US VP JD Vance: અમેરિકાના ઉપરાષ્ટ્રપતિ જેડી વેન્સના ઘર પર હુમલો, પથ્થરમારા બાદ એક શખ્સની અટકાયત; માદુરો કનેક્શન?

US VP JD Vance: અમેરિકાના રાજકારણમાંથી અત્યારે એક મોટા સમાચાર સામે આવી રહ્યા છે. અમેરિકાના ઉપરાષ્ટ્રપતિ જેડી વેન્સના નિવાસસ્થાન પર હુમલો થયો હોવાની ઘટના બની છે. મળતી માહિતી મુજબ, તેમના ઘર પર પથ્થરમારો કરવામાં આવ્યો છે. એટલું જ નહીં, પથ્થરમારાની સાથે ફાયરિંગ થયાની પણ ચર્ચા છે, જોકે ફાયરિંગ અંગે હજુ સુધી કોઈ સત્તાવાર પુષ્ટિ કરવામાં આવી નથી.

નિકોલસ માદુરોની ધરપકડ સાથે કનેક્શન?

આ ઘટનાને આંતરરાષ્ટ્રીય સ્તરે થયેલી એક મોટી ધરપકડ સાથે જોડીને જોવામાં આવી રહી છે. રિપોર્ટ્સનું માનીએ તો, વેનેઝુએલાના રાષ્ટ્રપતિ નિકોલસ માદુરોની ધરપકડ બાદ જેડી વેન્સના ઘર પર આ હુમલો થયો છે. હાલમાં આ પથ્થરમારાની ઘટનાને માદુરોની ધરપકડના રિએક્શન અથવા અસર તરીકે જોવામાં આવી રહી છે. ઘટના બાદ અમેરિકન પોલીસે તાત્કાલિક કાર્યવાહી કરીને એક વ્યક્તિને કસ્ટડીમાં લીધો છે.

વેન્સ અને તેમનો પરિવાર સુરક્ષિત

ઘટનાના થોડા કલાકો પહેલા જ જેડી વેન્સ અને તેમનો પરિવાર વોશિંગ્ટન જવા માટે રવાના થઈ ગયા હતા. સ્થાનિક મીડિયા રિપોર્ટ્સ મુજબ, ઉપરાષ્ટ્રપતિએ વીતેલું અઠવાડિયું ‘ક્વીન સિટી’માં વિતાવ્યું હતું. જોકે, હુમલા સમયે તેઓ ત્યાં હાજર ન હોવાથી મોટી જાનહાનિ ટળી હતી.

તપાસ એજન્સીઓ એક્શનમાં

આ ઘટના બાદ સુરક્ષા એજન્સીઓ સતર્ક થઈ ગઈ છે. હુમલાના આરોપમાં એક વ્યક્તિની અટકાયત કરવામાં આવી છે, પરંતુ હજુ સુધી તે શંકાસ્પદ વ્યક્તિની ઓળખ કે તેના પર લાગેલા ચોક્કસ આરોપો અંગે કોઈ સ્પષ્ટ માહિતી બહાર પાડવામાં આવી નથી.

સિક્રેટ સર્વિસના પ્રવક્તાએ જણાવ્યું હતું કે તપાસ ટીમ હાલમાં તમામ તથ્યો અને પુરાવા એકઠા કરી રહી છે. જેવી સંપૂર્ણ માહિતી મળશે, તરત જ અપડેટ આપવામાં આવશે. બીજી તરફ, સિનસિનાટી પોલીસ દ્વારા આ મામલે હજુ સુધી કોઈ તાત્કાલિક પ્રતિક્રિયા આપવામાં આવી નથી. હાલમાં આખા મામલે ઝીણવટભરી તપાસ ચાલી રહી છે.

આ પણ વાંચો-Mutual Fund Tax: મ્યુચ્યુઅલ ફંડમાંથી 1.35 કરોડની કમાણી અને ટેક્સ 0! ઇન્કમ ટેક્સની નોટિસ છતાં NRI મહિલા આ ટ્રિકથી કેસ જીતી ગઈ