Trump-Putin meeting: ટ્રમ્પ અને પુતિન વચ્ચેની વાતચીત પહેલા ઝેલેન્સકીએ આપ્યું મોટું નિવેદન, જણાવ્યું રશિયાને શું જોઇએ છે?

Russia-Ukraine war: અમેરિકી રાષ્ટ્રપતિ ડોનાલ્ડ ટ્રંપ અને રશિયન રાષ્ટ્રપતિ વ્લાદિમીર પુતિન વચ્ચે શુક્રવારે અલાસ્કામાં રૂબરૂ મુલાકાત થવાની છે, જે રશિયા-યુક્રેન યુદ્ધમાં યુદ્ધવિરામની શક્યતાઓને લઈને મહત્વની માનવામાં આવે છે. આ મુલાકાત પહેલાં યુક્રેનના રાષ્ટ્રપતિ વોલોદિમીર ઝેલેન્સ્કીએ એક મોટું નિવેદન આપીને સ્પષ્ટ કર્યું છે કે રશિયા શું ઇચ્છે છે. ઝેલેન્સ્કીના જણાવ્યા મુજબ, પુતિન ઇચ્છે છે કે યુદ્ધવિરામ કરાર હેઠળ યુક્રેન ડોનેત્સ્કના બાકી 30% વિસ્તારમાંથી પણ પીછેહઠ કરે, જે હાલ યુક્રેનના નિયંત્રણમાં છે.

ઝેલેન્સ્કીએ સ્પષ્ટ શબ્દોમાં કહ્યું, “યુક્રેન પોતાના નિયંત્રણવાળા વિસ્તારોમાંથી એક ઇંચ પણ પાછળ હટશે નહીં. આ અમારા બંધારણની વિરુદ્ધ છે અને તેનાથી ભવિષ્યમાં રશિયાને ફરી હુમલો કરવાની તક મળી શકે છે.” તેમણે ઉમેર્યું કે પુતિનની માંગ છે કે યુક્રેન ડોનેત્સ્કનો બાકીનો 9,000 ચોરસ કિલોમીટર (3,500 ચોરસ માઇલ) વિસ્તાર રશિયાને સોંપે, જે યુક્રેનના પૂર્વીય ઔદ્યોગિક ક્ષેત્રનો મહત્વનો હિસ્સો છે.

ઝેલેન્સ્કીએ વધુમાં જણાવ્યું કે અમેરિકી અધિકારીઓએ તેમને રશિયાની આ માંગની જાણકારી આપી છે. જો યુક્રેન આ માંગ સ્વીકારે, તો રશિયા ડોનબાસ ક્ષેત્રનો લગભગ સંપૂર્ણ કબજો મેળવી લેશે, જે યુક્રેનના અર્થતંત્ર અને વ્યૂહાત્મક દૃષ્ટિએ અત્યંત મહત્વનું છે. આ વિસ્તાર પર લાંબા સમયથી રશિયાની નજર છે, અને બંને દેશો વચ્ચે આ વિસ્તારને લઈને ઉગ્ર લડાઈ ચાલી રહી છે.

બીજી તરફ, ટ્રંપે પણ આ મુલાકાત પહેલાં એક નિવેદન આપ્યું છે, જેમાં તેમણે રશિયા અને અમેરિકા વચ્ચે નોર્મલ ટ્રેડની શક્યતાઓ વ્યક્ત કરી છે. સોમવારે વ્હાઇટ હાઉસમાં બ્રીફિંગ દરમિયાન ટ્રંપે કહ્યું, “મને મુલાકાતના પહેલા બે મિનિટમાં જ ખબર પડી જશે કે કોઈ સમજૂતી થઈ શકે છે કે નહીં.”

આ પણ વાંચો- India-US relations: PM મોદી સપ્ટેમ્બરમાં UNGA સત્ર માટે અમેરિકાની લઈ શકે છે મુલાકાત, ટ્રમ્પ સાથે પણ વાતચીત શક્ય