Market Outlook : ભારે ઘટાડા સાથે બજાર બંધ, રોકાણકારોના 6 લાખ કરોડ સ્વાહા, જાણો 24 જૂને કેવી રહેશે માર્કેટની ચાલ

Market Outlook : મંગળવારે, 23 જૂનના રોજ ભારતીય શેર બજારમાં ભારે વેચવાલીનું દબાણ જોવા મળ્યું હતું. શરૂઆતી કારોબારથી જ માર્કેટના તમામ સેગમેન્ટ્સમાં નબળાઈ જોવા મળી, જેના પરિણામે બેન્ચમાર્ક ઈન્ડેક્સ 1 ટકાથી વધુ તૂટીને બંધ થયા. તાજેતરની શાનદાર તેજી બાદ રોકાણકારોએ મોટા પાયે નફો બુક કરતા બજાર લાલ નિશાનમાં સમેટાયું હતું.

કારોબારના અંતે BSE સેન્સેક્સ 893 પોઈન્ટ એટલે કે 1.16 ટકા ગગડીને 76,200.68 ની સપાટી પર બંધ રહ્યો હતો. આ જ રીતે નિફ્ટી 50 ઈન્ડેક્સ 279 પોઈન્ટ અથવા 1.16 ટકા તૂટીને 23,824.10 પર બંધ થયો હતો. બ્રોડર માર્કેટમાં પણ સારો એવો કડાકો બોલ્યો છે; નિફ્ટી મિડકેપ 100 માં 1.05 ટકા અને નિફ્ટી સ્મોલકેપ 100 માં 0.48 ટકાનો ઘટાડો નોંધાયો છે.

માર્કેટ કેપમાં 6 લાખ કરોડનું ધોવાણ

ભારે વેચવાલીના કારણે BSE પર લિસ્ટેડ કંપનીઓનું કુલ માર્કેટ કેપિટલાઈઝેશન 480.6 લાખ કરોડ રૂપિયાથી ઘટીને 475 લાખ કરોડ રૂપિયાની નીચે આવી ગયું છે. સરળ શબ્દોમાં કહીએ તો, માત્ર એક જ દિવસમાં રોકાણકારોને લગભગ 6 લાખ કરોડ રૂપિયાનું જંગી નુકસાન વેઠવાનો વારો આવ્યો છે.

બજારમાં અચાનક આવેલા આ કડાકા પાછળ નબળું ચોમાસું અને બિઝનેસના નબળા આંકડા મુખ્યત્વે જવાબદાર છે.

PMI ડેટામાં ઘટાડો

ભારતની સર્વિસ એક્ટિવિટી જૂન મહિનામાં 17 મહિનાના નીચલા સ્તરે પહોંચી ગઈ છે, જ્યારે મેન્યુફેક્ચરિંગ ગ્રોથ 3 મહિનાના તળિયે છે. HSBC ફ્લેશ ઈન્ડિયા મેન્યુફેક્ચરિંગ PMI આંકડો મે મહિનાના 58.0 થી ઘટીને જૂનમાં 57.4 થયો છે.

નબળું ચોમાસું

આ વર્ષે અલ-નીનોની અસર વચ્ચે દેશના 450 થી વધુ જિલ્લાઓમાં વરસાદ ખેંચાયો છે. ચોમાસાની ધીમી શરૂઆતથી ગ્રામીણ આવક, ખેતી અને પાણીની સપ્લાય અંગે ચિંતાઓ વધી છે.

પ્રોફિટ બુકિંગ

જિયોજિત ઈન્વેસ્ટમેન્ટ્સના રિસર્ચ હેડ વિનોદ નાયરના જણાવ્યા અનુસાર, ગ્લોબલ માર્કેટમાં અનિશ્ચિતતા અને સતત તેજી બાદ આવેલા સ્વાભાવિક પ્રોફિટ બુકિંગના કારણે બજાર દબાણમાં આવ્યું છે.

સેક્ટરલ પરફોર્મન્સ: મેટલ અને IT સૌથી વધુ તૂટ્યા

આજના કારોબારમાં મેટલ સેક્ટર સૌથી વધુ 3.22 ટકા તૂટ્યું છે. આ ઉપરાંત નિફ્ટી IT (2.23%), PSU બેંક (1.97%), કન્ઝ્યુમર ડ્યુરેબલ્સ (1.50%) અને મીડિયા (1.47%) જેવા સેક્ટર્સમાં મોટો ઘટાડો જોવા મળ્યો. નિફ્ટી બેંક 1.30% અને રિયલ્ટી 1.12% ડાઉન રહ્યા. જોકે, આ નબળા માહોલ વચ્ચે પણ ફાર્મા સેક્ટરે પોતાનો દબદબો જાળવી રાખ્યો હતો. નિફ્ટી ફાર્મા ઈન્ડેક્સ 0.92 ટકા અને BSE હેલ્થકેર 0.62 ટકા વધીને ગ્રીન ઝોનમાં બંધ થયા હતા.

નિફ્ટી અને બેંક નિફ્ટીનું ટેકનિકલ એનાલિસિસ

નિફ્ટી 50

SBI સિક્યોરિટીઝના રિસર્ચ હેડ સુદીપ શાહના મતે, નિફ્ટી માટે 23,650–23,630 નો ઝોન અત્યંત મજબૂત સપોર્ટ છે. જો આ લેવલ તૂટશે તો નિફ્ટી 23,500 સુધી સરકી શકે છે. જ્યારે ઉપરની તરફ 23,930–23,950 નો ઝોન મોટો રેઝિસ્ટન્સ બનશે.

ગ્લોબ કેપિટલ માર્કેટના વિપિન કુમારનું માનવું છે કે જો નિફ્ટી 23,950 થી ઉપર ટકે તો તે ફરી 24,200 ની સપાટી બતાવી શકે છે.

બેંક નિફ્ટી

બેંક નિફ્ટી 1.30 ટકા ઘટીને 57,200 ની આસપાસ બંધ થયો છે. ડેઈલી ચાર્ટ પર બનેલી 'બેરિશ કેન્ડલ' ઉપલા મથાળે વેચવાલીનું દબાણ દર્શાવે છે. બેંક નિફ્ટી માટે હવે 56,800–56,700 નો ઝોન તાત્કાલિક સપોર્ટ છે. આ તૂટશે તો 20-ડે EMA મુજબ 56,173 નો સપોર્ટ જોવા મળશે. જ્યારે ઉપરની બાજુએ 57,500–57,600 નું લેવલ એક મજબૂત અવરોધ સાબિત થઈ શકે છે.

રોકાણકારોએ હવે ગ્લોબલ આઈટી સેક્ટરના અપડેટ્સ, રૂપિયાની ચાલ અને વિદેશી રોકાણકારોના ડેટા પર ઝીણવટભરી નજર રાખવી પડશે.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Railway Stocks: રેલવેના 50000 કરોડના 'કવચ પ્રોજેક્ટ'થી આ 3 કંપનીઓને થશે બમ્પર કમાણી, રોકાણકારો માટે મોટી તક