શેરબજારમાં હાહાકાર! સેન્સેક્સ 1690 પોઈન્ટ તૂટ્યો, છતાં આ 5 શેરોમાં 14% સુધીનો ઉછાળો, જાણો ટોપ ગેનર્સ અને લૂઝર્સ

Share Market Crash Today: લગભગ બે દિવસની શાનદાર તેજી બાદ 27 માર્ચે ભારતીય શેરબજારમાં મોટો ભૂકંપ આવ્યો છે. બજારમાં આજે ચોતરફા વેચવાલી જોવા મળી હતી. ટ્રેડિંગ સેશનના અંતે સેન્સેક્સ (Sensex) 1690.23 પોઈન્ટના મોટા કડાકા સાથે 73,583.22ના સ્તર પર બંધ થયો હતો. જ્યારે નિફ્ટી (Nifty) પણ 486.85 પોઈન્ટ લપસીને 22,819.60 ના સ્તર પર આવી ગયો છે.

આજના દિવસે બજારના તમામ સેક્ટોરલ ઈન્ડેક્સ લાલ નિશાનમાં બંધ થયા છે. જેમાં સૌથી મોટો ફટકો બેન્કિંગ અને કેમિકલ સેક્ટરને પડ્યો છે. નિફ્ટી PSU બેન્ક ઈન્ડેક્સમાં 4 ટકાથી વધુનો ઘટાડો નોંધાયો છે, જ્યારે કેમિકલ ઈન્ડેક્સ 3 ટકાથી વધુ તૂટ્યો છે.

આવા ખરાબ માહોલ વચ્ચે પણ બજારમાં કેટલાક શેરો એવા હતા જેમાં રોકાણકારોએ ધૂમ ખરીદી કરી છે. ચાલો જાણીએ આજના બજારના ટોપ ગેનર્સ (જેમણે નફો કરાવ્યો) અને ટોપ લૂઝર્સ (જેમણે નુકસાન કરાવ્યું) શેરો વિશે.

આજના ટોપ ગેનર્સ (Top Gainers): કયા શેરોમાં રહી તેજી?

HEG (હાલનો ભાવ 573.80 | ઉછાળો +14.25%): આ શેરમાં આજે અદભુત તેજી જોવા મળી. તેનું મુખ્ય કારણ એ છે કે અમેરિકન કંપની GrafTech International એ ગ્રેફાઇટ ઇલેક્ટ્રોડની કિંમતોમાં $600 થી $1,200 પ્રતિ ટનનો વધારો કર્યો છે. આંતરરાષ્ટ્રીય બજારમાં ભાવ વધતા ભારતીય ગ્રેફાઇટ મેકર્સના શેરોમાં આગ ઝરતી તેજી આવી છે.

ACME Solar Holdings (હાલનો ભાવ 269.30 | ઉછાળો +6.09%): કંપનીની સબસિડિયરી 'ACME ઇકો ક્લીન એનર્જી પ્રાઇવેટ લિમિટેડે' ગુજરાતના સુરેન્દ્રનગર જિલ્લાના સાયલા તાલુકાના ઢાંકણિયા ગામમાં 100 MW ના વિન્ડ પાવર પ્રોજેક્ટમાંથી વધુ 4 MW ક્ષમતા ચાલુ કરી દીધી છે. આ સિવાય ઇન્વેસ્ટેક (Investec) દ્વારા આ શેર પર 'Buy' રેટિંગ આપતા શેરમાં તેજી જોવા મળી છે.

Nazara Technologies (હાલનો ભાવ 240.15 | ઉછાળો +5.49%): ગેમિંગ કંપની નઝારા ટેકના શેરમાં પણ શાનદાર ઉછાળો આવ્યો છે. કંપનીની સહાયક કંપની 'પેપર બોટ એપ્સ પ્રાઇવેટ લિમિટેડ' દ્વારા 9,90,450 બોનસ ઇક્વિટી શેર અલોટ કરવામાં આવ્યા છે. આ અલોટમેન્ટ 93:1 ના રેશિયોમાં થયું છે.

Oracle Financial Services Software (હાલનો ભાવ 6944.85 | ઉછાળો +5.23%): આ IT કંપનીએ અમેરિકામાં પોતાના એક વર્તમાન ગ્લોબલ બેન્કિંગ ક્લાયન્ટ સાથે પર્પેચ્યુઅલ સોફ્ટવેર લાઇસન્સિંગ ડીલ સાઈન કરી છે. આ ડીલ લગભગ 10 કરોડ ડોલરની છે, જેના સમાચાર આવતા જ શેર રોકેટ બની ગયો હતો.

