ગુજરાતમાં મેઘો મુશળધાર: 8 જિલ્લામાં રેડ એલર્ટ, સાબરમતી નદીમાં પાણી છોડાયું

Gujarat rain red alert: ગુજરાતમાં ચોમાસું ફરી એકવાર સક્રિય થયું છે. હવામાન વિભાગે 7 સપ્ટેમ્બર, 2025ના રોજ રાજ્યના 8 જિલ્લાઓમાં ભારે થી અતિ ભારે વરસાદની ચેતવણી આપી છે. આ જિલ્લાઓમાં બનાસકાંઠા, મહેસાણા, અરવલ્લી, વલસાડ, દમણ, દાદરા નગર હવેલી, કચ્છ, સુરેન્દ્રનગર અને રાજકોટનો સમાવેશ થાય છે. અમદાવાદ અને ગાંધીનગર સહિત ઉત્તર ગુજરાતમાં શનિવારે મધરાતથી ઝરમર વરસાદ ચાલુ છે, જેના કારણે ઘણા નીચાણવાળા વિસ્તારોમાં પાણી ભરાયા છે.

સાબરમતી નદીમાં પાણીનો પ્રવાહ: વાસણા બેરેજના દરવાજા ખુલ્લા

ઉપરવાસમાં ભારે વરસાદને કારણે સાબરમતી નદીમાં 32410 ક્યુસેક પાણી છોડવામાં આવ્યું છે. આને પગલે વાસણા બેરેજના તમામ 27 દરવાજા ખોલવામાં આવ્યા છે. નદી કિનારે આવેલા ગામડાઓને ચેતવણી જાહેર કરવામાં આવી છે, જેથી લોકો સાવચેત રહે. અમદાવાદમાં સતત વરસાદને કારણે શિવરંજની-નહેરુ નગર રોડ પર એક વૃક્ષ ધરાશાયી થયું, જેના કારણે અવરજવરમાં મુશ્કેલી ઉભી થઈ.

અમદાવાદમાં શનિવારથી શરૂ થયેલો ઝરમર વરસાદ રવિવારે પણ ચાલુ રહ્યો છે. શહેરના નીચાણવાળા વિસ્તારોમાં પાણી ભરાતાં લોકોને અવરજવરમાં તકલીફ પડી રહી છે. સતત વરસાદથી વાતાવરણમાં ઠંડક પ્રસરી છે, જેનાથી લોકોને ગરમીથી રાહત મળી છે. જોકે, પાણી ભરાવાની સમસ્યાએ રહેવાસીઓની ચિંતા વધારી છે.

હવામાન વિભાગની ચેતવણી

હવામાન વિભાગના રેડ એલર્ટ અનુસાર, આજે રવિવારે ઉપરોક્ત 8 જિલ્લાઓમાં અતિ ભારે વરસાદની શક્યતા છે. આવી સ્થિતિમાં લોકોને બિનજરૂરી બહાર નીકળવાનું ટાળવા અને સલામત સ્થળે રહેવાની સલાહ આપવામાં આવી છે. સ્થાનિક વહીવટી તંત્ર પણ સતર્ક છે અને પૂરની સ્થિતિને નિયંત્રણમાં રાખવા તૈયારીઓ કરી રહ્યું છે.

આ પણ વાંચો- શું મોદી અને ટ્રમ્પ વચ્ચેની આડકરતી વાતચીતથી શેરબજાર પર કોઈ અસર થશે? જાણો નિષ્ણાતો શું કહે છે?