Kailash Mansarovar Yatra 2025: 750 યાત્રીઓની પસંદગી, જાણો રૂટ અને સંપૂર્ણ વિગતો

Kailash Mansarovar Yatra 2025: ભારતીય યાત્રીઓ માટે આનંદના સમાચાર! પાંચ વર્ષના લાંબા વિરામ બાદ કૈલાસ માનસરોવર યાત્રા આ વર્ષે જૂનથી ફરી શરૂ થવા જઈ રહી છે. કોવિડ-19 મહામારી અને ભારત-ચીન સંબંધોમાં તણાવને કારણે 2019થી આ પવિત્ર યાત્રા બંધ હતી. વિદેશ મંત્રાલયે લૉટરી સિસ્ટમ દ્વારા 750 ભાગ્યશાળી યાત્રીઓના નામની જાહેરાત કરી છે, જેમને SMS અને ઈ-મેલ દ્વારા સૂચના આપવામાં આવી છે.

યાત્રાની મુખ્ય વિગતો

વિદેશ મંત્રાલયના જણાવ્યા અનુસાર, જૂનથી ઓગસ્ટ 2025 દરમિયાન કુલ 15 જૂથો (જત્થા) કૈલાસ માનસરોવર યાત્રા માટે રવાના થશે. દરેક જૂથમાં 50-50 યાત્રીઓ હશે. આ યાત્રા બે મુખ્ય રૂટ દ્વારા કરવામાં આવશે.

લિપુલેખ રૂટ: 5 જૂથો (250 યાત્રીઓ) આ રૂટ દ્વારા માનસરોવર જશે.

બંને રૂટને ખાસ કરીને વાહનો માટે અનુકૂળ બનાવવામાં આવ્યા છે, જેથી યાત્રીઓએ ખૂબ ઓછું પગપાળા ચાલવું પડશે. આ યાત્રા માટે પસંદ થયેલા યાત્રીઓ પોતાના સિલેક્શનની સ્થિતિ https://kmy.gov.in પર ચેક કરી શકે છે અથવા હેલ્પલાઈન નંબર 011-23088133 પર સંપર્ક કરી શકે છે.

યાત્રીઓની પસંદગી કેવી રીતે થઈ?

વિદેશ રાજ્ય મંત્રી કીર્તિ વર્ધન સિંહની હાજરીમાં એક કાર્યક્રમ દરમિયાન લૉટરી સિસ્ટમ દ્વારા યાત્રીઓના નામ પસંદ કરવામાં આવ્યા. વિદેશ મંત્રાલયે જણાવ્યું કે આ લૉટરી સિસ્ટમ સંપૂર્ણપણે કમ્પ્યુટર આધારિત અને પારદર્શક છે. આ વર્ષે કુલ 5561 યાત્રીઓએ યાત્રા માટે રજિસ્ટ્રેશન કરાવ્યું હતું, જેમાં 4024 પુરુષો અને 1537 મહિલાઓનો સમાવેશ થાય છે. આમાંથી 750 યાત્રીઓની પસંદગી કરવામાં આવી.

યાત્રા શા માટે બંધ થઈ હતી?

2019માં કોવિડ-19 મહામારી અને પૂર્વી લદ્દાખમાં વાસ્તવિક નિયંત્રણ રેખા (LAC) પર ચીની સેનાની ઘૂસણખોરીને કારણે ભારત-ચીન સંબંધોમાં તણાવ વધ્યો હતો, જેના કારણે કૈલાસ માનસરોવર યાત્રા બંધ કરવામાં આવી હતી. ઓક્ટોબર 2024માં વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગની મુલાકાત દરમિયાન યાત્રા ફરી શરૂ કરવા પર સહમતિ બની. બંને દેશોના વિદેશ મંત્રીઓની બેઠકમાં આ અંગે અંતિમ નિર્ણય લેવામાં આવ્યો.

ચીનનું પાકિસ્તાન સાથેનું જોડાણ

આ યાત્રા ફરી શરૂ થવાનો નિર્ણય એવા સમયે આવ્યો છે જ્યારે ચીને "ઓપરેશન સિંદૂર" દરમિયાન પાકિસ્તાનને ટેકો આપવાની વાત કરી છે. ચીનના વિદેશ મંત્રી વાંગ યીએ પાકિસ્તાનના ઉપ-વડાપ્રધાન અને વિદેશ મંત્રી ઈશાક દાર સાથેની બેઠકમાં પાકિસ્તાની સેનાને અદ્યતન હથિયારો અને સૈન્ય સાધનો આપવાનું વચન આપ્યું છે. આમ છતાં, ભારત અને ચીન વચ્ચે યાત્રાને લઈને બનેલી સહમતિ એક સકારાત્મક પગલું છે.

યાત્રીઓ માટે સલાહ

જે યાત્રીઓની પસંદગી થઈ છે, તેઓએ વિદેશ મંત્રાલયની વેબસાઈટ અને હેલ્પલાઈન નંબર દ્વારા વધુ માહિતી મેળવવી જોઈએ. યાત્રાના રૂટ અને સુવિધાઓને ધ્યાનમાં રાખીને, આ વર્ષની યાત્રા યાત્રીઓ માટે વધુ સરળ અને આરામદાયક રહેશે.

આ પણ વાંચો-PM મોદીનો પાકિસ્તાન પર પ્રહાર: "સિંદૂર મિટાવવા નીકળેલાઓને માટીમાં ભેળવ્યા"