Closing Bell: અંતિમ કલાકોમાં શેરબજારે મારી જોરદાર પલટી, સેન્સેક્સ 938 પોઈન્ટ ઉછળ્યો, નિફ્ટી 23408 પર બંધ, જાણો અચાનક આવું કેમ થયું?

Closing Bell: ભારતીય શેરબજારમાં સપ્તાહના પહેલા ટ્રેડિંગ સેશનમાં એટલે કે સોમવારે  રોકાણકારોને રોલરકોસ્ટર રાઈડ જેવો અનુભવ થયો. સવારથી જ માર્કેટમાં સુસ્તી અને ઉતાર-ચઢાવ જોવા મળી રહ્યો હતો, પરંતુ બપોરે 2:30 વાગ્યા પછી અચાનક જ બજારે એવી પલટી મારી કે રોકાણકારો ખુશ થઈ ગયા. અમુક જ મિનિટોમાં બેન્ચમાર્ક ઈન્ડેક્સ 1 ટકાથી વધુ ઉછળી ગયા હતા.

છેલ્લા કલાકમાં આવેલી આ શાનદાર ખરીદીને કારણે ભારતીય શેરબજાર મજબૂત સ્થિતિમાં બંધ થવામાં સફળ રહ્યું. ચાલો જાણીએ આજના બજારની સંપૂર્ણ સ્થિતિ અને આ અચાનક આવેલી તેજી પાછળના કારણો.

સેન્સેક્સ અને નિફ્ટીની કેવી રહી ચાલ?

30 શેરો ધરાવતો સેન્સેક્સ સવારે 74,415 ના સ્તર પર નરમાશ સાથે ખુલ્યો હતો. આખો દિવસ તેમાં ઉતાર-ચઢાવ ચાલુ રહ્યો. પરંતુ અંતિમ કલાકની ધમાકેદાર ખરીદીને કારણે સેન્સેક્સ 938.93 પોઈન્ટ (1.26 ટકા) ના જંગી ઉછાળા સાથે 75,502.85 ના સ્તર પર બંધ થયો. નિફ્ટી પણ સવારે 23,116 પર સપાટ ખુલ્યો હતો. ટ્રેડિંગ દરમિયાન એક સમયે તે લપસીને 22,955 ના સ્તર સુધી નીચે જતો રહ્યો હતો. જોકે, અંતે નિફ્ટી 257.70 પોઈન્ટ (1.11 ટકા) ની શાનદાર રિકવરી સાથે 23,408 પર બંધ રહ્યો હતો.

માર્કેટ એક્સપર્ટ્સના મતે, આ તેજી પાછળ મુખ્યત્વે અમુક હેવીવેઈટ શેરોનો ફાળો રહ્યો છે. HDFC બેન્ક, ICICI બેન્ક અને રિલાયન્સ ઈન્ડસ્ટ્રીઝ જેવા દિગ્ગજ શેરોમાં અચાનક મોટી ખરીદી નીકળી હતી, જેનાથી આખા બજારને મજબૂત સપોર્ટ મળ્યો. આ ઉપરાંત, તાજેતરમાં ઓટો અને ફાઇનાન્સિયલ સર્વિસિસ સેક્ટરના શેરોમાં જે ઘટાડો આવ્યો હતો, તેને કારણે આ શેરો સસ્તા થયા હતા. આજે રોકાણકારોએ આ નીચા ભાવે દબાવીને ખરીદી કરી, જેને શેરબજારની ભાષામાં 'વેલ્યુ બાઇંગ' કહેવાય છે.

જીઓજીત ફાઇનાન્શિયલ સર્વિસિસના રિસર્ચ હેડ વિનોદ નાયરના જણાવ્યા અનુસાર, "માર્કેટમાં છેલ્લા કલાકમાં ખૂબ સારી રિકવરી જોવા મળી. ઓટો, બેન્કિંગ અને FMCG સેક્ટરમાં નીચા મથાળે ખરીદી થવાથી બજારને ટેકો મળ્યો. સતત ઘટાડા પછી આ એક રાહત આપનારી તેજી છે."

