Share Market : સેન્સેક્સ 822 પોઈન્ટ તૂટ્યો, નિફ્ટી 23,100ની નીચે સરક્યો, રોકાણકારોમાં ફફડાટ

Share Market : ગ્લોબલ માર્કેટમાંથી આવી રહેલા ખરાબ સમાચારો અને પશ્ચિમ એશિયામાં વધતા તણાવના કારણે આજે ભારતીય શેરબજારની શરૂઆત ખૂબ જ આંચકાજનક રહી છે. અઠવાડિયાના પ્રથમ ટ્રેડિંગ દિવસે જ બજારમાં મોટો કડાકો જોવા મળ્યો છે. સેન્સેક્સ અને નિફ્ટી બંને ઇન્ડેક્સ ભારે ઘટાડા સાથે ખૂલ્યા છે, જેના કારણે રોકાણકારોમાં ચિંતાનો માહોલ છે. બજાર ખૂલતાની સાથે જ રૂપિયો પણ નબળો પડતો જોવા મળ્યો છે.

શરૂઆતી કારોબારમાં જ માર્કેટ ધડામ

સોમવારે સવારે બજાર ખુલતાની સાથે જ સેન્સેક્સ 821.73 પોઈન્ટ એટલે કે 1.11 ટકાના મોટા ઘટાડા સાથે 73,421.61 ના સ્તર પર કારોબાર કરતો જોવા મળ્યો હતો. બીજી તરફ, નિફ્ટી 50 ઇન્ડેક્સ પણ 286.00 પોઈન્ટ એટલે કે 1.22 ટકા તૂટીને 23,080.70 ના સ્તર પર આવી ગયો હતો. બજારની આ નબળી શરૂઆતે બુલ્સને બેકફૂટ પર ધકેલી દીધા છે.

કેમ તૂટ્યું શેરબજાર? આ રહ્યું મોટું કારણ

પ્રી-ઓપનિંગ અને ગિફ્ટ નિફ્ટીમાં જ મળી ગયા હતા સંકેતો

આજે સવારથી જ ગિફ્ટ નિફ્ટીના ટ્રેન્ડ્સ ભારતીય બજાર માટે મોટા ગેપ-ડાઉન ઓપનિંગનો ઈશારો કરી રહ્યા હતા. શરૂઆતમાં ગિફ્ટ નિફ્ટી 41.50 પોઈન્ટની નજીવી બઢત સાથે 23,139 ના સ્તરે દેખાયો હતો, પરંતુ ગ્લોબલ પ્રેશર વધતા તે 23,118 ના લેવલ પર આવી ગયો હતો, જે નિફ્ટી ફ્યુચર્સના અગાઉના ક્લોઝિંગ કરતા લગભગ 334 પોઈન્ટ નીચે હતો.

પ્રી-ઓપનિંગ સેશનમાં જ બજાર પર ભારે દબાણ સાફ દેખાઈ રહ્યું હતું. પ્રી-ઓપનિંગ દરમિયાન સેન્સેક્સ 399.74 પોઈન્ટ (0.54%) ઘટીને 73,843.60 પર અને નિફ્ટી 243.05 પોઈન્ટ (1.04%) ઘટીને 23,123.65 ના સ્તર પર ટ્રેડ થઈ રહ્યો હતો.

અગાઉના સત્રની સ્થિતિ પણ નબળી હતી

આ પહેલા શુક્રવારે પણ રિઝર્વ બેંક ઓફ ઈન્ડિયાની મોનેટરી પોલિસીની જાહેરાત બાદ ભારતીય શેરબજાર ઘટાડા સાથે બંધ થયું હતું. તે દિવસે નિફ્ટી 50 ઇન્ડેક્સ 23,400 ની સપાટી તોડીને નીચે આવી ગયો હતો. શુક્રવારે સેન્સેક્સ 116.67 પોઈન્ટ ઘટીને 74,243.34 પર અને નિફ્ટી 49.85 પોઈન્ટ ઘટીને 23,366.70 પર બંધ રહ્યો હતો.

આ પણ વાંચો-નિફ્ટી બેંક ટ્રેડર્સ એલર્ટ: આ લેવલ પાર થયું તો શેરબજારમાં રોકેટ જેવી તેજી, તૂટ્યું તો મચશે હાહાકાર