Stock Market Today: ટ્રેડિંગ કરતા પહેલા આ મોટા સમાચારો પર કરો નજર, આજે શેરબજાર પર પડશે સીધી અસર

Stock Market Today: ભારતીય શેરબજારમાં 27 મેના રોજ કારોબારની શરૂઆત ધીમી અને નબળી રહી શકે છે. જો તમે આજે બજારમાં કોઈપણ ટ્રેડ લેવાનું વિચારી રહ્યા છો, તો ગ્લોબલ માર્કેટના સંકેતો અને અમુક ખાસ સમાચારો પર નજર રાખવી ખૂબ જ જરૂરી છે. આંતરરાષ્ટ્રીય સ્તરેથી મિશ્ર સંકેતો મળી રહ્યા છે, જેની સીધી અસર આજના ટ્રેડિંગ સેશન પર જોવા મળશે.

ગિફ્ટ નિફ્ટી અને ગત સત્રનો માહોલ

શરૂઆતી કારોબારમાં ગિફ્ટ નિફ્ટી 38.50 પોઈન્ટ એટલે કે 0.16% ના ઘટાડા સાથે 23872 ના સ્તરની આસપાસ ટ્રેડ કરી રહ્યો હતો, જે ભારતીય બજારો માટે નબળી શરૂઆતનો સંકેત છે.

અગાઉ 26 મેના રોજ ભારતીય બજારમાં ભારે ઉતાર-ચઢાવ જોવા મળ્યો હતો. પશ્ચિમ એશિયામાં વધતા તણાવ અને F&O ની મંથલી એક્સપાયરીને કારણે બજાર દબાણમાં રહ્યું હતું. ટ્રેડિંગ સેશનના અંતે સેન્સેક્સ 479.26 પોઈન્ટ (0.63%) તૂટીને 76009.70 પર અને નિફ્ટી 118 પોઈન્ટ (0.49%) ના ઘટાડા સાથે 23913.70 ના સ્તર પર બંધ થયો હતો.

અમેરિકન બજાર: મંગળવારે અમેરિકન બજારમાં ટેક શેરોનો દબદબો રહ્યો. AI ની વધતી માંગને કારણે S&P 500 ઈન્ડેક્સ 45.65 પોઈન્ટ (0.61%) વધીને 7519.12 અને Nasdaq 312.21 પોઈન્ટ (1.19%) ઉછળીને 26656.18 ના ઐતિહાસિક રેકોર્ડ હાઈ પર બંધ થયા. જોકે, ડાઉ જોન્સ 118.02 પોઈન્ટ (0.23%) ઘટીને 50461.68 પર બંધ થયો હતો.

એશિયન બજાર: એશિયાઈ બજારોમાં આજે મિશ્ર કારોબાર જોવા મળી રહ્યો છે. જાપાનના નિક્કેઈમાં 0.96%, તાઈવાનના બજારમાં 2.18% અને કોરિયાના કોસ્પીમાં 4.13% ની શાનદાર તેજી જોવા મળી છે. જ્યારે સ્ટ્રેટ્સ ટાઈમ્સ 0.83%, હેંગ સેંગ 0.16% અને શાંઘાઈ કમ્પોઝિટ 0.20% ના ઘટાડા સાથે લાલ નિશાનમાં છે.

FII અને DII નો ફંડ ફ્લો

વિદેશી સંસ્થાકીય રોકાણકારો (FII) દ્વારા વેચવાલીનો દોર ચાલુ છે. ગઈકાલે તેઓએ કેશ અને ફ્યુચર્સમાં કુલ 4300 કરોડ રૂપિયાની વેચવાલી કરી હતી. જો ચોખ્ખા આંકડાની વાત કરીએ તો, 26 મેના રોજ FII એ 2407 કરોડ રૂપિયાના શેર વેચ્યા હતા. તેની સામે સ્થાનિક સંસ્થાકીય રોકાણકારો (DII) એ બજારને સપોર્ટ આપતા 1361 કરોડ રૂપિયાની ખરીદી કરી હતી.

ક્રૂડ ઓઈલ અને જિયોપોલિટિકલ ટેન્શન

અમેરિકા અને ઈરાન વચ્ચે વધી રહેલા તણાવના કારણે કાચા તેલના (ક્રૂડ ઓઈલ) ભાવમાં મજબૂતી આવી છે, જોકે તે હજુ પણ 100 ડોલરની નીચે ટ્રેડ કરી રહ્યું છે. યુદ્ધવિરામ વચ્ચે અમેરિકાના હુમલાથી ઈરાન રોષે ભરાયું છે અને વળતા હુમલાની ચીમકી આપી છે. બીજી તરફ, ડોનાલ્ડ ટ્રમ્પે કેબિનેટની 'વોર મીટિંગ' બોલાવી છે, જેના પર બજારની નજર રહેશે.

Stocks in Focus

Coal India (કોલ ઇન્ડિયા): સરકાર આજે કોલ ઇન્ડિયામાં ઓફર-ફોર-સેલ (OFS) દ્વારા 2% સુધીનો હિસ્સો વેચવા જઈ રહી છે. આજે આ OFS નોન-રિટેલ રોકાણકારો માટે ખુલશે. આ માટે 412 રૂપિયા પ્રતિ શેરની ફ્લોર પ્રાઈસ નક્કી કરાઈ છે, જે લગભગ 10% ડિસ્કાઉન્ટ દર્શાવે છે. આ દ્વારા સરકારની 5000 કરોડ રૂપિયા એકત્ર કરવાની યોજના છે.

Siemens (સિમેન્સ): કંપનીએ પોતાના Q4 ના પરિણામો જાહેર કર્યા છે. કાચા માલની મોંઘવારી અને રૂપિયાની નબળાઈના કારણે કંપનીનો નફો 36% ઘટ્યો છે અને માર્જિનમાં 100 bps નો ઘટાડો નોંધાયો છે. જોકે, આવકમાં 15% નો ઉછાળો જોવા મળ્યો છે. સાથે જ 'સિમેન્સ રેલ ઓટોમેશન' ના કંપનીમાં મર્જરને પણ લીલી ઝંડી મળી ગઈ છે.

આ પણ વાંચો-Gold Price Today: સળંગ બીજા દિવસે સોનું થયું સસ્તું, 5 દિવસની સ્થિરતા બાદ ચાંદીના ભાવ પણ ગગડ્યા