ટ્રમ્પ વિરુદ્ધ અમેરિકામાં પ્રચંડ દેખાવો: 'ઈમ્પીચ, કન્વિક્ટ, રિમૂવ'ના નારા, કોંગ્રેસમેને ક્રિસમસ પહેલા મહાભિયોગની કરી જાહેરાત

Remove the Regime, Trump protests: મેરિકાના રાજકીય માહોલમાં તાજેતરમાં ફરી એકવાર જોરદાર ગરમાવો આવ્યો છે. રાષ્ટ્રપતિ ડોનાલ્ડ ટ્રમ્પને સત્તા પરથી દૂર કરવાની માંગ સાથે વોશિંગ્ટન DCમાં 22 નવેમ્બર, શનિવારના રોજ મોટા પાયે વિરોધ પ્રદર્શનો થયા હતા. 'રિમૂવલ કોએલિશન' નામના ગ્રાસરુટ ગ્રુપ દ્વારા 'Remove the Regime' શીર્ષક હેઠળ આયોજિત આ વિશાળ રેલીમાં મોટી સંખ્યામાં દેખાવકારો એકઠા થયા હતા. આ રેલીમાં પ્રમુખ ડોનાલ્ડ ટ્રમ્પને તેમના પદ પરથી દૂર કરવા માટે 'ઈમ્પીચ, કન્વિક્ટ એન્ડ રિમૂવ' મહાભિયોગ ચલાવો, દોષિત ઠેરવો અને દૂર કરોના જોરદાર નારા લગાવવામાં આવ્યા હતા, જેણે રાજકીય વર્તુળોમાં ભારે હલચલ મચાવી દીધી છે.

કોંગ્રેસમેને ક્રિસમસ પહેલા કાર્યવાહીની કરી જાહેરાત

આ મહત્વપૂર્ણ રેલીમાં ટેક્સાસના કોંગ્રેસમેન અલ ગ્રીન અને ભૂતપૂર્વ મેટ્રો પોલીસ અધિકારી માઈકલ ફેનન સહિત અનેક જાણીતા વ્યક્તિઓ ઉપસ્થિત રહ્યા હતા. યુનાઇટેડ સ્ટેટ્સના પ્રતિનિધિ અલ ગ્રીને રેલીમાં સ્પષ્ટપણે જાહેરાત કરી હતી કે ક્રિસમસ પર્વ પહેલા ડોનાલ્ડ ટ્રમ્પ સામે મહાભિયોગના લેખ Articles of Impeachment દાખલ કરવામાં આવશે. તેમણે પોતાના સંબોધનમાં ભારપૂર્વક કહ્યું હતું કે, “પરિસ્થિતિ સુધરી રહી નથી, બલ્કે વધુ ખરાબ થઈ રહી છે. આપણે તેમને દોષિત ઠેરવવા જોઈએ, તેમના પર મહાભિયોગ ચલાવવો જોઈએ, અને તેમને પદ પરથી દૂર કરવા જોઈએ... જેથી ભવિષ્યમાં કોઈ પણ સરમુખત્યારશાહી નેતા સરકાર પર કબજો જમાવવાનું વિચારી પણ ન શકે.”

આ ઉપરાંત, પૂર્વ મેટ્રો પોલીસ અધિકારી માઈકલ ફેનને પણ જણાવ્યું હતું કે, “અમેરિકન વસ્તીનો એક મોટો ભાગ હવે અવગણના સહન કરવા તૈયાર નથી. અમે વર્તમાન વહીવટથી કંટાળી ગયા છીએ.” રેલીના કાર્યક્રમ સમાપ્ત થયા બાદ, વિરોધ પ્રદર્શન કરનારાઓએ વોશિંગ્ટનના ઐતિહાસિક નેશનલ મોલ નજીકના વિસ્તારમાં એક વિશાળ રેલી પણ કાઢી હતી.

યુનાઇટેડ સ્ટેટ્સમાં રાષ્ટ્રપતિને તેમના પદ પરથી દૂર કરવાની આ પ્રક્રિયા ત્રણ મુખ્ય પગલાંમાં વહેંચાયેલી છે, જે નીચે મુજબ છે:

ઈમ્પીચ (મહાભિયોગ): આ પ્રક્રિયાનું પ્રથમ પગલું છે, જ્યાં પ્રતિનિધિ ગૃહ (House of Representatives) ઔપચારિક રીતે રાષ્ટ્રપતિ પર કોઈ ગંભીર ગુના અથવા દુરાચારનો આરોપ મૂકે છે.

કન્વિક્ટ (દોષિત ઠેરવવું): મહાભિયોગનો આરોપ મૂકાયા બાદ, આ કેસ સેનેટ સમક્ષ રજૂ કરવામાં આવે છે. જો સેનેટમાં પૂરતી સંખ્યામાં સેનેટરો આરોપોને સાચા ગણીને રાષ્ટ્રપતિને દોષિત ઠેરવવા માટે મત આપે, તો રાષ્ટ્રપતિ દોષિત જાહેર થાય છે.

રિમૂવ: એકવાર રાષ્ટ્રપતિને સેનેટ દ્વારા દોષિત ઠેરવવામાં આવે, ત્યારબાદ તેમને તાત્કાલિક અસરથી તેમના પદ પરથી દૂર કરવામાં આવે છે.

આ પ્રક્રિયા યુનાઇટેડ સ્ટેટ્સના ઇતિહાસમાં અત્યંત દુર્લભ અને રાજકીય રીતે સંવેદનશીલ માનવામાં આવે છે, અને તેનો ઉપયોગ ફક્ત ખૂબ જ ગંભીર સંજોગોમાં જ થાય છે.

આ પણ વાંચો- ગુજરાતમાં સાયબર ક્રાઈમનો ભયાવહ ઉછાળો: 5 વર્ષમાં 30% વધારો, 9 મહિનામાં રૂ.1011 કરોડનો ચૂનો, ગુજરાતીઓ સૌથી વધુ શિકાર