નીરજ ચોપરાને ટેરિટોરિયલ આર્મીમાં લેફ્ટનન્ટ કર્નલનું સન્માન, ભારત-પાક તણાવ વચ્ચે મળ્યું મોટું સન્માન

ભારત અને પાકિસ્તાન વચ્ચે ચાલી રહેલા તણાવના માહોલમાં ઓલિમ્પિક ગોલ્ડ મેડાલિસ્ટ નીરજ ચોપરાને મોટું સન્માન મળ્યું છે. ભારતના પ્રખ્યાત જેવલિન થ્રો ખેલાડી નીરજ ચોપરાને ટેરિટોરિયલ આર્મીમાં લેફ્ટનન્ટ કર્નલનું માનદ પદ એનાયત કરવામાં આવ્યું છે. આ નિમણૂક 16 એપ્રિલ 2025થી અમલમાં આવી છે, જેની સત્તાવાર જાહેરાત ભારત સરકારના કાનૂની દસ્તાવેજ ધ ગેઝેટ ઓફ ઈન્ડિયામાં કરવામાં આવી છે.

નીરજ ચોપરાની સેના સાથેની સફર

27 વર્ષીય નીરજ ચોપરા, જે હરિયાણાના પાનીપત જિલ્લાના ખંડરા ગામના વતની છે, ભારતીય સેનામાં સુબેદાર મેજર તરીકે સેવા આપી ચૂક્યા છે. આ વર્ષે તેઓ સેનામાંથી નિવૃત્ત થવાના હતા, પરંતુ તેમની રમતગમતની સિદ્ધિઓ અને રાષ્ટ્ર પ્રત્યેની પ્રતિબદ્ધતાને ધ્યાનમાં રાખીને રાષ્ટ્રપતિએ પ્રાદેશિક સેના નિયમો 1948ના પેરા-31 હેઠળ તેમને આ માનદ પદ એનાયત કર્યું છે. આ પદ એનાયત કરવાની સૂચનામાં જણાવાયું છે કે, “પીવીએસએમ, પદ્મશ્રી, વીએસએમ, ભૂતપૂર્વ સુબેદાર મેજર નીરજ ચોપરાને 16 એપ્રિલ 2025થી ટેરિટોરિયલ આર્મીમાં લેફ્ટનન્ટ કર્નલનું માનદ પદ આપવામાં આવે છે.”

નીરજની રમત-ગમતની ઉપલબ્ધિઓ

ભારત-પાક તણાવ અને ટેરિટોરિયલ આર્મીની ભૂમિકા

ભારત અને પાકિસ્તાન વચ્ચેના યુદ્ધ દરમિયાન કેન્દ્ર સરકારે ટેરિટોરિયલ આર્મીને વધુ સક્રિય ભૂમિકા આપવાનો નિર્ણય લીધો હતો. આ અંગે સરકારે ભારતીય સેનાના વડાને અધિકાર આપ્યો છે કે તેઓ જરૂર પડે ત્યારે ટેરિટોરિયલ આર્મીને કોઈ વધારાની મંજૂરી વિના તૈનાત કરી શકે છે. આ નિર્ણયથી ટેરિટોરિયલ આર્મીનું મહત્ત્વ વધ્યું છે.

ટેરિટોરિયલ આર્મીનો ગૌરવશાળી ઇતિહાસ

9 ઓક્ટોબર 1949ના રોજ સ્થપાયેલી ટેરિટોરિયલ આર્મીએ 2024માં પોતાની સ્થાપનાના 75 વર્ષ પૂર્ણ કર્યા છે. આ સમયગાળા દરમિયાન ટેરિટોરિયલ આર્મીએ યુદ્ધના સમયે, માનવીય સહાય અને પર્યાવરણ સંરક્ષણના કાર્યોમાં રાષ્ટ્રની સેવા કરી છે. નિયમિત સેના સાથે સંકલનમાં કામ કરતી આ સેનામાં ઘણા વ્યક્તિઓને તેમના યોગદાન બદલ બહાદુરી અને વિશિષ્ટ સેવા પુરસ્કારોથી સન્માનિત કરવામાં આવ્યા છે.

ધોની પણ ટેરિટોરિયલ આર્મીનો હિસ્સો

નીરજ ચોપરા પહેલા ભારતીય ક્રિકેટ ટીમના પૂર્વ કેપ્ટન મહેન્દ્ર સિંહ ધોનીને પણ 2011માં ટેરિટોરિયલ આર્મીમાં લેફ્ટનન્ટ કર્નલનું માનદ પદ આપવામાં આવ્યું હતું. ધોનીએ પણ પોતાની રમતગમતની સિદ્ધિઓ દ્વારા દેશનું નામ ઉજ્જવળ કર્યું છે.

નીરજનું સન્માન દેશ માટે ગૌરવ

નીરજ ચોપરાને મળેલું આ સન્માન માત્ર તેમની વ્યક્તિગત સફળતા નથી, પરંતુ દેશના યુવાનો માટે પણ પ્રેરણારૂપ છે. રમતગમત અને સેના સેવા બંનેમાં તેમનું યોગદાન ભારતની નવી પેઢીને રાષ્ટ્રસેવા અને શિસ્તનું મહત્ત્વ શીખવે છે.

આ પણ વાંચો-ભારત સરકારનો ઈ-કોમર્સ કંપનીઓને કડક આદેશ, પાકિસ્તાનના ઝંડા વાળા પ્રોડક્ટ્સ તાત્કાલિક હટાવો