ચૂંટણીમાં હતો બાહ્ય હસ્તક્ષેપ, કોની મળી રહી હતી મદદ? યુએસની 21 મિલિયન ડોલરની સહાય પર ભાજપનો સવાલ

અમેરિકામાં ટ્રમ્પ એડમિનિસ્ટ્રેશનમાં એલોન મસ્કના નેતૃત્વમાં ચાલતા DOGE વિભાગે ભારત સહિત ઘણા દેશોને ફંડ આપવા પર પ્રતિબંધ મૂક્યો છે. આમાં ભારતમાં મતદાન ટકાવારી વધારવા માટે આપવામાં આવેલી $21 મિલિયનની સહાયનો પણ સમાવેશ થાય છે. હવે આ મુદ્દા પર દેશનું રાજકારણ ગરમાયું છે. શાસક ભારતીય જનતા પાર્ટીએ આ અંગે તીવ્ર પ્રતિક્રિયા આપી અને આરોપ લગાવ્યો કે આ ફંડ ભારતની ચૂંટણી પ્રક્રિયામાં બહારનો હસ્તક્ષેપ છે. ભાજપે એવો પણ પ્રશ્ન ઉઠાવ્યો કે આનાથી કયા પક્ષને મદદ મળી રહી છે.

ભારતીય જનતા પાર્ટીના નેતા અમિત માલવિયાએ DOGEની સોશિયલ મીડિયા પોસ્ટને રીટ્વીટ કરીને લખ્યું, "મતદાર મતદાન વધારવા અને રાજકીય લેન્ડસ્કેપને મજબૂત કરવા $486 મિલિયન... ભારતમાં મતદાન વધારવા $21 મિલિયન? આ ચોક્કસપણે ભારતની ચૂંટણી પ્રક્રિયામાં બહારની દખલગીરી દર્શાવે છે. આનાથી કોને ફાયદો થઈ રહ્યો હતો? ચોક્કસપણે શાસક પક્ષને નહીં!"

- $486M to the “Consortium for Elections and Political Process Strengthening,” including $22M for "inclusive and participatory political process" in Moldova and $21M for voter turnout in India. $21M for voter turnout? This definitely is external interference in India’s electoral… https://t.co/DsTJhh9J2J

— Amit Malviya (@amitmalviya) February 15, 2025

અગાઉ, ફંડ રોકવા વિશે માહિતી આપતા, મસ્કની આગેવાની હેઠળના કાર્યક્ષમતા વિભાગના અધિકારીઓએ જણાવ્યું હતું કે અમેરિકાએ ભારતમાં મતદાન વધારવા માટે $21 મિલિયન અને બાંગ્લાદેશના રાજકીય પરિદ્રશ્યને મજબૂત કરવા $29 મિલિયનની સહાય રદ કરી છે. સોશિયલ મીડિયા પર આ માહિતી આપતા મસ્કની આગેવાની હેઠળના વિભાગે કહ્યું કે આ બાબતોમાં અમેરિકન કરદાતાઓના પૈસા ખર્ચવાના હતા, અમે તેને રદ કરી દીધા છે.

મસ્કનો આ નિર્ણય એવા સમયે આવ્યો છે જ્યારે ભારતીય વડા પ્રધાન અમેરિકાના પ્રવાસે હતા. ટ્રમ્પ 2.0 દરમિયાન મોદી અને ટ્રમ્પ વચ્ચે આ પહેલી મુલાકાત હતી. બંને દેશોના નેતાઓએ એકબીજા સાથે ઉષ્માભરી વાતચીત કરી. બંને દેશો વચ્ચેના સંબંધોને મજબૂત બનાવવાની પણ જાહેરાત કરી. જોકે, બંને નેતાઓની સંયુક્ત પત્રકાર પરિષદમાં કે સંયુક્ત ઘોષણામાં આનો કોઈ ઉલ્લેખ નહોતો.

વિભાગના આ નિર્ણયનો હેતુ ફક્ત ભારત અને બાંગ્લાદેશને જ નહીં પરંતુ અન્ય દેશોને પણ જતા ફંડને લક્ષ્ય બનાવવું છે. આમાં લાઇબેરિયામાં મતદાન વધારવા માટે $1.5 મિલિયન, માલીમાં $14 મિલિયન, નેપાળમાં $20 મિલિયન અને દક્ષિણ આફ્રિકામાં $47 મિલિયનના ફંડને રોકવાનો સમાવેશ થાય છે. વધુમાં, કંબોડિયા અને સર્બિયાને આપવામાં આવતું ફંડ પણ બંધ કરી દેવામાં આવ્યું છે.

આ પણ વાંચો-Gold vs Share Market: સોનું કે શેરબજાર? છેલ્લા 10 વર્ષમાં સૌથી વધુ રિટર્ન કોણે આપ્યું?