Welspun Corp Share Price: 17200 કરોડનો મહાકાય ઓર્ડર મળતા જ શેરમાં 17%નો ભડકો, રોકાણકારો થયા માલામાલ

Welspun Corp Share Price: સ્ટીલ પાઇપ બનાવતી દિગ્ગજ કંપની વેલસ્પન કોર્પના શેરોમાં 21 ઓગસ્ટના રોજ ખરીદીનું મોટું ઘોડાપૂર જોવા મળ્યું હતું.માર્કેટ ખૂલતાની સાથે જ BSE પર આ શેર તેના અગાઉના બંધ ભાવથી લગભગ 17 ટકા જેટલો ઊછળી ગયો હતો. આ શાનદાર તેજી સાથે શેરે 2343.35 રૂપિયાનો પોતાનો નવો 52 સપ્તાહની નવી ઊંચી સપાટી બનાવી લીધો છે. આ તોફાની તેજીના કારણે કંપનીની કુલ માર્કેટ કેપ પણ વધીને 61500 કરોડ રૂપિયાને પાર કરી ગઈ છે.

શેરમાં તેજીનું કારણ: કંપનીને મળ્યો ઐતિહાસિક ઓર્ડર

શેરમાં આવેલા આ જંગી ઉછાળા પાછળ એક બહુ મોટું કારણ છે. કંપનીએ શેરબજારોને સત્તાવાર રીતે જાણ કરી છે કે, તેમને અત્યાર સુધીનો સૌથી મોટો અને ઐતિહાસિક કોન્ટ્રાક્ટ મળ્યો છે.આ ઓર્ડર અંદાજે 1.8 અબજ ડોલર એટલે કે ભારતીય ચલણ મુજબ 17200 કરોડ રૂપિયાનો છે. આ ઓર્ડર હેઠળ વેલસ્પન કોર્પે અમેરિકામાં આવેલા પોતાના મેન્યુફેક્ચરિંગ પ્લાન્ટમાંથી પાઇપ્સની સપ્લાય કરવાની રહેશે.

એક્સચેન્જ ફાઇલિંગમાં આપેલી માહિતી મુજબ, કંપનીએ આ ઓર્ડર નાણાકીય વર્ષ 2028 અને 2029 ની વચ્ચે પૂરો કરવાનો છે. આ નવો મેગા ઓર્ડર મળ્યા બાદ વેલસ્પન કોર્પની ગ્લોબલ ઓર્ડર બુક પણ મજબૂત બનીને 4.4 અબજ ડોલર (અંદાજે 42100 કરોડ રૂપિયા) પર પહોંચી ગઈ છે.

જો આપણે આ શેરના રિટર્ન પર નજર કરીએ તો તેણે રોકાણકારોને છપ્પરફાડ કમાણી કરાવી છે. 5 રૂપિયાની ફેસ વેલ્યુ ધરાવતો આ શેર BSE 500 ઈન્ડેક્સનો એક ભાગ છે. ચાલો જોઈએ આ શેરે કેવું રિટર્ન આપ્યું છે. માત્ર 1 મહિનામાં શેરે 44 ટકા, 3 મહિનામાં 76 ટકા અને 6 મહિનામાં 199 ટકા (લગભગ 200%)નો તગડો નફો આપ્યો છે. 2 વર્ષમાં આ શેરમાં 225 ટકા, 3 વર્ષમાં 639 ટકા અને 5 વર્ષમાં 2000 ટકાનો જંગી ઉછાળો જોવા મળ્યો છે. લેટેસ્ટ ડેટા અનુસાર, જૂન 2026 ના અંત સુધીમાં વેલસ્પન કોર્પમાં પ્રમોટર્સનો હિસ્સો 49.73 ટકા નોંધાયેલો હતો.

કંપનીની શાનદાર નાણાકીય સ્થિતિ

કોઈપણ કંપનીના શેરમાં રોકાણ કરતા પહેલા તેની ફાઇનાન્શિયલ સ્થિતિ જાણવી જરૂરી છે. નાણાકીય વર્ષ 2026ના આંકડાઓ ખૂબ જ પ્રોત્સાહક છે:આ ક્વાર્ટરમાં કંપનીનું સ્ટેન્ડઅલોન રેવન્યુ 1567.22 કરોડ રૂપિયા અને ચોખ્ખો નફો (Net Profit) 115.84 કરોડ રૂપિયા રહ્યો હતો. પ્રતિ શેર કમાણી 4.39 રૂપિયા નોંધાઈ હતી. સંપૂર્ણ નાણાકીય વર્ષ 2026 દરમિયાન કંપનીની કુલ આવક 8299.37 કરોડ રૂપિયા નોંધાઈ હતી. જ્યારે ચોખ્ખો નફો 1013.52 કરોડ રૂપિયા અને EPS 38.47 રૂપિયા રહ્યો હતો.

આ પણ વાંચો-Urban Company Share Price: UBSની 'બાય' રેટિંગ મળતા જ શેરમાં ભડકો, નવો ટાર્ગેટ પ્રાઇસ જાણીને તમે પણ રોકાણ કરશો

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.