હવે ફોન બદલવાની ઝંઝટ પૂરી! Apple અને Googleની ભાગીદારીથી Android-iPhone વચ્ચે ડેટા ટ્રાન્સફર થશે એકદમ સરળ

Android to iPhone, iPhone to Android: સ્માર્ટફોન યુઝર્સ માટે એક મોટા અને સારા સમાચાર સામે આવી રહ્યા છે. અત્યાર સુધી એકબીજાના કટ્ટર હરીફ ગણાતા Apple અને Google એ યુઝર્સની સુવિધા માટે હાથ મિલાવ્યા છે. આ ભાગીદારીનો સીધો ફાયદો એવા કરોડો યુઝર્સને મળશે જેઓ Android ફોનમાંથી iPhone માં અથવા iPhone માંથી Android ફોનમાં શિફ્ટ થવા માંગે છે. હવે ફોન બદલતી વખતે ડેટા ગુમાવવાની કે પછી થર્ડ-પાર્ટી એપ્સ વાપરવાની ઝંઝટનો અંત આવવાનો છે.

ડેટા ટ્રાન્સફર બનશે ખૂબ જ સરળ

લાંબા સમયથી, બંને કંપનીઓ એક એવા ફીચર પર કામ કરી રહી હતી જે ડેટા ટ્રાન્સફરના અનુભવને સંપૂર્ણપણે બદલી નાખે. અત્યાર સુધી, યુઝર્સે ફોન બદલતી વખતે કોન્ટેક્ટ્સ, ફોટો, વીડિયો અને એપ્સ ટ્રાન્સફર કરવા માટે અન્ય એપ્સનો સહારો લેવો પડતો હતો, જેમાં ડેટા લોસ થવાનો ભય રહેતો હતો. પરંતુ હવે આ પ્રક્રિયા ફોનના સેટઅપનો જ એક ભાગ બની જશે, જેનાથી યુઝર્સ સરળતાથી પોતાનો તમામ ડેટા નવા ફોનમાં ટ્રાન્સફર કરી શકશે.

નવા અપડેટમાં જોવા મળ્યું આ ફીચર

બીજી તરફ, એવું પણ માનવામાં આવે છે કે Apple તેના આગામી iOS 26ના બીટા અપડેટમાં આ ડેટા ટ્રાન્સફર સુવિધાને ઉમેરી શકે છે. બંને કંપનીઓએ પુષ્ટિ કરી છે કે આ ફીચર ટૂંક સમયમાં જ તમામ યુઝર્સ માટે રોલઆઉટ કરવામાં આવશે.

યુઝર્સને શું ફાયદો થશે?

આ નવા અપડેટ પછી, જ્યારે પણ યુઝર નવો ફોન સેટઅપ કરશે, ત્યારે તેને ‘Google Services’ વિભાગમાં ‘Copy Data’નો વિકલ્પ મળશે. આ વિકલ્પની મદદથી તેઓ પોતાના જૂના Android ફોનમાંથી નવા iPhoneમાં અથવા તો જૂના iPhoneમાંથી નવા Android ફોનમાં ડેટા સરળતાથી કોપી કરી શકશે.

હાલમાં, એ સ્પષ્ટ નથી થયું કે કયા-કયા પ્રકારનો ડેટા જેમ કે એપ્સ, ચેટ્સ, સેટિંગ્સ ટ્રાન્સફર કરી શકાશે, પરંતુ આ પગલું ચોક્કસપણે સ્માર્ટફોન ઇકોસિસ્ટમને વધુ યુઝર-ફ્રેન્ડલી બનાવશે. હાલમાં યુઝર્સ માત્ર eSIM નો ડેટા જ સરળતાથી ટ્રાન્સફર કરી શકે છે.

આ પણ વાંચો- અમેરિકાની ભારતને મોટી ઓફર: આ 2 શરતો માનો તો ટેરિફ હટશે? જાણો કેમ અમેરિકા આટલું આતુર