અમેરિકા-વેનેઝુએલા વચ્ચે વધ્યો તણાવ, દરિયામાં ડ્રગ્સ જહાજ જાહેર કરી ટ્રમ્પે આપ્યા એટેકના આદેશ

America v/s Venezuela: અમેરિકાના પ્રમુખ ડોનાલ્ડ ટ્રમ્પના આદેશ પર અમેરિકન સેનાએ વેનેઝુએલાના દરિયાકાંઠે ડ્રગ કાર્ટેલ સાથે સંકળાયેલા એક જહાજ પર મોટો હુમલો કર્યો છે. આ હુમલો ડ્રગ્સ ટ્રાફિકિંગ રોકવાના હેતુથી કરવામાં આવ્યો હોવાનો અમેરિકાનો દાવો છે. ટ્રમ્પે જણાવ્યું કે આ કાર્યવાહીમાં 3 લોકો માર્યા ગયા. આ ઘટના છેલ્લા 1 મહિનામાં વેનેઝુએલા સામે અમેરિકાનો બીજો મોટો હુમલો છે, જેના કારણે બંને દેશો વચ્ચે તણાવ વધી રહ્યો છે.

ટ્રમ્પનો વીડિયો અને વિવાદ

ટ્રમ્પે તેમના સોશિયલ મીડિયા પ્લેટફોર્મ ટ્રુથ સોશિયલ પર 28 સેકન્ડનો એક વીડિયો શેર કર્યો, જેમાં જહાજ પર વિસ્ફોટ અને આગના દ્રશ્યો જોવા મળે છે. જોકે, આ વીડિયો ડ્રગ્સની હાજરીનો પુરાવો આપતો નથી. ટ્રમ્પે દાવો કર્યો કે આ હુમલો ડ્રગ નેટવર્ક અને નાર્કો ટેરરિસ્ટ સામેની કાર્યવાહીનો ભાગ છે. વેનેઝુએલાએ હજુ સુધી આ મામલે કોઈ સત્તાવાર પ્રતિક્રિયા આપી નથી.

આ પહેલાં 3 સપ્ટેમ્બરે અમેરિકાએ વેનેઝુએલાથી ડ્રગ્સ લઈ જતા એક જહાજ પર હુમલો કર્યો હતો, જેમાં 11 લોકો માર્યા ગયા હતા. અમેરિકાએ વેનેઝુએલા નજીક સૈન્ય ગતિવિધિ વધારી છે, જેમાં 10 ફાઈટર જેટ, 7 યુદ્ધ જહાજ અને 1 ન્યુક્લિયર સબમરીનનો સમાવેશ થાય છે. આ પગલાં ડ્રગ કાર્ટેલને રોકવાના ઉદ્દેશ્ય સાથે લેવામાં આવ્યા હોવાનો દાવો કરવામાં આવે છે.

હવે, અમેરિકા અને વેનેઝુએલા વચ્ચે વધતો તણાવ આંતરરાષ્ટ્રીય સ્તરે ચિંતાનો વિષય બન્યો છે. વેનેઝુએલાની પ્રતિક્રિયા અને આગળની કાર્યવાહી પર સૌની નજર છે.

આ પણ વાંચો- રાહુલ ગાંધીનો ગુજરાતમાં નવો પ્લાન: વિધાનસભા બેઠકોમાં તાલુકા-જિલ્લા પ્રમુખોના ઘરે રોકાશે, 2027 ચૂંટણી જીતવાની તૈયારી