શેરબજારમાં મોટો કડાકો: સેન્સેક્સ 350 પોઈન્ટ તૂટ્યો, નિફ્ટી 24,500ની નીચે; જાણો રોકાણકારોના કરોડો રૂપિયા ડૂબવા પાછળના 4 મોટા કારણો

Share Market Crash: ભારતીય શેરબજારમાં આજે એટલે કે 11 ઓગસ્ટ, 2026ના રોજ શરૂઆતી કારોબારમાં જ ભારે અફરાતફરી જોવા મળી છે. ઘરેલુ સ્ટોક માર્કેટમાં વેચવાલીનું દબાણ એટલું વધારે છે કે સેન્સેક્સ અને નિફ્ટી બંને લાલ નિશાનમાં ટ્રેડ થઈ રહ્યા છે. સેન્સેક્સ 350 પોઈન્ટથી વધુ ગગડ્યો છે, જ્યારે નિફ્ટી પણ મહત્વના સપોર્ટ લેવલ 24,500ની નીચે સરકી ગયો છે.

બજારની અત્યારની સ્થિતિ

આજે સવારે 09:30 વાગ્યે, બીએસઈ સેન્સેક્સ 360.95 પોઈન્ટ અથવા 0.46% ના ઘટાડા સાથે 78,181.49 ના સ્તરે જોવા મળ્યો હતો. બીજી તરફ, એનએસઈ નિફ્ટી 50 પણ 102.20 પોઈન્ટ અથવા 0.42% તૂટીને 24,481.60 પર ટ્રેડ કરી રહ્યો હતો. ઇન્ટ્રા-ડેમાં સેન્સેક્સ 78,171.11 અને નિફ્ટી 24,478.60 ના નીચલા સ્તર સુધી પહોંચી ગયા હતા.

શેરબજારમાં આવેલા આ જોરદાર ઘટાડા પાછળ મુખ્ય 4 કારણો જવાબદાર માનવામાં આવે છે:

અમેરિકી રાષ્ટ્રપતિ ડોનાલ્ડ ટ્રમ્પના એક નિવેદને વૈશ્વિક બજારોમાં ખળભળાટ મચાવી દીધો છે. ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું છે કે, અમેરિકાને અત્યાર સુધી થયેલા તમામ નુકસાનની ભરપાઈ ઈરાને કરવી પડશે. ઈરાન અને અમેરિકા વચ્ચેના આ વધતા તણાવને કારણે રોકાણકારોમાં ડરનો માહોલ છે.

2. ક્રૂડ ઓઈલના ભાવમાં ઉછાળો

અમેરિકા અને ઈરાન વચ્ચે વધેલા તણાવની સીધી અસર Strait of Hormuzમાંથી પસાર થતા જહાજો પર પડી છે. આ રૂટ પર વાહનવ્યવહાર સામાન્ય થવાની આશા ધૂંધળી થતા કાચું તેલ ઉકળી ઉઠ્યું છે. ગ્લોબલ ઓઇલ બેન્ચમાર્ક બ્રેન્ટ ક્રૂડનો ભાવ ઉછળીને 88 ડોલર પ્રતિ બેરલની પાર પહોંચી ગયો છે, જેની સીધી નકારાત્મક અસર શેરબજાર પર પડી છે.

3. નિફ્ટીની વીકલી એક્સપાયરી

આજે નિફ્ટીના ડેરિવેટિવ કોન્ટ્રાક્ટ્સની વીકલી એક્સપાયરી છે. એક્સપાયરીના દિવસે બજારમાં સામાન્ય રીતે વધુ વોલેટિલિટી (ઉતાર-ચઢાવ) જોવા મળતી હોય છે. ટ્રેડર્સ પોતાની પોઝિશન સ્ક્વેર ઓફ કરી રહ્યા હોવાથી બજાર પર દબાણ વધ્યું છે.

4. બેંકિંગ શેરોમાં ભારે વેચવાલી

બજારને પછાડવામાં બેંકિંગ સેક્ટરે મોટી ભૂમિકા ભજવી છે. નિફ્ટી બેંક ઇન્ડેક્સમાં અડધા ટકાથી વધુનો ઘટાડો નોંધાયો છે. એક્સિસ બેંક જેવા મોટા શેર ટોપ લૂઝર્સમાં સામેલ છે. જોકે, આઈટી (IT) સેક્ટર બજારને ટેકો આપવાનો પ્રયાસ કરી રહ્યું છે, પરંતુ બેંકિંગ અને એફએમસીજી સેક્ટરમાં વેચવાલી એટલી હાવી છે કે તે સફળ થઈ રહ્યું નથી.

કોણ વધ્યું અને કોણ ઘટ્યું?

ટોપ ગેનર્સ: એચસીએલ ટેક (HCLTech), ટાઇટન (Titan) અને ટેક મહિન્દ્રા (Tech Mahindra).

ટોપ લૂઝર્સ: ઇન્ડિગો (Indigo), એક્સિસ બેંક (Axis Bank) અને અલ્ટ્રાટેક સિમેન્ટ (UltraTech Cement).

ગઈકાલે 10 ઓગસ્ટના રોજ બજાર સામાન્ય તેજી સાથે બંધ થયું હતું, પરંતુ આજે વૈશ્વિક ભૌગોલિક-રાજકીય તણાવ અને તેલના વધતા ભાવે સેન્ટિમેન્ટ બગાડ્યું છે. રોકાણકારોએ અત્યારે સાવચેતી રાખવી જરૂરી છે, કારણ કે આંતરરાષ્ટ્રીય ઘટનાક્રમની સીધી અસર ભારતીય બજાર પર જોવા મળી રહી છે.

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.