શેરબજારમાં તોફાની તેજી, નિફ્ટી ફરી 24200ને પાર, સેન્સેક્સમાં 600 પોઈન્ટનો ઉછાળો, જાણો આ તેજીના 5 મુખ્ય કારણો

Stock Market Rally : શેરબજારમાં આજે સપ્તાહના છેલ્લા કારોબારી દિવસે અને સેન્સેક્સની મંથલી એક્સપાયરીના દિવસે રોકાણકારો માટે શાનદાર માહોલ જોવા મળ્યો છે. અમેરિકા અને ઈરાન વચ્ચેના તણાવ ઘટતા કાચા તેલના ભાવ ગગડ્યા છે, જેની સીધી પોઝિટિવ અસર ભારતીય માર્કેટ પર પડી છે.

ઇન્ટ્રા-ડેમાં સેન્સેક્સ 600 પોઈન્ટ ઉછળી ગયો હતો, જ્યારે નિફ્ટી 50 ઈન્ડેક્સ પણ 24200 ની સપાટીને સ્પર્શી ગયો હતો. આ અગાઉ 8 મેના રોજ નિફ્ટીએ 24200 નો લેવલ પાર કરીને 24,253.80 ની હાઈ બનાવી હતી. બ્રોડર માર્કેટમાં પણ સારો એવો ઉત્સાહ છે. નિફ્ટી મિડકેપ 100 અને નિફ્ટી સ્મોલકેપ 100 ઇન્ડેક્સમાં લગભગ અડધા ટકાનો ઉછાળો નોંધાયો છે.

માર્કેટની લેટેસ્ટ સ્થિતિ

સવારે 11:00 વાગ્યાના આંકડા મુજબ,,સેન્સેક્સ 581.20 પોઈન્ટ્સ (0.75%) ના ઉછાળા સાથે 77,572.42 પર કારોબાર કરી રહ્યો હતો. ઇન્ટ્રા-ડેમાં તેણે 77,591.65 ની હાઈ બનાવી હતી. નિફ્ટી 173.95 પોઈન્ટ્સ (0.72%) વધીને 24,195.60 પર ટ્રેડ કરી રહ્યો હતો. ઇન્ટ્રા-ડેમાં નિફ્ટી 24,200.55 સુધી પહોંચ્યો હતો.

1. કાચા તેલના ભાવમાં મોટો કડાકો

અમેરિકા અને ઈરાન વચ્ચે શાંતિ કરારની પ્રગતિ અને વધતા સપ્લાયના કારણે ક્રૂડ ઓઇલના ભાવ યુદ્ધ પહેલાના સ્તરે પહોંચી ગયા છે. બ્રેન્ટ ક્રૂડ 27 ફેબ્રુઆરી 2026 પછી પહેલીવાર 73 ડોલર પ્રતિ બેરલની નીચે સરકી ગયું છે. ઉલ્લેખનીય છે કે 30 એપ્રિલના રોજ ક્રૂડ 126 ડોલરની ટોચે પહોંચ્યું હતું, ત્યાંથી અત્યારે તે 42% જેટલું સસ્તું થઈ ગયું છે.

2. રૂપિયાની મજબૂતી

ડોલર સામે ભારતીય રૂપિયામાં આવેલી મજબૂતીએ પણ માર્કેટને સારો સપોર્ટ આપ્યો છે. હાલમાં અમેરિકી ડોલર સામે રૂપિયો 33 પૈસા મજબૂત થઈને 94.34 ના સ્તર પર પહોંચી ગયો છે.

3. અમેરિકી સેનેટનો ટ્રમ્પને મોટો ઝટકો

અમેરિકાની સંસદમાં એક ઐતિહાસિક પ્રસ્તાવ પાસ કરવામાં આવ્યો છે. આ પ્રસ્તાવમાં રાષ્ટ્રપતિ ડોનાલ્ડ ટ્રમ્પના ઈરાન સાથે યુદ્ધ કરવાના અધિકારને પડકારવામાં આવ્યો છે. 50-48 ના અંતરથી પાસ થયેલો આ પ્રસ્તાવ વ્હાઇટ હાઉસ માટે મોટો ઝટકો છે, જેના લીધે હવે ઈરાન પર હુમલો કરવો મુશ્કેલ બન્યો છે. આ સમાચારે ગ્લોબલ માર્કેટમાં પોઝિટિવિટી લાવી છે.

4. એશિયન બજારોમાં શાનદાર રોનક

ભારતની સાથે સાથે એશિયન માર્કેટમાં પણ આજે લીલોતરી છવાયેલી છે. દક્ષિણ કોરિયાનો કોસ્પી 6% થી વધુ અને જાપાનનો નિક્કેઈ 225 લગભગ 5% ઉછળ્યા છે. ઈન્ડોનેશિયાનો જકાર્તા કમ્પોઝિટ 2.5% અને તાઈવાન વેઈટેડ અડધા ટકાથી વધુ મજબૂત થયા છે. ચીન અને સિંગાપોરના બજારો પણ તેજીમાં છે.

5. ઓટો સેક્ટરનો જબરદસ્ત સપોર્ટ

આજે માર્કેટને સૌથી મોટો ટેકો ઓટો સેક્ટર તરફથી મળ્યો છે. નિફ્ટી ઓટો ઇન્ડેક્સ 2.5% થી વધુ ઉછળ્યો છે. આ ઉપરાંત રિયલ્ટી સેક્ટર 1% ઉપર છે. જોકે મેટલ શેરોમાં થોડું વેચવાલીનું દબાણ છે. પરંતુ PSU બેન્ક, પ્રાઇવેટ બેન્ક, FMCG અને IT સેક્ટરના ઇન્ડેક્સમાં પણ અડધા ટકાથી વધુની મજબૂતી જોવા મળી છે.

આ પણ વાંચો-ભારતની પ્રથમ પ્રાઈવેટ ગોલ્ડ માઈન શરૂ: હવે જમીનમાંથી નીકળશે ટનબંધ સોનું, સોનાની આયાતનું ટેન્શન ઘટશે