Gold Prices: સોનાના ભાવ કેમ આસમાને પહોંચ્યા? નાણામંત્રી નિર્મલા સીતારમણે આપ્યું સાચું કારણ, જાણો શું કહ્યું

Gold Prices: છેલ્લા કેટલાક સમયથી સોનાના ભાવમાં જે રીતે આગ લાગી છે, તેનાથી સામાન્ય માણસથી લઈને રોકાણકારો સૌ કોઈ આશ્ચર્યમાં છે. સોનાની કિંમતો અટકવાનું નામ નથી લઈ રહી. આખરે સોનું આટલું મોંઘું કેમ થઈ રહ્યું છે ? આ સવાલનો જવાબ હવે ખુદ દેશના નાણામંત્રી નિર્મલા સીતારમણે આપ્યો છે.

રવિવારે, 23 ફેબ્રુઆરીના રોજ રિઝર્વ બેંક ઓફ ઈન્ડિયા (RBI) ના સેન્ટ્રલ બોર્ડની બેઠક બાદ મીડિયા સાથે વાત કરતા નિર્મલા સીતારમણે સોનાની તેજી પાછળનું મુખ્ય કારણ જણાવ્યું હતું.

નાણામંત્રીએ શું કહ્યું?

નિર્મલા સીતારમણે સ્પષ્ટ શબ્દોમાં કહ્યું કે, "સોનાના ભાવ એટલા માટે વધી રહ્યા છે કારણ કે દુનિયાભરની સેન્ટ્રલ બેંકો મોટા પાયે સોનાની ખરીદી કરી રહી છે." તેમણે વધુમાં ઉમેર્યું કે આ કોઈ કામચલાઉ તેજી નથી, પરંતુ ગ્લોબલ રિઝર્વ સ્ટ્રેટેજીમાં આવી રહેલા મોટા ફેરફારનો સંકેત છે. એટલે કે, દેશો હવે ડોલરના બદલે સોનામાં સુરક્ષિત રોકાણ કરવાનું વધુ પસંદ કરી રહ્યા છે.

નાણામંત્રી ઉપરાંત બજારના જાણકારોનું કહેવું છે કે અમેરિકા અને ઈરાન વચ્ચેના તણાવ અને ડોનાલ્ડ ટ્રમ્પ દ્વારા ટેરિફ વધારવાની વાતોને કારણે પણ બજારમાં ડરનો માહોલ છે. જ્યારે પણ અનિશ્ચિતતા વધે છે, ત્યારે રોકાણકારો સુરક્ષિત રોકાણ તરીકે સોના તરફ વળે છે, જેના કારણે ભાવો વધે છે.

MCX પર સોના-ચાંદીની સ્થિતિ

ભારતીય બજારની વાત કરીએ તો, મલ્ટી કોમોડિટી એક્સચેન્જ (MCX) પર સોનાના ભાવમાં ઉછાળો જોવા મળ્યો છે.

સોનું: 24 કેરેટ સોનું 1,60,049 રૂપિયા પ્રતિ 10 ગ્રામના ભાવે ખુલ્યું હતું, જે પાછલા બંધ ભાવ કરતા 2.02% વધુ હતું. બાદમાં તે 1,59,239 રૂપિયા આસપાસ ટ્રેડ કરતું જોવા મળ્યું.

ચાંદી: ચાંદીમાં પણ તોતિંગ તેજી જોવા મળી છે. ચાંદીના ભાવ 4% થી વધુ વધીને 2,63,193 રૂપિયા પ્રતિ કિલોગ્રામ સુધી પહોંચી ગયા છે.

શું ભાવ હજુ વધશે?

Enrich Money ના સીઈઓ પોનમુડી આરના જણાવ્યા મુજબ, સોનાનો લાંબા ગાળાનો ટ્રેન્ડ પોઝિટિવ છે. જો સોનાના ભાવ 1,60,800 રૂપિયાની ઉપર ટકી રહે છે, તો મધ્યમ ગાળામાં તે 1,65,000 થી 1,75,000 રૂપિયા પ્રતિ 10 ગ્રામ સુધી જઈ શકે છે. હાલમાં MCX પર સોનાને 1,45,000 થી 1,50,000 રૂપિયા વચ્ચે મજબૂત સપોર્ટ મળી રહ્યો છે.

RBI ગવર્નરે શું કહ્યું?

આ દરમિયાન RBI ગવર્નર સંજય મલ્હોત્રાએ એક મહત્વની વાત કહી કે ભલે સોનાના ભાવ વધ્યા છે, પરંતુ આયાત ઓર્ડરની કુલ વેલ્યુમાં બહુ મોટો વધારો થયો નથી. આનો અર્થ એ છે કે ભાવ વધ્યા છે પરંતુ જથ્થાની દ્રષ્ટિએ આયાતમાં તેટલો ઉછાળો નથી.

નાણામંત્રીએ અંતમાં કહ્યું કે ભારત અન્ય દેશો સાથે મુક્ત વ્યાપાર કરાર (FTA) કરવાનું ચાલુ રાખશે, કારણ કે તેનાથી ભારતીય અર્થવ્યવસ્થાને ફાયદો થાય છે. વૈશ્વિક અનિશ્ચિતતાઓ વચ્ચે પણ ભારત વિદેશી રોકાણ માટે એક સ્થિર અને ભરોસાપાત્ર દેશ છે.

આ પણ વાંચો-Market outlook : બજાર વધારા સાથે બંધ, જાણો 24 ફેબ્રુઆરીએ સેન્સેક્સ અને નિફ્ટીની કેવી રહેશે ચાલ