TRAIનો મોટો આદેશ: ડેટા વિનાના સસ્તા રિચાર્જ પ્લાન ફરજિયાત, માત્ર કોલિંગ અને SMS વાળા ગ્રાહકોને થશે બમ્પર ફાયદો!

TRAI new rules: મોબાઇલ યુઝર્સ માટે એક ખૂબ જ સારા અને રાહતના સમાચાર સામે આવ્યા છે. ટેલિકોમ રેગ્યુલેટરી ઓથોરિટી ઓફ ઇન્ડિયા એ એક મોટો અને ઐતિહાસિક નિર્ણય લીધો છે. હવે તમારે જો ઇન્ટરનેટની જરૂર ન હોય, તો પરાણે મોંઘા ડેટાવાળા રિચાર્જ કરાવવા નહીં પડે.

શું છે TRAI નો નવો નિયમ?

TRAI દ્વારા ટેલિકોમ કન્ઝ્યુમર પ્રોટેક્શન તેરમું સંશોધન- રેગ્યુલેશન, 2026 બહાર પાડવામાં આવ્યું છે. આ નવા નિયમ હેઠળ, તમામ ટેલિકોમ કંપનીઓ માટે હવે એવા રિચાર્જ પ્લાન લાવવા ફરજિયાત બની ગયું છે જેમાં માત્ર કોલિંગ અને SMS ની જ સુવિધા હોય. એટલે કે, આ પ્લાનમાં ઇન્ટરનેટ ડેટા નહીં હોય. TRAI ના ધ્યાનમાં આવ્યું હતું કે માર્કેટમાં આવા પ્લાનની ભારે અછત હતી અને ગ્રાહકોને નાછૂટકે ડેટાવાળા મોંઘા પ્લાન લેવા પડતા હતા, તેથી આ કડક પગલું લેવાયું છે.

30 દિવસની વેલિડિટી અને ફિક્સ તારીખની સુવિધા

ટૂંકી વેલિડિટી: જે ગ્રાહકોને 30 દિવસ કે તેથી ઓછી વેલિડિટી વાળું રિચાર્જ જોઈએ છે, તેમના માટે કંપનીઓએ Voice અને SMS પ્લાન આપવા જ પડશે.

ફિક્સ તારીખે રિન્યુ: ગ્રાહકોને એક એવો વિકલ્પ પણ મળશે જેમાં તેઓ દર મહિને એક નક્કી કરેલી તારીખે જ પોતાનું રિચાર્જ રિન્યુ કરાવી શકશે. આનાથી ગ્રાહકોને વારંવાર અલગ-અલગ તારીખે રિચાર્જ કરાવવાની ઝંઝટમાંથી કાયમી મુક્તિ મળશે.

લાંબી વેલિડિટી: 30 દિવસથી વધુ વેલિડિટી જોઈતી હોય તેવા ગ્રાહકો માટે પણ ઓછામાં ઓછો એક 'Voice અને SMS Only' પ્લાન કંપનીઓએ માર્કેટમાં મૂકવો પડશે.

TRAI એ સ્પષ્ટ સૂચના આપી છે કે આ ડેટા વગરના પ્લાનની કિંમતમાં યોગ્ય ઘટાડો કરવામાં આવે, જેથી તે ડેટાવાળા પ્લાન કરતા ગ્રાહકોને ઘણા સસ્તા પડે.

કોને થશે સૌથી મોટો ફાયદો?

વડીલો અને સિનિયર સિટીઝન: જેઓ સ્માર્ટફોન કે ઇન્ટરનેટનો ઉપયોગ નથી કરતા, તેમને હવે મોંઘા રિચાર્જનો ખોટો ખર્ચ નહીં કરવો પડે.

ઓછી આવક ધરાવતો વર્ગ: જે લોકો માત્ર ફોન પર વાત કરવા પૂરતો જ મોબાઇલ વાપરે છે, તેમના બજેટમાં આ નિર્ણયથી મોટી રાહત થશે.

ફીચર ફોન યુઝર્સ: જેઓ પાસે હજુ પણ કીપેડ વાળો બેઝિક ફોન છે, તેમના માટે આ પ્લાન આશીર્વાદરૂપ સાબિત થશે.

TRAI એ જણાવ્યું છે કે આ નિયમનો ડ્રાફ્ટ પહેલા લોકો સમક્ષ મૂકવામાં આવ્યો હતો, જેના પરથી કુલ 1132 જેટલી પ્રતિક્રિયાઓ અને સૂચનો મળ્યા હતા. લોકોના આ જ પ્રતિભાવોના આધારે આ અંતિમ નિર્ણય લેવામાં આવ્યો છે. આ નવા નિયમથી ગ્રાહકોને હવે કોઈ કંપની મોંઘા પ્લાન લેવા માટે મજબૂર નહીં કરી શકે અને તેઓ પોતાના બજેટ મુજબ સાચો પ્લાન પસંદ કરી શકશે.

આ પણ વાંચો -  સુરતથી ચેન્નઈ માત્ર 16 કલાકમાં! 900 કિમી લાંબો નવો હાઈ-સ્પીડ એક્સપ્રેસ વે ગુજરાતને 5 રાજ્યો સાથે સીધો જોડશે