોજ એક સંયુક્ત નિવેદન જાહેર કરીને આ દેશોએ ઈઝરાયલની વેસ્ટ બેન્કમાં ચાલી રહેલી ગતિવિધિઓનો સખત વિરોધ નોંધાવ્યો છે.

આ વિરોધ કરનારા દેશોમાં પાકિસ્તાન, ઇજિપ્ત, જોર્ડન, યુએઈ (UAE), ઇન્ડોનેશિયા, તૂર્કીયે, સાઉદી અરેબિયા અને કતારનો સમાવેશ થાય છે. આ દેશોનો મુખ્ય આરોપ છે કે ઈઝરાયલ ‘સતત વિસ્તારવાદી નીતિ' અપનાવી રહ્યું છે, જે હવે અટકવી જોઈએ.

શું છે વેસ્ટ બેન્કનો વિવાદ?

સામાન્ય રીતે લોકો પેલેસ્ટાઇનને માત્ર ગાઝા સાથે જોડીને જુએ છે, પરંતુ ભૌગોલિક રીતે પેલેસ્ટાઇનના બે મુખ્ય ભાગ છે:

વેસ્ટ બેન્ક (West Bank): આ બીજો મહત્વનો વિસ્તાર છે. અહીં કોઈ યુદ્ધ નથી ચાલી રહ્યું, પરંતુ મુસ્લિમ દેશોનો આરોપ છે કે ઈઝરાયલ અહીં ધીમે-ધીમે પોતાની પકડ મજબૂત કરી રહ્યું છે. ઈઝરાયલ અહીં નવી યહૂદી વસાહતો (Settlements) બનાવી રહ્યું છે અને ત્યાંના મૂળ પેલેસ્ટિનીઓને હટાવીને પોતાની સાર્વભૌમત્વ જમાવવાનો પ્રયાસ કરી રહ્યું છે.

મુસ્લિમ દેશો કેમ વિરોધ કરી રહ્યા છે?

સાઉદી અરેબિયા અને યુએઈ જેવા શક્તિશાળી દેશોનું માનવું છે કે ઈઝરાયલની આ કાર્યવાહી ભવિષ્ય માટે ખતરનાક છે. તેમના વિરોધના મુખ્ય કારણો નીચે મુજબ છે:

સ્વતંત્ર પેલેસ્ટાઇનનું સપનું રોળાઈ જશે: જો ઈઝરાયલ વેસ્ટ બેન્કની જમીન પર સતત કબજો કરતું રહેશે અને ત્યાં યહૂદી વસાહતો વધારશે, તો ભવિષ્યમાં 'સ્વતંત્ર પેલેસ્ટાઇન દેશ' બનાવવો ભૌગોલિક રીતે અશક્ય બની જશે.

નવા નિયમોનો વિરોધ: ઈઝરાયલની સુરક્ષા કેબિનેટે હાલમાં જ કેટલાક જૂના નિયમો બદલ્યા છે. નવા ફેરફાર મુજબ, હવે યહૂદી નાગરિકો વેસ્ટ બેન્કમાં ખાનગી રીતે જમીન ખરીદી શકશે. મુસ્લિમ દેશોએ આને આંતરરાષ્ટ્રીય કાયદાનું ઉલ્લંઘન ગણાવ્યું છે.

ટુ-સ્ટેટ સોલ્યુશન પર ખતરો: દુનિયાભરના દેશો માને છે કે શાંતિ માટે 'ટુ-સ્ટેટ સોલ્યુશન' (એટલે કે ઈઝરાયલ અને પેલેસ્ટાઇન એમ બે અલગ દેશ) જ એકમાત્ર રસ્તો છે, પરંતુ ઈઝરાયલની હાલની નીતિ આ રસ્તામાં સૌથી મોટો અવરોધ છે.

આંતરરાષ્ટ્રીય કાયદો શું કહે છે?

સંયુક્ત રાષ્ટ્ર (UN) અને આંતરરાષ્ટ્રીય અદાલત (ICJ) સ્પષ્ટપણે માને છે કે 1967ના યુદ્ધ પછી ઈઝરાયલે વેસ્ટ બેન્ક પર જે કબજો કર્યો છે તે વિસ્તારમાં વસાહતો બનાવવી ગેરકાયદેસર છે.

આ 8 દેશોના વિદેશ મંત્રીઓએ સંયુક્ત રાષ્ટ્ર સુરક્ષા પરિષદના પ્રસ્તાવ નંબર 2334 અને 2024માં ICJ એ આપેલી સલાહનો સંદર્ભ આપતા કહ્યું છે કે, ઈઝરાયલની આ હરકતો ગેરકાયદેસર છે અને તેને તાત્કાલિક રોકવી જોઈએ.

શાંતિ માટે અપીલ

આ સંયુક્ત નિવેદનમાં આંતરરાષ્ટ્રીય સમુદાયને વિનંતી કરવામાં આવી છે કે તેઓ માત્ર પ્રેક્ષક બનીને ના રહે, પરંતુ પોતાની નૈતિક જવાબદારી નિભાવે. ઈઝરાયલને વેસ્ટ બેન્કમાં તણાવ વધારતા રોકવું ખૂબ જરૂરી છે.

અંતમાં, આ મુસ્લિમ દેશોએ સ્પષ્ટ કર્યું છે કે કાયમી શાંતિ ત્યારે જ શક્ય છે જ્યારે પેલેસ્ટાઇનના લોકોને તેમનો સ્વતંત્ર દેશ મળે. ઉલ્લેખનીય છે કે, આ એ જ આઠ દેશોનું ગ્રુપ છે જે અગાઉ ગાઝા યુદ્ધ રોકવા માટે અમેરિકાના ટ્રમ્પ પ્રશાસન સાથે મળીને પણ કામ કરી ચૂક્યું છે. હવે જોવાનું એ રહે છે કે ઈઝરાયલ અને અમેરિકા આ નવા વિરોધ પર શું પ્રતિક્રિયા આપે છે.

આ પણ વાંચો- Budget Session 2026: લોકસભા સ્પીકર ઓમ બિરલાને લઈ વિરોધ પક્ષ નારાજ, અવિશ્વાસ પ્રસ્તાવ લાવવાની તૈયારી