ઓપરેશન સિંધુ: ઈરાન-ઈઝરાયેલ યુદ્ધ વચ્ચે ભારતે શરૂ કર્યું વિદેશી નાગરિકોનું રેસ્ક્યૂ, 110 વિદ્યાર્થીઓને નવી દિલ્હી પહોંચ્યા

ઈરાન અને ઈઝરાયેલ વચ્ચે ચાલી રહેલા યુદ્ધની પરિસ્થિતિને ધ્યાનમાં રાખીને ભારત સરકારે ઈરાનમાં ફસાયેલા ભારતીય વિદ્યાર્થીઓને સુરક્ષિત રીતે વતન પાછા લાવવા માટે 'ઓપરેશન સિંધુ' શરૂ કર્યું છે. વિદેશ મંત્રાલયના જણાવ્યા અનુસાર, ઉત્તરી ઈરાનમાંથી લગભગ 110 વિદ્યાર્થીઓને આર્મેનિયાના યેરેવન શહેર ખાતે ખસેડવામાં આવ્યા છે, જ્યાંથી તેઓ ખાસ ફ્લાઈટ દ્વારા નવી દિલ્હી પહોંચ્યા છે.

ઓપરેશન સિંધુની વિગતો

વિદેશ મંત્રાલયના પ્રવક્તા રણધીર જયસ્વાલે જણાવ્યું, "ભારત સરકારે ઈરાનમાં ફસાયેલા ભારતીય નાગરિકોની સુરક્ષા માટે 'ઓપરેશન સિંધુ' શરૂ કર્યું છે. 17 જૂનના રોજ ઈરાન અને આર્મેનિયામાં આવેલા ભારતીય મિશનની દેખરેખ હેઠળ 110 વિદ્યાર્થીઓને ઉત્તરી ઈરાનમાંથી આર્મેનિયા ખસેડવામાં આવ્યા. આ વિદ્યાર્થીઓ યેરેવનના ઝ્વાર્ટનોટ્સ ઈન્ટરનેશનલ એરપોર્ટથી ખાસ ફ્લાઈટ દ્વારા નવી દિલ્હી માટે રવાના થયા છે અને ભારત પહોંચશે."

ઈરાનમાં લગભગ 4,000થી વધુ ભારતીય નાગરિકો રહે છે, જેમાંથી અડધા વિદ્યાર્થીઓ છે. આમાંના મોટાભાગના વિદ્યાર્થીઓ જમ્મુ-કાશ્મીરના છે, જેઓ મેડિકલ અને અન્ય વ્યાવસાયિક અભ્યાસક્રમોમાં નોંધાયેલા છે. વિદેશ મંત્રાલયે પુષ્ટિ કરી છે કે યેરેવનથી પ્રથમ ફ્લાઈટ રવાના થઈ ચૂકી છે, અને તે 19 જૂનની સવારે ભારત પહોંચવાની અપેક્ષા છે.

ઈરાન-ઈઝરાયેલ વચ્ચે ચાલી રહેલા તણાવના કારણે ઈરાનમાં રહેતા ભારતીય નાગરિકોની સુરક્ષા પર ખતરો ઉભો થયો છે. આવી પરિસ્થિતિમાં ભારત સરકારે તાત્કાલિક પગલાં લઈને વિદ્યાર્થીઓને સુરક્ષિત રીતે વતન પાછા લાવવાનો નિર્ણય લીધો છે. આ ઓપરેશન ભારતની ઝડપી અને કાર્યક્ષમ રેસ્ક્યૂ વ્યવસ્થાનું ઉદાહરણ છે.

ભારતના અગાઉના રેસ્ક્યૂ ઓપરેશન્સ

આ પહેલાં પણ ભારત સરકારે યુદ્ધગ્રસ્ત વિસ્તારોમાંથી ભારતીય નાગરિકોને સુરક્ષિત રીતે બહાર કાઢવા માટે ઘણા રેસ્ક્યૂ ઓપરેશન્સ હાથ ધર્યા છે.

ઓપરેશન અજય (2023): હમાસ અને ઈઝરાયેલ વચ્ચેના યુદ્ધ દરમિયાન ઈઝરાયેલમાં ફસાયેલા ભારતીય નાગરિકોને પાછા લાવવા માટે આ ઓપરેશન શરૂ કરવામાં આવ્યું હતું.

ઓપરેશન ગંગા (2022): રશિયા-યુક્રેન યુદ્ધ દરમિયાન યુક્રેનમાં ફસાયેલા ભારતીય વિદ્યાર્થીઓને પાછા લાવવા માટે આ અભિયાન શરૂ કરાયું હતું.

ઓપરેશન સિંદૂર: આ પહેલાં પાકિસ્તાનના પહેલગામમાં થયેલા આતંકી હુમલાના જવાબમાં ભારતે 'ઓપરેશન સિંદૂર' હાથ ધર્યું હતું, જેમાં પાકિસ્તાન અને પીઓકેમાં 100થી વધુ આતંકવાદીઓને ઠાર કરવામાં આવ્યા હતા અને એરબેસનો નાશ કરવામાં નોંધપાત્ર સફળતા મળી હતી.

આ પણ વાંચો - એર ઇન્ડિયાએ આંતરરાષ્ટ્રીય સેવાઓમાં 15%નો કર્યો ઘટાડો, જાણો કારણો અને અસર