શેરબજારમાં રોકેટ ગતિ: સેન્સેક્સ 427 પોઈન્ટ ઉછળ્યો, નિફ્ટી 24,300ને પાર; જાણો રોકાણકારોને માલામાલ કરનારા 5 મોટા કારણો

Share Market Rise: ભારતીય શેરબજાર માટે આજનો દિવસ ખૂબ જ ઉત્સાહજનક રહ્યો છે. શુક્રવારે બજાર ખૂલતાની સાથે જ રોકાણકારોમાં ભારે આશાવાદ જોવા મળ્યો હતો. છેલ્લા કેટલાક દિવસોના ઉતાર-ચઢાવ બાદ આજે માર્કેટમાં 'હરિયાળી' જોવા મળી છે. સેન્સેક્સ અને નિફ્ટી બંને ઇન્ડેક્સ મજબૂત ઉછાળા સાથે ટ્રેડ કરી રહ્યા છે.

બજારની આજની ચાલ

શુક્રવારે સવારે શેરબજારની શરૂઆત મામૂલી ઘટાડા સાથે લાલ નિશાનમાં થઈ હતી, પરંતુ ગણતરીની મિનિટોમાં જ બજારે યુ-ટર્ન લીધો અને તેજી પકડી હતી. સેન્સેક્સ તેની અગાઉની ક્લોઝિંગ કરતા 427.14 પોઈન્ટ ઉછળીને 78,415.82 ના હાઈ લેવલ પર પહોંચ્યો હતો. તેવી જ રીતે, નિફ્ટી પણ 126.35 પોઈન્ટના વધારા સાથે 24,323.10ની ઊંચી સપાટીએ પહોંચી ગયો હતો.

ઉલ્લેખનીય છે કે, ગુરુવારે બજારમાં થોડો ઘટાડો હતો, જેમાં સેન્સેક્સ 122.56 પોઈન્ટ ઘટીને 77,988.68 પર અને નિફ્ટી 34.55 પોઈન્ટ ઘટીને 24,196.75 પર બંધ થયો હતો.

1. જિયોપોલિટિકલ તણાવમાં ઘટાડો

વિશ્વ સ્તરે યુદ્ધની સ્થિતિમાં થોડી રાહત મળતા રોકાણકારોનો ભરોસો વધ્યો છે. ઈઝરાયેલ અને લેબનાન વચ્ચે 10 દિવસના અસ્થાયી સંઘર્ષવિરામ (Ceasefire) પર સહમતિ બની છે. આ ઉપરાંત, અમેરિકા અને ઈરાન વચ્ચે ફરી વાતચીત શરૂ થવાની આશા જાગી છે. ડોનાલ્ડ ટ્રમ્પે પણ સંકેત આપ્યા છે કે જો પરિસ્થિતિ સુધરશે તો તેઓ પાકિસ્તાનની મુલાકાત લઈ શકે છે, જેણે બજારના સેન્ટિમેન્ટને મજબૂત કર્યું છે.

2. ક્રૂડ ઓઈલના ભાવમાં ઘટાડો

ભારત માટે સૌથી રાહતના સમાચાર એ છે કે આંતરરાષ્ટ્રીય બજારમાં ક્રૂડ ઓઈલની કિંમત 100 ડોલર પ્રતિ બેરલની નીચે છે. ભારત તેલનો મોટો આયાતકાર દેશ હોવાથી ક્રૂડના ભાવ ઘટવાને કારણે મોંઘવારી પર કાબૂ મેળવવામાં મદદ મળે છે અને દેશનું ઈમ્પોર્ટ બિલ પણ ઘટે છે.

3. ગ્લોબલ માર્કેટમાં તેજીનો કરંટ

ગુરુવારે અમેરિકી અને યુરોપિયન બજારોમાં તેજી જોવા મળી હતી. અમેરિકાના પ્રખ્યાત ઇન્ડેક્સ S&P 500 અને Nasdaq નવા રેકોર્ડ સ્તરે બંધ થયા હતા. વૈશ્વિક બજારોમાંથી મળેલા પોઝિટિવ સંકેતોની સીધી અસર ભારતીય બજાર પર જોવા મળી છે.

4. વિદેશી રોકાણકારો (FII) ની ખરીદી

છેલ્લા ઘણા સમયથી વેચવાલી કરી રહેલા વિદેશી સંસ્થાકીય રોકાણકારો (FII) ફરી એકવાર ખરીદદાર બન્યા છે. ગુરુવારે FIIએ બજારમાં શુદ્ધ 382.36 કરોડ રૂપિયાના શેરની ખરીદી કરી હતી. જ્યારે વિદેશી રોકાણકારો નાણાં ઠાલવે છે ત્યારે બજારમાં તેજી આવવી સ્વાભાવિક છે.

5. રૂપિયાની મજબૂતી

ભારતીય રૂપિયો આજે શરૂઆતી કારોબારમાં અમેરિકી ડોલર સામે 28 પૈસા મજબૂત થઈને 92.86 ના સ્તરે પહોંચ્યો હતો. રૂપિયાની આ મજબૂતી પણ શેરબજારના ઉછાળામાં મહત્વનું પરિબળ સાબિત થઈ છે.

એક તરફ જ્યારે એશિયન બજારો જેવા કે જાપાનનો નિક્કેઈ અને ચીનનો શાંઘાઈ કમ્પોઝિટ ઘટાડા સાથે ટ્રેડ કરી રહ્યા છે, ત્યારે ભારતીય શેરબજારમાં આવેલી આ તેજી રોકાણકારો માટે મોટી રાહત સમાન છે. નિષ્ણાતોના મતે જો વૈશ્વિક સંકેતો હજુ પણ સકારાત્મક રહેશે, તો આગામી દિવસોમાં બજાર નવી ઊંચાઈઓ સર કરી શકે છે.

આ પણ વાંચો- શેરબજારમાં હવે સાવધ રહેવાની જરૂર? નિફ્ટીમાં પ્રોફિટ બુકિંગના સંકેત, જાણો કયા શેરોમાં છે કમાણીની મોટી તક