Stock Market Holidays: નવેમ્બરમાં કયા દિવસે બંધ રહેશે NSE-BSE? જુઓ રજાઓનું લિસ્ટ

ઓક્ટોબર મહિનો પૂરો થવા જઈ રહ્યો છે અને નવેમ્બર મહિનાની શરૂઆત થવાની છે. નવેમ્બર મહિનામાં ભારતીય શેરબજારમાં કુલ 11 દિવસ ટ્રેડિંગ બંધ રહેશે. તેમાં શનિવાર અને રવિવારની સાપ્તાહિક રજાઓ ઉપરાંત બે જાહેર રજાઓનો પણ સમાવેશ થાય છે. આ ઉપરાંત કોમોડિટી માર્કેટમાં ટ્રેડિંગ કરતા રોકાણકારો માટે પણ મહત્વની માહિતી છે. BSE, NSE અને MCX પર રજાઓનું અલગ-અલગ શેડ્યૂલ જાહેર કરવામાં આવ્યું છે.

નવેમ્બરમાં કયા દિવસે બંધ રહેશે BSE અને NSE?

- 10 નવેમ્બર: દિવાળી-બલિપ્રતિપદા નિમિત્તે શેરબજારમાં રજા રહેશે.

- 24 નવેમ્બર: પ્રકાશ ગુરુપર્વ શ્રી ગુરુ નાનક દેવ નિમિત્તે શેરબજારમાં ટ્રેડિંગ બંધ રહેશે.

આ બંને તારીખે BSEના ઇક્વિટી, ઇક્વિટી ડેરિવેટિવ્સ, કરન્સી ડેરિવેટિવ્સ, NDS-RST અને ટ્રાઇ પાર્ટી રેપો સેગમેન્ટમાં ટ્રેડિંગ નહીં થાય.

જોકે, કોમોડિટી ડેરિવેટિવ્સ અને ઇલેક્ટ્રોનિક ગોલ્ડ રિસિપ્ટ્સ (EGR) સેગમેન્ટમાં સવારે 9થી સાંજે 5 વાગ્યા સુધીનું મોર્નિંગ સેશન બંધ રહેશે. પરંતુ સાંજે 5 વાગ્યાથી રાત્રે 11:30 અથવા 11:55 વાગ્યા સુધીનું ઇવનિંગ સેશન ચાલુ રહેશે.

NSE અને MCXમાં કયા સેશનમાં થશે ટ્રેડિંગ?

NSE પર પણ 10 અને 24 નવેમ્બરે ઇક્વિટી, ઇક્વિટી ડેરિવેટિવ્સ, કરન્સી ડેરિવેટિવ્સ, ઇન્ટરેસ્ટ રેટ ડેરિવેટિવ્સ, મ્યુચ્યુઅલ ફંડ્સ, સિક્યોરિટી લેન્ડિંગ એન્ડ બોરોઇંગ સ્કીમ્સ, કોર્પોરેટ બોન્ડ્સ અને ન્યૂ ડેટ સેગમેન્ટ સહિતના સેગમેન્ટમાં ટ્રેડિંગ બંધ રહેશે.

બીજી તરફ, કોમોડિટી ડેરિવેટિવ્સ અને EGR સેગમેન્ટમાં મોર્નિંગ સેશન બંધ રહેશે, પરંતુ સાંજનું સેશન ખુલ્લું રહેશે.

MCX પર પણ 10 અને 24 નવેમ્બરે સવારે ટ્રેડિંગ નહીં થાય. જોકે, સાંજે 5 વાગ્યાથી રાત્રે 11:30 અથવા 11:55 વાગ્યા સુધી ટ્રેડિંગ ચાલુ રહેશે. આ સિવાયની રજાઓ શનિવાર અને રવિવારની રહેશે.

દિવાળીએ મુહૂર્ત ટ્રેડિંગનો સમય શું રહેશે?

8 નવેમ્બરે દિવાળી લક્ષ્મી પૂજનના દિવસે નિયમિત ટ્રેડિંગ માટે શેરબજાર બંધ રહેશે. જોકે, પરંપરા મુજબ BSE અને NSE પર એક કલાકનું વિશેષ મુહૂર્ત ટ્રેડિંગ સેશન યોજાશે. રોકાણકારો આ સમય દરમિયાન શેરોની ખરીદી અને વેચાણ કરી શકશે.

મુહૂર્ત ટ્રેડિંગ દરમિયાન ટ્રેડિંગ મેમ્બર્સ માટે લૉગ ઇનનો સમય બપોરે 1:15થી 1:50 વાગ્યા સુધી રહેશે. બ્લોક ડીલ વિન્ડો બપોરે 1:50થી 2:05 વાગ્યા સુધી ખુલ્લી રહેશે, જ્યારે પ્રી-ઓપન સેશન બપોરે 2:05થી 2:15 વાગ્યા સુધી ચાલશે.

મુખ્ય ટ્રેડિંગ વિન્ડો બપોરે 2:20થી 3:30 વાગ્યા સુધી રહેશે. પિરિયોડિક કોલ ઓક્શન સેશન બપોરે 2:25થી 3:20 વાગ્યા સુધી અને ક્લોઝિંગ ઓક્શનની પ્રક્રિયા બપોરે 3:15થી 3:35 વાગ્યા સુધી ચાલશે.

નોન-CAS સિક્યોરિટીઝ માટે ક્લોઝિંગ સેશન બપોરે 3:30થી 3:50 વાગ્યા સુધી રહેશે. જ્યારે CAS સિક્યોરિટીઝ માટે ક્લોઝિંગ બફર પિરિયડ બપોરે 3:35થી 3:50 વાગ્યા સુધી રહેશે. અંતે, પોસ્ટ-ક્લોઝિંગ સેશન બપોરે 3:50થી સાંજે 4 વાગ્યા સુધી ચાલશે.

વર્ષના બાકીના સમયમાં ક્યારે રહેશે શેરબજારની રજા?

નવેમ્બર મહિના પછી પણ વર્ષ 2026માં શેરબજારની એક મહત્વપૂર્ણ રજા બાકી રહેશે. 25 ડિસેમ્બરે ક્રિસમસના અવસરે BSE અને NSEમાં ટ્રેડિંગ બંધ રહેશે.