Stock Market Crash: મિડલ ઈસ્ટમાં યુદ્ધના ભણકારા વચ્ચે શેરબજારમાં હાહાકાર, રોકાણકારોના 8 લાખ કરોડ ડૂબ્યા, આ 10 શેરો પર સીધી અસર

Iran Israel conflict impact on market: ઈરાન અને મિડલ ઈસ્ટ (પશ્ચિમ એશિયા) માં યુદ્ધ જેવી સ્થિતિ ઊભી થતાં તેની સીધી અસર ભારતીય શેરબજાર પર જોવા મળી છે. 2 માર્ચના રોજ શેરબજાર ખૂલતાની સાથે જ ભારે વેચવાલી (Sell-off) શરૂ થઈ ગઈ હતી. શરૂઆતની થોડી જ મિનિટોમાં રોકાણકારોના 8 લાખ કરોડ રૂપિયાથી વધુ સ્વાહા થઈ ગયા હતા. સેન્સેક્સમાં પણ 1400 પોઈન્ટ જેટલો મોટો કડાકો જોવા મળ્યો હતો.

મિડલ ઈસ્ટમાં તણાવ વધવાને કારણે એવી કંપનીઓના શેરમાં સૌથી વધુ ઘટાડો જોવા મળ્યો છે, જેમનો બિઝનેસ અથવા ઓર્ડર બુક આ વિસ્તાર સાથે જોડાયેલી છે. બીજી તરફ, યુદ્ધના માહોલના કારણે અમુક કંપનીઓના શેરમાં મોટો ઉછાળો પણ નોંધાયો છે. ચાલો જોઈએ એવા 10 શેરોની લિસ્ટ, જેના પર આ સંકટની સૌથી મોટી અસર પડી છે:

આ શેરોમાં જોવા મળ્યો મોટો ઘટાડો:

લાર્સન એન્ડ ટુબ્રો (L&T): દેશની સૌથી મોટી ઇન્ફ્રાસ્ટ્રક્ચર કંપનીના શેરમાં શરૂઆતી કારોબારમાં 5% થી વધુનો ઘટાડો નોંધાયો. કંપનીની કુલ ઓર્ડર બુકનો લગભગ 35% હિસ્સો મિડલ ઈસ્ટમાંથી આવે છે, જેના કારણે રોકાણકારો ચિંતામાં મુકાયા છે.

કલ્પતરુ પ્રોજેક્ટ્સ (Kalpataru Projects): કંપનીના શેર 3% થી વધુ તૂટ્યા છે. ચાલુ નાણાકીય વર્ષના પહેલા 9 મહિનામાં કંપનીની 11% ઓર્ડર બુક મિડલ ઈસ્ટ સાથે જોડાયેલી રહી છે. આ વિસ્તારમાં મોટા પ્રોજેક્ટ્સ માટે આ કંપની સૌથી ઓછી બોલી લગાવવા માટે જાણીતી છે.

એફએમસીજી અને ચોખાની નિકાસ કરતી કંપનીઓ: મિડલ ઈસ્ટ એ ભારતીય બાસમતી ચોખા માટેનું બહુ મોટું માર્કેટ છે. KRBL ને તેની બાસમતી ચોખાની નિકાસની આવકનો 61% હિસ્સો મિડલ ઈસ્ટ અને GCC વિસ્તારમાંથી મળે છે, જેના કારણે તેનો શેર 2% તૂટ્યો. આ ઉપરાંત LT Foods નો શેર 8% અને ચમન લાલ સેતિયા એક્સપોર્ટ્સનો શેર 4% ના ઘટાડા સાથે ટ્રેડ થતો જોવા મળ્યો. નાણાકીય વર્ષ 2025 માં LT Foods ની 9% આવક મિડલ ઈસ્ટમાં એક્સપોર્ટ કરવાથી આવી હતી.

ઈન્ડિગો (IndiGo): દેશની સૌથી મોટી એરલાઈન ઈન્ડિગોના શેરમાં 5% નો ઘટાડો નોંધાયો છે. ઈરાનની જવાબી કાર્યવાહી અને તણાવની અસર દુબઈ, અબુ ધાબી અને દોહા જેવા એર રૂટ પર પડી છે, જે એવિએશન સેક્ટર માટે ખૂબ મહત્ત્વના ટ્રાન્ઝિટ હબ છે. એટલું જ નહીં, દુબઈ ભારતીય પ્રવાસીઓ માટે પણ એક મોટું ટુરિસ્ટ ડેસ્ટિનેશન છે.

આ શેરોને થયો બમ્પર ફાયદો:

ONGC અને Oil India: પશ્ચિમ એશિયામાં યુદ્ધના ભણકારા વચ્ચે કાચા તેલ (Crude Oil) ની કિંમતોમાં ભડકો થયો છે. આનો સીધો ફાયદો સરકારી ઓઈલ કંપનીઓને થયો છે. ઓઈલ એન્ડ નેચરલ ગેસ કોર્પોરેશન (ONGC) અને ઓઈલ ઈન્ડિયાના શેરમાં 3% થી 4% નો ઉછાળો જોવા મળ્યો છે. ક્રૂડ મોંઘુ થવાથી આ કંપનીઓની કમાણી વધવાની આશા છે.

ડિફેન્સ શેરો (Defence Stocks): યુદ્ધના માહોલ વચ્ચે ભારતીય ડિફેન્સ કંપનીઓના શેરમાં જબરદસ્ત તેજી આવી છે. પારસ ડિફેન્સ અને આઈડિયાફોર્જ (ideaForge) ના શેર 10% સુધી ઉછળી ગયા હતા. જ્યારે ભારત ડાયનેમિક્સ અને ડેટા પેટર્ન્સના શેરમાં પણ 3% થી 4% નો વધારો જોવા મળ્યો છે. ઈરાન, ઈઝરાયેલ અને અમેરિકા વચ્ચે તણાવ વધવાથી ડિફેન્સના સાધનો અને તેને બનાવવા માટે જરૂરી પાર્ટ્સની માંગ વધવાની પૂરી શક્યતા છે, તેથી આ શેરો રોકેટ બન્યા છે.

મિડલ ઈસ્ટના સંકટે શેરબજારના સમીકરણો સંપૂર્ણપણે બદલી નાખ્યા છે. જે કંપનીઓનો બિઝનેસ ગલ્ફ દેશો પર નિર્ભર છે તેમને મોટું નુકસાન વેઠવાનો વારો આવ્યો છે, જ્યારે આંતરરાષ્ટ્રીય તણાવને કારણે ઓઈલ અને ડિફેન્સ સેક્ટરમાં તેજીનો પવન ફૂંકાયો છે.

આ પણ વાંચો- ક્રૂડ ઓઈલમાં 4 વર્ષની સૌથી મોટી તેજી: ભાવ $80 પાર, મિડલ ઈસ્ટના ટેન્શનથી શેરબજારનું મૂડ બગડ્યું

(ડિસ્ક્લેમર: અહીં આપવામાં આવેલી માહિતી અને રોકાણ અંગેની સલાહ એક્સપર્ટ્સ અને બ્રોકરેજ ફર્મ્સના પોતાના અંગત વિચાર છે. આ માટે વેબસાઇટ કે તેનું મેનેજમેન્ટ જવાબદાર નથી. કોઈપણ રોકાણનો નિર્ણય લેતા પહેલા તમારા સર્ટિફાઈડ ફાઈનાન્શિયલ એડવાઈઝરની સલાહ લેવી હિતાવહ છે.)