શરમજનક ઘટના: નેપાળના ભીષણ પૂર વચ્ચે મહિલાના મૃતદેહ પરથી સોનાના ઘરેણાંની ચોરી, બે આરોપીઓ ઝડપાયા

Nepal Flood News: નેપાળ અત્યારે ભયંકર પૂરનો સામનો કરી રહ્યું છે. કુદરતના આ વિનાશક કોપ વચ્ચે એક એવી ઘટના બની છે, જેણે માનવતાને પણ શરમાવી દીધી છે. ભીષણ પૂરમાં તણાઈને આવેલી એક મૃતક મહિલાના શવ પરથી કેટલાક અસામાજિક તત્વોએ સોનાના ઘરેણાંની ચોરી કરી લીધી હતી. આ ઘટનાનો હૃદયદ્રાવક વીડિયો સોશિયલ મીડિયા પર વાઈરલ થતાં લોકોમાં ભારે આક્રોશ જોવા મળી રહ્યો છે.

41 સેકન્ડના વાઈરલ વીડિયોમાં શું છે?

મળતી વિગતો અનુસાર, ઈન્ટરનેટ પર વાઈરલ થઈ રહેલો આ વીડિયો 41 સેકન્ડનો છે. આ વીડિયોમાં સ્પષ્ટ જોઈ શકાય છે કે બે શખ્સો પૂરમાં તણાઈ આવેલી એક લાશને લાકડાના પાટિયા અને વાળ પકડીને પાણીની બહાર ખેંચી રહ્યા છે. ત્યારબાદ તેઓ કોઈ પણ જાતની શરમ વિના મૃતક મહિલાના બંને કાનમાંથી સોનાની બુટ્ટીઓ કાઢીને એક તરફ મૂકી દે છે. આ ઘટનામાં સૌથી વધુ આઘાતજનક બાબત એ હતી કે આસપાસ ઉભેલા લોકો આ શરમજનક કૃત્યને રોકવાને બદલે મૂકપ્રેક્ષક બનીને માત્ર જોતા રહ્યા હતા. કેટલાક લોકો તો પોતાના મોબાઈલ ફોનમાં આ ઘટનાનો વીડિયો ઉતારવામાં વ્યસ્ત હતા.

નેપાળ પોલીસની ત્વરિત કાર્યવાહી

વીડિયો ઈન્ટરનેટ પર ઝડપથી વાઈરલ થયા બાદ લોકોએ ભારે ફિટકાર વરસાવ્યો હતો અને આરોપીઓ સામે કડકમાં કડક કાર્યવાહી કરવાની માંગ કરી હતી. મામલાની ગંભીરતાને ધ્યાનમાં રાખીને નેપાળ પોલીસે તરત જ એક્શન લીધા હતા. પોલીસે સોશિયલ મીડિયા પ્લેટફોર્મ 'X' પર પોસ્ટ કરીને સત્તાવાર જાણકારી આપી છે કે લાશના કાનમાંથી બુટ્ટી ચોરનારા 2 આરોપીઓને ઝડપી પાડવામાં આવ્યા છે અને તેમની સામે કાયદેસરની કાર્યવાહી શરૂ કરી દેવામાં આવી છે.

પૂરમાં 490થી વધુ લોકોના મોત

અત્રે નોંધનીય છે કે, નેપાળ અને તિબેટના સરહદી વિસ્તારોમાં આવેલા આ વિનાશક પૂરમાં અત્યાર સુધીમાં 490થી વધુ લોકોએ પોતાના જીવ ગુમાવ્યા છે. જ્યારે 1400થી વધુ લોકો હજુ પણ લાપતા હોવાનું જાણવા મળ્યું છે. આવી ભયાનક કુદરતી આફત સમયે, જ્યારે લોકોએ એકબીજાની મદદ કરવી જોઈએ, ત્યારે આવી હીન માનસિકતા ધરાવતી ચોરીની ઘટનાએ સાચે જ દરેકને ઝંઝોડી મૂક્યા છે.

આ પણ વાંચો - iPhone 18ની લોન્ચ ડેટ લીક! નવો 48MP કેમેરા, A20 પ્રોસેસર અને કિંમતની પૂરી ડિટેલ જાણો