ONGC (હાલનો ભાવ 281.95 | ઉછાળો +4.33%): સરકારી ઓઇલ કંપની ONGC માં આજે સારી ખરીદી જોવા મળી. એક દિવસ પહેલા જ ગ્લોબલ બ્રોકરેજ ફર્મ CLSA દ્વારા એવી આશા વ્યક્ત કરવામાં આવી હતી કે આવનારા સમયમાં આ શેરમાં 65 ટકા સુધીનો મોટો ઉછાળો આવી શકે છે.

આજના ટોપ લૂઝર્સ (Top Losers): કયા શેરોએ કરાવ્યું નુકસાન?

બીજી તરફ, માર્કેટના દિગ્ગજ શેરોમાં આજે ભારે વેચવાલી જોવા મળી હતી, જેના કારણે બજાર નીચે પટકાયું.

Mahindra Lifespace Developers (હાલનો ભાવ 310.50 | ઘટાડો -7.90%): રિયલ એસ્ટેટ સેક્ટરના આ શેરમાં આજે જોરદાર વેચવાલી જોવા મળી. BSE પર ટ્રેડિંગ દરમિયાન આ શેર 307.50 ના નીચલા સ્તર (Low) સુધી ગગડી ગયો હતો, જોકે બાદમાં થોડી રિકવરી આવી હતી.

Godfrey Phillips India (હાલનો ભાવ 1902.10 | ઘટાડો -7.68%): આ શેરમાં પણ રોકાણકારોએ પ્રોફિટ બુકિંગ કરતા ભારે સેલિંગ પ્રેશર જોવા મળ્યું. દિવસ દરમિયાન BSE પર શેરની કિંમત 1892 સુધી નીચે સરકી ગઈ હતી.

Tata Motors Passenger Vehicles (હાલનો ભાવ 303.20 | ઘટાડો -4.68%): ટાટા મોટર્સના શેરમાં ઘટાડા પાછળ એક મોટા સમાચાર જવાબદાર છે. યુકે (UK) માં આવેલા કંપનીના JLR સોલિહુલ પ્લાન્ટમાં 2 અઠવાડિયાના શટડાઉનની જાહેરાત કરવામાં આવી છે. એક સપ્લાયર તરફથી પાર્ટ્સ ન મળવાને કારણે કારનું પ્રોડક્શન અટકાવવું પડ્યું છે. આ શટડાઉન 8 એપ્રિલ સુધી ચાલુ રહેશે.

Reliance Industries - RIL (હાલનો ભાવ 1348.25 | ઘટાડો -4.55%): મુકેશ અંબાણીની કંપની રિલાયન્સના શેરમાં પણ મોટો કડાકો બોલ્યો છે. સરકારે ડીઝલ અને ATF ના એક્સપોર્ટ પર ફરીથી ડ્યૂટી લગાવી દીધી છે. નોંધનીય છે કે RIL તેના કુલ ઉત્પાદનના 35 થી 40 ટકા ડીઝલની નિકાસ કરે છે. સરકારે ડીઝલની નિકાસ પર 21.5 પ્રતિ લીટર અને ATF પર 29.5 પ્રતિ લીટર ડ્યૂટી લગાવી છે, જેની સીધી અસર કંપનીના માર્જિન પર પડશે.

HDFC Bank (હાલનો ભાવ 756.25 | ઘટાડો -3.26%): પ્રાઇવેટ સેક્ટરની સૌથી મોટી બેન્કના શેરમાં પણ નિરાશા જોવા મળી. બ્રોકરેજ ફર્મ જેફરીઝે (Jefferies) HDFC બેન્કમાંથી પોતાનો હિસ્સો વેચી દીધો છે. વધુમાં, માર્કેટ રેગ્યુલેટર SEBI અતનુ ચક્રવર્તીના રાજીનામાની સમીક્ષા કરી રહી છે. SEBI એ તપાસી રહી છે કે શું આમાં લિસ્ટેડ કંપનીઓના ડિરેક્ટર્સ માટેના નિયમોનું કોઈ ઉલ્લંઘન થયું છે કે નહીં.

શેરબજારમાં અત્યારે ભારે વોલેટિલિટી (ઉતાર-ચઢાવ)નો માહોલ છે. ગ્લોબલ અને ડોમેસ્ટિક સમાચારોની સીધી અસર શેરોની કિંમતો પર પડી રહી છે. રોકાણકારોએ અત્યારના સમયમાં કોઈ પણ શેરમાં રોકાણ કરતા પહેલા કંપનીના ફંડામેન્ટલ્સ અને માર્કેટ ન્યૂઝ પર ખાસ ધ્યાન રાખવું જોઈએ.

આ પણ વાંચો- Market Outlook: શેરબજારમાં હાહાકાર, સેન્સેક્સ-નિફ્ટીમાં મોટો કડાકો, જાણો 30 માર્ચે કેવો રહેશે બજારનો મિજાજ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.