શેરબજારના રોકાણકારો માટે મોટા સમાચાર, SEBIના આ 7 નવા પ્રસ્તાવથી બદલાઈ જશે માર્કેટની દિશા

ભારતીય શેરબજાર હાલમાં ખૂબ જ ઝડપથી ગ્રોથ કરી રહ્યું છે. પરંતુ, બજારની સાઇઝ વધવાની સાથે સાથે કેટલાક નવા પડકારો પણ ઊભા થયા છે. આ પડકારોને પહોંચી વળવા, છેતરપિંડી રોકવા અને રોકાણકારો માટે રોકાણની પ્રક્રિયાને એકદમ સરળ બનાવવા માટે માર્કેટ રેગ્યુલેટર SEBI નિયમોમાં મોટા ફેરફારો કરવાની તૈયારી કરી રહ્યું છે.

તાજેતરમાં જ ANMI (એસોસિએશન ઓફ નેશનલ એક્સચેન્જીસ મેમ્બર્સ ઓફ ઈન્ડિયા) ના 16મા ઈન્ટરનેશનલ કેપિટલ માર્કેટ કન્વેન્શનમાં સેબીના ચેરમેન તુહિન કાંતા પાંડેએ આ અંગે મહત્વની માહિતી આપી હતી. તેમણે જણાવ્યું હતું કે ટ્રેડિંગ ટર્મિનલ્સના ખોટા ઉપયોગને રોકવા માટે એક કડક ફ્રેમવર્ક તૈયાર કરવામાં આવી રહ્યું છે. સાથે જ સ્ટોક બ્રોકર્સની સાઇઝ અને તેમની ટેક્નોલોજી પરની નિર્ભરતાના આધારે નવા નિયમો બનાવવામાં આવશે.

શા માટે પડી આ નવા નિયમોની જરૂર?

છેલ્લા કેટલાક સમયથી પ્રોપ્રાયટરી ટ્રેડિંગ ટર્મિનલ્સના ખોટા ઉપયોગની ફરિયાદો સામે આવી રહી હતી. કેટલાક સ્ટોક બ્રોકર્સ પોતાના એકાઉન્ટ દ્વારા અન્ય લોકોને ટ્રેડિંગ કરવાની સુવિધા આપતા હતા અને તેના બદલામાં તેમની પાસેથી ફી વસૂલતા હતા અથવા નફામાં ભાગ પડાવતા હતા. આખી પ્રક્રિયામાં માર્જિન અને અન્ય જરૂરી નિયમોનું ખુલ્લેઆમ ઉલ્લંઘન થતું હતું. આ જ ગેરરીતિ અટકાવવા સેબી એક્શન મોડમાં આવ્યું છે.

1. ટ્રેડિંગ ટર્મિનલ ટ્રેકિંગ: ટ્રેડિંગ ટર્મિનલોને તેમના મીડિયા એક્સેસ કંટ્રોલ એડ્રેસ અને સ્ટેટિક IP એડ્રેસ સાથે જોડવામાં આવશે. આનાથી એ સ્પષ્ટ ખબર પડશે કે ટ્રેડિંગ ક્યાંથી થઈ રહ્યું છે અને ટર્મિનલનો ઉપયોગ કોણ કરી રહ્યું છે.

2. શોર્ટ સેલિંગના નિયમોમાં ફેરફાર: બજારમાં લિક્વિડિટી જાળવી રાખવા માટે શોર્ટ સેલિંગ અને SLB (સિક્યોરિટીઝ લેન્ડિંગ એન્ડ બોરોઇંગ) સાથે જોડાયેલા નિયમોની સમીક્ષા કરવામાં આવી રહી છે.

3. કોર્પોરેટ બોન્ડ્સમાં ટ્રેડિંગ: કોર્પોરેટ બોન્ડની સેકન્ડરી માર્કેટમાં ટ્રેડિંગ વધારવા માટે નવું માળખું બની રહ્યું છે. સેબીના 'Demat 2.0' અભિયાન હેઠળ ટોકનાઇઝ્ડ કોર્પોરેટ બોન્ડની ટ્રેડિંગ યોજના પણ સામેલ છે.

4. ખર્ચમાં ઘટાડો: શેર બાયબેક, ટેન્ડર ઓફર અને ઓફર ફોર સેલ સાથે જોડાયેલા કમ્પ્લાયન્સ ખર્ચને ઘટાડવા માટે કામ ચાલી રહ્યું છે.

5. કોમન રિપોર્ટિંગ પ્લેટફોર્મ: આ પ્લેટફોર્મનો વ્યાપ વધારીને ડિપોઝિટરી સુધી કરવામાં આવશે. એટલે કે, હવે એક જ વાર માહિતી આપવાથી તે સ્ટોક એક્સચેન્જ અને ડિપોઝિટરી બંનેને મળી જશે. વારંવાર માહિતી આપવાની ઝંઝટ ખતમ થશે.

6. ઓટોમેટેડ ફેસિલિટી: ઓટોમેટેડ ગિવ-અપ અને ટેક-અપ સુવિધાનો વિસ્તાર કેશ સેગમેન્ટમાં PMS (પોર્ટફોલિયો મેનેજમેન્ટ સર્વિસીસ) અને AIFs માટે કરવામાં આવશે. આનાથી ક્લાયન્ટ્સના ફંડ બિનજરૂરી રીતે બ્લોક રહેવાની સમસ્યા હલ થશે.

7. AI સેન્ડબોક્સની તૈયારી: માર્કેટમાં નવા આર્ટિફિશિયલ ઇન્ટેલિજન્સ ટુલ્સનું સુરક્ષિત રીતે ટેસ્ટિંગ કરી શકાય તે માટે એક 'AI સેન્ડબોક્સ' બનાવવા પર પણ વિચાર થઈ રહ્યો છે.

વિદેશી રોકાણકારો માટે પણ સારા સમાચાર

આ 7 પ્રસ્તાવો ઉપરાંત, સેબી NRI સહિતના ગ્લોબલ ઇન્વેસ્ટર્સ માટે ભારતીય બજારોમાં રોકાણ કરવાનું વધુ સરળ બનાવવા જઈ રહ્યું છે. આ માટે ડિજિટલ ઓનબોર્ડિંગ, સરળ KYC પ્રોસેસ અને ઓછી કાગળની કાર્યવાહી જેવા ક્રાંતિકારી પગલાં લેવામાં આવશે.

આ પણ વાંચો-Gold Outlook: સોનાના ભાવ રેકોર્ડ હાઈથી 26% તૂટ્યા, શું અત્યારે સોનું ખરીદવાનો આ શ્રેષ્ઠ સમય છે? જાણો નિષ્ણાતોની સલાહ