બજાર સામે હજુ પણ છે આ પડકારો

ભૌગોલિક-રાજકીય તણાવ: મધ્ય પૂર્વમાં, ખાસ કરીને હોર્મુઝ સામુદ્રધુનીની સ્થિતિ પર રોકાણકારોની નજર છે. જો સપ્લાયની સ્થિતિ સુધરશે તો બજારને વધુ સપોર્ટ મળશે.

ક્રૂડ ઓઇલ: કાચા તેલના સતત વધી રહેલા ભાવ માર્કેટ પર દબાણ બનાવી રહ્યા છે.

યુએસ ફેડરેશનનો નિર્ણય: અમેરિકાની મધ્યસ્થ બેન્ક (US Fed) ના આગામી વ્યાજદરોના નિર્ણય પર પણ દુનિયાભરના રોકાણકારોની નજર છે. મોંઘવારી અને વૈશ્વિક અશાંતિને જોતા એવું મનાય છે કે હાલ વ્યાજદરોમાં કોઈ ફેરફાર નહીં થાય.

આજના ટોપ ગેનર્સ અને લુઝર્સ

સેન્સેક્સમાં અલ્ટ્રાટેક સિમેન્ટનો શેર સૌથી વધુ 4 ટકા ઉછળીને બંધ થયો હતો. આ સિવાય મહિન્દ્રા એન્ડ મહિન્દ્રા (M&M), HDFC બેન્ક, ટ્રેન્ટ લિમિટેડ, બજાજ ફાઇનાન્સ અને ITC ના શેરમાં સારો ઉછાળો જોવા મળ્યો હતો.

બીજી તરફ ભારત ઈલેક્ટ્રોનિક્સ, સન ફાર્મા, પાવર ગ્રીડ, NTPC, ટાઇટન, ભારતી એરટેલ, TCS અને ઈન્ફોસિસના શેરમાં વેચવાલી અને ઘટાડો નોંધાયો હતો.

સેક્ટોરલ અને બ્રોડર માર્કેટની સ્થિતિ

સેક્ટર્સની વાત કરીએ તો, નિફ્ટી ઓટો સૌથી વધુ 1.67 ટકાના ઉછાળા સાથે ટોપ પર રહ્યો હતો. ત્યારબાદ ફાઇનાન્સિયલ સર્વિસિસ અને પ્રાઇવેટ બેન્કોના શેરોએ જોરદાર પ્રદર્શન કર્યું. સામે પક્ષે ઓઇલ એન્ડ ગેસ અને રિયલ્ટી શેરોમાં સૌથી વધુ દબાણ જોવા મળ્યું. નોંધનીય બાબત એ રહી કે, લાર્જકેપની સરખામણીમાં મિડકેપ અને સ્મોલકેપ શેરોમાં આજે નબળાઈ જોવા મળી. નિફ્ટી મિડકેપ ઈન્ડેક્સ 0.43 ટકા અને સ્મોલકેપ ઈન્ડેક્સ 0.65 ટકાના ઘટાડા સાથે લાલ નિશાનમાં બંધ થયા હતા.

ગ્લોબલ માર્કેટમાં છવાઈ નિરાશા

સોમવારે એશિયન બજારોમાં શરૂઆતથી જ દબાણ હતું. રોકાણકારોને ડર છે કે મોંઘું ક્રૂડ ઓઇલ ફરીથી મોંઘવારી વધારી શકે છે. જાપાનનો નિક્કેઈ 225 ઈન્ડેક્સ 0.73 ટકા અને દક્ષિણ કોરિયાનો કોસ્પી 0.20 ટકા ઘટીને ટ્રેડ થતો જોવા મળ્યો હતો. આ અગાઉ અમેરિકન બજારોમાં પણ શુક્રવારે ઘટાડો નોંધાયો હતો, જ્યાં S&P 500 ઈન્ડેક્સ 0.61 ટકા અને ડાઉ જોન્સ 0.26 ટકા ઘટીને બંધ થયા હતા.

આ પણ વાંચો-Fino Payments Bank Share: EDની તપાસના ડરથી ફિનો પેમેન્ટ્સ બેન્કના શેરમાં 16%નો કડાકો, જાણો શું છે આખો વિવાદ?