Closing Bell : સેન્સેક્સ 555 પોઈન્ટ ગગડ્યો, નિફ્ટી 23650ની નીચે બંધ, બેન્કિંગ શેરોમાં ભારે વેચવાલી

Closing Bell : મંગળવાર, 8 સપ્ટેમ્બરના રોજ ભારતીય શેરબજારમાં નિરાશાજનક માહોલ જોવા મળ્યો છે. આજના ટ્રેડિંગ સેશનના અંતે બજાર મોટા ઘટાડા સાથે બંધ થયું છે. ખાસ કરીને બેન્કિંગ સેક્ટરના શેરોમાં ભારે વેચવાલીનું દબાણ રહ્યું હતું, જેના કારણે બજારના મુખ્ય ઈન્ડેક્સ લાલ નિશાનમાં બંધ થયા છે.

માર્કેટ ક્લોઝિંગ: સેન્સેક્સ અને નિફ્ટીની સ્થિતિ

આંકડાકીય રીતે જોઈએ તો, બોમ્બે સ્ટોક એક્સચેન્જનો સેન્સેક્સ 555.23 પોઈન્ટ એટલે કે 0.73% ના મોટા ઘટાડા સાથે 75577.58 ના સ્તરે બંધ થયો છે. બીજી તરફ, નેશનલ સ્ટોક એક્સચેન્જનો નિફ્ટી પણ ટકી શક્યો ન હતો. નિફ્ટી 144.05 પોઈન્ટ અથવા 0.61% તૂટીને 23650 ની મહત્વની સપાટી ગુમાવીને 23635.10 પર બંધ થયો છે.

આજના કારોબારમાં બજારની એકંદર સ્થિતિ પર નજર કરીએ તો, બીએસઈ પર લગભગ 2025 શેરોમાં તેજી જોવા મળી હતી. જ્યારે 2174 શેરો નુકસાન સાથે બંધ થયા છે અને 178 શેરોના ભાવમાં કોઈ જ ફેરફાર નોંધાયો ન હતો.

બજારમાં આજના ઉતાર-ચઢાવ વચ્ચે અમુક શેરોએ રોકાણકારોને નિરાશ કર્યા તો અમુકે કમાણી કરાવી છે.

Top Losers

નિફ્ટીમાં આજે ICICI બેન્ક, એક્સિસ બેન્ક, SBI લાઈફ ઈન્સ્યોરન્સ, L&T, રિલાયન્સ ઈન્ડસ્ટ્રીઝ અને અલ્ટ્રાટેક સિમેન્ટના શેરોમાં સૌથી વધુ ધોવાણ જોવા મળ્યું હતું.

Top Gainers

આ પડતા બજારમાં પણ ભારત ઈલેક્ટ્રોનિક્સ, ONGC, HUL, આયશર મોટર્સ અને અદાણી પોર્ટ્સના શેરો લીલા નિશાનમાં બંધ થઈને નફો આપવા સફળ રહ્યા હતા.

સેક્ટરલ ઈન્ડેક્સની ચાલ: ક્યાં રહી તેજી અને ક્યાં ઘટાડો?

સેક્ટર મુજબ જોઈએ તો બેન્કિંગ શેરોએ બજારનો મૂડ બગાડ્યો હતો. પ્રાઈવેટ બેન્ક ઈન્ડેક્સમાં સૌથી વધુ 1% નો ઘટાડો નોંધાયો છે. આ ઉપરાંત ઓઈલ એન્ડ ગેસ ઈન્ડેક્સમાં 0.67%, નિફ્ટી બેન્કમાં 0.5% અને IT સેક્ટરમાં 0.37% ની નબળાઈ જોવા મળી છે. બજારના આ ઘટાડા વચ્ચે મીડિયા શેરોએ રોકાણકારોનું ધ્યાન ખેંચ્યું છે. મીડિયા ઈન્ડેક્સમાં સૌથી વધુ 1.3% નો ઉછાળો આવ્યો છે. આ સાથે જ ફાર્મા ઈન્ડેક્સ 0.7% અને FMCG ઈન્ડેક્સ 0.35% ના વધારા સાથે બંધ થયા છે.

આ પણ વાંચો-Trading Plan : ક્રૂડ ઓઇલ અને બોન્ડ યીલ્ડે બગાડ્યો માર્કેટનો મૂડ, જાણો નિફ્ટી અને બેન્ક નિફ્ટી માટે આવતીકાલની રણનીતિ