અમેરિકાએ ભારતની 9 કંપનીઓ પર મૂક્યો પ્રતિબંધ: ઈરાનના તેલ કારોબારમાં મદદનો આરોપ, ચંદીગઢનું નેટવર્ક ઝડપાયું

અમેરિકાની મિડટર્મ ચૂંટણીમાં ટ્રમ્પની રિપબ્લિકન પાર્ટીને મળેલી હાર બાદ હવે ટ્રમ્પ પ્રશાસને ભારત પર આર્થિક શિકંજો કસવાનું શરૂ કર્યું છે. ઈરાનના પ્રતિબંધિત તેલ કારોબારને આંતરરાષ્ટ્રીય પ્રતિબંધોથી બચાવવામાં મદદ કરવાના ગંભીર આરોપ હેઠળ અમેરિકાએ ભારતીય કારોબારી સુનીલ કુમાર શર્મા, તેમની પત્ની જસપ્રીત પ્રીતિ શાહિદ અને ભારત સ્થિત 9 કંપનીઓ પર કડક પ્રતિબંધો લાદ્યા છે.

ચંદીગઢથી ચાલતું હતું ગેરકાયદે નેટવર્ક

આ નેટવર્કે અરુબા, ગિયાના, મોઝામ્બિક, મલાવી, સિન્ટ માર્ટેન અને તિમોર-લેસ્તે જેવા દેશોના નામે ફર્જી વેબસાઇટ્સ અને રજિસ્ટ્રીઓ ઊભી કરી હતી, જેથી જહાજોની ઓળખ છુપાવી શકાય.

કઈ 9 કંપનીઓ પર પડ્યો ગાજ?

અમેરિકી નાણા મંત્રાલયે જે ભારતીય કંપનીઓ અને સંસ્થાઓ પર પ્રતિબંધ મૂક્યો છે, તેમાં મુખ્યત્વે આ નામો સામેલ છે.

ઓશનિક ટેક્નોલોજીસ ઇન્ડિયા

આર્યાવર્ત શિપ મેનેજમેન્ટ

પ્રિસેપ્ટ ટ્રેન્ડ્સ

પોલીનેશિયા મેરિટાઇમ

અલેક્સાર્યા ફિનસર્વ

અલેક્સાર્યા મીડિયા એન્ડ એન્ટરટેઈનમેન્ટ

વિહારાબોટિંગ

આર્યાવર્ત મેરિટાઇમ એન્ડ એજ્યુકેશનલ ટ્રસ્ટ

આ ઉપરાંત, સુનીલ શર્મા સાથે જોડાયેલી કંપનીઓમાં ડાયરેક્ટર તરીકે કામ કરતા અશ્વિની કુમાર ધિમાન અને ઇશ્વિંદર સિંહ પર પણ પ્રતિબંધ લાદવામાં આવ્યો છે.

'ઓપરેશન ઇકોનોમિક આઉટકાસ્ટ' હેઠળ કાર્યવાહી

આ સમગ્ર કાર્યવાહી ટ્રમ્પ સરકારના 'ઓપરેશન ઇકોનોમિક આઉટકાસ્ટ' અભિયાન હેઠળ કરવામાં આવી છે. અમેરિકી નાણા મંત્રી સ્કોટ બેસેન્ટે સ્પષ્ટ ચેતવણી આપતા કહ્યું છે કે જમીન, સમુદ્ર કે આકાશ — કોઈ પણ માર્ગે ઈરાની શાસનને મદદ કરનારાઓને છોડવામાં આવશે નહીં. આ અભિયાનનો મુખ્ય ઉદ્દેશ્ય ઈરાનની આર્થિક ગતિવિધિઓ અને તેલ વેચાણની કમાણીને રોકવાનો છે.

ચૂંટણી હાર સાથે શું કનેક્શન?

રાજકીય નિષ્ણાતો માને છે કે આ કાર્યવાહીની ટાઇમિંગ પણ મહત્ત્વની છે. મિડટર્મ ચૂંટણીમાં રિપબ્લિકન પાર્ટીની હાર પાછળ ઈરાન સાથે ચાલી રહેલા સંઘર્ષ અને તેના કારણે વધેલા ઈંધણના ભાવોને મુખ્ય કારણ માનવામાં આવી રહ્યું છે. ચૂંટણી હાર બાદ ટ્રમ્પ પ્રશાસન ઈરાન અને તેના સમર્થકો વિરુદ્ધ વધુ આકરું વલણ અપનાવી રહ્યું છે, અને તેની અસર હવે ભારતીય કંપનીઓ પર પણ પડી રહી છે.

અમેરિકાના આ પ્રતિબંધો ભારતીય ઉદ્યોગ જગત માટે ચિંતાનો વિષય છે. ઈરાનના તેલ કારોબાર સાથે જોડાયેલી કોઈ પણ ગતિવિધિ હવે ભારે પડી શકે છે. ભારતીય કંપનીઓ અને કારોબારીઓએ આંતરરાષ્ટ્રીય પ્રતિબંધોના નિયમોનું કડક પાલન કરવું જરૂરી છે, નહીં તો આગામી દિવસોમાં વધુ કંપનીઓ આવા પ્રતિબંધોની ઝપેટમાં આવી શકે છે.

આ પણ વાંચો-ભારતીય નૌસેનાના 2 અધિકારીઓ પર કોર્ટ માર્શલ: INS બ્રહ્મપુત્ર પલટી જવાની ઘટનામાં કાર્યવાહી, જાણો શું છે સમગ્ર મામલો