Closing Bell: શેરબજારમાં હાહાકાર, બેન્કિંગ શેરોમાં ભારે વેચવાલીથી સેન્સેક્સ 1097 પોઈન્ટ તૂટ્યો, નિફ્ટી 24450 પર બંધ

Closing Bell: ભારતીય શેરબજારમાં સપ્તાહના અંતિમ ટ્રેડિંગ સેશનમાં એટલે કે શુક્રવારે (6 માર્ચ) મોટો કડાકો જોવા મળ્યો છે. ગ્લોબલ માર્કેટમાંથી મળેલા નબળા સંકેતોને કારણે બજારમાં એક દિવસ પહેલા આવેલી રિકવરી સંપૂર્ણપણે ધોવાઈ ગઈ છે. ખાસ કરીને ICICI અને HDFC જેવી મોટી પ્રાઈવેટ બેંકોના શેરમાં ભારે વેચવાલી નોંધાઈ, જેની બજાર પર સૌથી ખરાબ અસર પડી. આ ઉપરાંત ફાઇનાન્સિયલ અને રિયલ્ટી શેરોમાં થયેલા ઘટાડાએ પણ બજારને નીચે ખેંચ્યું છે. અમેરિકા અને ઈરાન વચ્ચે વધી રહેલા તણાવને કારણે રોકાણકારોમાં ભારે ડરનો માહોલ છે.

સેન્સેક્સ અને નિફ્ટીના આંકડા

6 માર્ચના ભારે ઉતાર-ચઢાવવાળા ટ્રેડિંગ સેશનના અંતે બજાર લાલ નિશાનમાં બંધ થયું હતું. સેન્સેક્સ 1097 પોઈન્ટ તૂટીને 78918.90 ના સ્તરે બંધ થયો...નિફ્ટી 315.45 પોઈન્ટના ઘટાડા સાથે 24450.45 પર બંધ થયો. બજારમાં આજે કુલ 1813 શેરો વધ્યા હતા, 2217 શેરોમાં ઘટાડો નોંધાયો હતો, જ્યારે 169 શેરોના ભાવમાં કોઈ ફેરફાર જોવા મળ્યો ન હતો.

કયા શેરોમાં રહી તેજી અને કયા શેરો તૂટ્યા?

નિફ્ટીમાં સામેલ ICICI બેંક, ઈટર્નલ, શ્રીરામ ફાઇનાન્સ, એક્સિસ બેંક અને અલ્ટ્રાટેક સિમેન્ટના શેરોમાં સૌથી વધુ નુકસાન જોવા મળ્યું.

ટોપ ગેઈનર્સ

પડતા બજારમાં પણ ભારત ઈલેક્ટ્રોનિક્સ (BEL), રિલાયન્સ ઈન્ડસ્ટ્રીઝ, NTPC, ONGC અને સન ફાર્મા જેવા શેરોમાં સારી ખરીદી જોવા મળી.

સેક્ટોરલ અને અન્ય ઈન્ડેક્સની સ્થિતિ

બજારમાં સેક્ટોરલ ઈન્ડેક્સ મિશ્ર જોવા મળ્યા હતા. ઓટો, રિયલ્ટી, PSU બેંક અને પ્રાઈવેટ બેંક ઈન્ડેક્સમાં 1 થી 2 ટકાનો મોટો ઘટાડો નોંધાયો હતો. બીજી તરફ, ડિફેન્સ સેક્ટરના શેરોમાં જોરદાર 3 ટકાનો ઉછાળો આવ્યો હતો. આ સિવાય કેપિટલ ગુડ્સ ઈન્ડેક્સ 1.3 ટકા અને પાવર ઈન્ડેક્સ 0.4 ટકા વધ્યો હતો. બ્રોડર માર્કેટની વાત કરીએ તો, નિફ્ટી મિડકેપ ઈન્ડેક્સમાં 0.7 ટકા અને સ્મોલકેપ ઈન્ડેક્સમાં 0.2 ટકાનો ઘટાડો જોવા મળ્યો હતો.

ગ્લોબલ માર્કેટમાં પણ ભારે નિરાશા

અમેરિકા, ઈઝરાયેલ અને ઈરાન વચ્ચે યુદ્ધની વધતી આશંકાઓને પગલે વૈશ્વિક ઓઈલ સપ્લાય ખોરવાઈ જવાનો ડર છે, જેના કારણે એશિયન બજારો પણ તૂટ્યા હતા. જાપાનનો નિક્કેઈ 1.3 ટકા અને દક્ષિણ કોરિયાનો કોસ્પી 3.63 ટકા તૂટ્યો હતો.

અમેરિકી બજારો ગુરુવારે લાલ નિશાનમાં બંધ થયા હતા. S&P 500 માં 0.57 ટકા, ડાઉ જોન્સમાં 1.61 ટકા અને નાસ્ડેકમાં 0.26 ટકાનો ઘટાડો થયો હતો. અહેવાલો મુજબ, અમેરિકાના 23 રાજ્યોના એટર્ની જનરલે રાષ્ટ્રપતિ ડોનાલ્ડ ટ્રમ્પના ટેરિફ નિયમો વિરુદ્ધ ફરીથી કેસ દાખલ કર્યો છે, જેનાથી અમેરિકન માર્કેટમાં અસ્થિરતાનો માહોલ છે.

કાચા તેલ અને સોનાના ભાવમાં ભડકો

ઈરાન તરફથી સપ્લાયમાં અડચણ આવવાની શક્યતાને પગલે કાચા તેલના ભાવમાં જંગી ઉછાળો આવ્યો છે. રોઈટર્સના રિપોર્ટ મુજબ, બ્રેન્ટ ક્રૂડ 5 ટકા ઉછળીને 85.41 ડોલર પ્રતિ બેરલ પર પહોંચી ગયું હતું. એશિયન માર્કેટમાં પણ તે 0.15 ટકાના વધારા સાથે 84.16 ડોલર પર ટ્રેડ કરી રહ્યું હતું. જીઓપોલિટિકલ ટેન્શનને કારણે રોકાણકારો સુરક્ષિત રોકાણ તરફ વળ્યા છે, જેના લીધે સોનાના ભાવ પણ વધ્યા છે. ગોલ્ડ ફ્યુચર્સ 1.34 ટકા વધીને 5146.39 ડોલર પર ટ્રેડ કરી રહ્યા હતા.

આ પણ વાંચો-શું RVNL અને IRCON નું થશે મર્જર? સમાચાર આવતા જ રેલવે PSU શેરોમાં તોફાની તેજી, 11% સુધી ઉછળ્યા ભાવ