ટ્રમ્પનો ટેરિફ બોમ્બ: ભારત પર 25% ટેરિફ, આ 5 સેક્ટર્સને લાગશે મોટો ઝટકો

Trump Tariffs: અમેરિકાના રાષ્ટ્રપતિ ડોનાલ્ડ ટ્રમ્પે ભારત સાથેના વેપારી સંબંધોમાં મોટો ફેરફાર કર્યો છે. તેમણે પોતાના સોશિયલ મીડિયા પ્લેટફોર્મ Truth Social પર ભારતને અમેરિકાનું મિત્ર ગણાવ્યું, પરંતુ સાથે જ રશિયા પાસેથી લશ્કરી સાધનો અને ક્રૂડ ઓઇલ ખરીદવાને કારણે ભારતે 25% ટેરિફ અને વધારાની પેનલ્ટીનો સામનો કરવો પડશે તેવું પણ જણાવ્યું. જોકે, આ વધારાની પેનલ્ટીનું પ્રમાણ હજુ સ્પષ્ટ થયું નથી.

ટ્રમ્પે પોતાની પોસ્ટમાં લખ્યું, યાદ રાખો, ભારત આપણો મિત્ર છે, પરંતુ વર્ષોથી આપણે તેમની સાથે ઓછો વેપાર કરી શક્યા છીએ. આનું કારણ એ છે કે ભારતના ટેરિફ વિશ્વમાં સૌથી ઊંચા છે. તેમની પાસે અન્ય દેશોની સરખામણીએ સૌથી કડક અને આપત્તિજનક બિન-આર્થિક વેપારી અડચણો છે.

ભારત-અમેરિકા વેપારી સંબંધો

ઉલ્લેખનીય છે કે વિત્ત વર્ષ 2022થી 2024 દરમિયાન અમેરિકા ભારતનું સૌથી મોટું વેપારી ભાગીદાર હતું. આ દરમિયાન અમેરિકાનો ભારતના કુલ નિકાસમાં 18%, આયાતમાં 6.22% અને દ્વિપક્ષીય વેપારમાં 10.73%નો હિસ્સો હતો. આવી સ્થિતિમાં ટ્રમ્પના નવા ટેરિફની અસર ભારતના કયા સેક્ટર્સ પર સૌથી વધુ પડશે? અહીં અમે એવા પાંચ સેક્ટર્સની યાદી આપી રહ્યા છીએ જેને આ ટેરિફનો સૌથી મોટો ઝટકો લાગી શકે છે.

ભારતનું ટેક્સટાઇલ અને એપેરલ ઉદ્યોગ અમેરિકાના બજાર પર ઘણો નિર્ભર છે. 2023-24માં ભારતે અમેરિકાને આશરે 9.6 બિલિયન ડોલરની ટેક્સટાઇલ અને એપેરલ નિકાસ કરી હતી, જે આ કેટેગરીની કુલ નિકાસના 28% છે. નવા ટેરિફથી આ ઉદ્યોગને અસર થઈ શકે છે.

2. ફાર્માસ્યુટિકલ્સ

અમેરિકા ભારતનું સૌથી મોટું જેનરિક દવાઓનું બજાર છે. 2024માં ભારતની ફાર્મા નિકાસની કુલ કિંમત 127 બિલિયન ડોલર હતી. ટેરિફની અસરથી ભારતીય જેનરિક દવાઓ અમેરિકામાં મોંઘી થશે, જેનાથી તેનું બજાર નબળું પડી શકે છે.

3. એગ્રીકલ્ચર અને સીફૂડ

ગ્લોબલ ટ્રેડ રિસર્ચ ઇનિશિયેટિવ (GTRI)ના રિપોર્ટ અનુસાર, એગ્રીકલ્ચર સેક્ટરમાં માછલી, માંસ અને પ્રોસેસ્ડ સીફૂડને મોટી અસર થશે. 2024માં આની નિકાસ 2.58 બિલિયન ડોલર હતી, જેના પર 27.83%નો વધારાનો ટેરિફ પડી શકે છે. ભારતીય ઝીંગા અને સીફૂડ પ્રોડક્ટ્સની કિંમતો વધવાથી તેની વેચાણ અને આવક ઘટી શકે છે.

4. શરાબ, માંસ અને ખાંડ

એક્સપર્ટ્સનું માનવું છે કે આ કેટેગરીમાં ટેરિફમાં સૌથી વધુ વધારો થશે. શરાબ, વાઇન અને સ્પિરિટ્સ પર ટેરિફ સૌથી ઊંચો હોઈ શકે છે, જોકે ભારતની નિકાસ આમાં માત્ર 1.92 કરોડ ડોલરની છે. ડેરી પ્રોડક્ટ્સ જેમ કે ઘી, માખણ અને મિલ્ક પાઉડર પણ મોંઘા થશે, જેની નિકાસ 181.49 મિલિયન ડોલરની છે. GTRIના ફાઉન્ડર અજય શ્રીવાસ્તવના જણાવ્યા મુજબ, આનાથી ભારતીય ડેરી પ્રોડક્ટ્સનો માર્કેટ શેર ઘટી શકે છે.

5. ફૂટવેર

ભારતનો ફૂટવેર ઉદ્યોગ દર વર્ષે અમેરિકાને 45.76 કરોડ ડોલરની નિકાસ કરે છે. અગાઉ 15% ટેક્સ હતો, પરંતુ 1 ઓગસ્ટથી 25% ટેક્સ લાગશે. આનાથી ભારતીય ફૂટવેર અમેરિકામાં મોંઘા થશે, જેનાથી ગ્રાહકો અન્ય દેશોના પ્રોડક્ટ્સ તરફ વળી શકે છે.

ટ્રમ્પના આ ટેરિફની અસર ભારતના અર્થતંત્ર અને ખાસ કરીને આ પાંચ સેક્ટર્સ પર નોંધપાત્ર રીતે પડી શકે છે. રોકાણકારો અને વેપારીઓ હવે શેરબજાર અને વેપારી નીતિઓ પર નજર રાખી રહ્યા છે.

આ પણ વાંચો- Donald Trump Pakistan Oil Reserves: ટ્રમ્પની પાકિસ્તાન સાથે મોટી ડીલ ‘વિશાળ તેલ ભંડાર'ના વિકાસની યોજના